దేవుడిని నమ్మే ఘోస్ట్‌హంటర్‌గా కనిపిస్తా!

‘మనం చిన్నప్పటి నుంచి ఎన్నో జానపద కథలు విని ఉంటాం. ‘వెనకటి రోజుల్లో ధనాన్ని భూమిలో పాతి ఒక బంధనం వేసి దానికి ఓ పిశాచిని కాపలాగా పెడతారు’ అంటూ ఓ కథ ప్రచారంలో ఉండేది. ఈ సినిమాకు అలాంటి జానపద కథే ఆధారం’ అన్నారు హీరో సుధీర్‌బాబు.

‘మనం చిన్నప్పటి నుంచి ఎన్నో జానపద కథలు విని ఉంటాం. ‘వెనకటి రోజుల్లో ధనాన్ని భూమిలో పాతి ఒక బంధనం వేసి దానికి ఓ పిశాచిని కాపలాగా పెడతారు’ అంటూ ఓ కథ ప్రచారంలో ఉండేది. ఈ సినిమాకు అలాంటి జానపద కథే ఆధారం’ అన్నారు హీరో సుధీర్‌బాబు. ఆయన నటించిన సూపర్‌ నాచురల్‌ మైథలాజికల్‌ థ్రిల్లర్‌ ‘జటాధర’ ఈ నెల 7న ప్రేక్షకుల ముందుకురానుంది. వెంకట్‌ కల్యాణ్‌, అభిషేక్‌ జైస్వాల్‌ దర్శకత్వం వహించిన ఈ చిత్రంలో సోనాక్షి సిన్హా, శిల్పా శిరోద్కర్‌ కీలక పాత్రలు పోషించారు. బుధవారం చిత్ర హీరో సుధీర్‌బాబు పాత్రికేయులతో ముచ్చటిస్తూ సినిమా సంగతుల్ని పంచుకున్నారు.

• ఈ సినిమాలో నేను ఘోస్ట్‌ హంటర్‌గా కనిపిస్తా. తనకు దెయ్యాలంటే నమ్మకం ఉండదు. దేవున్ని, సైన్స్‌ను బాగా నమ్ముతాడు. ‘జటాధర’ అనే టైటిల్‌ చూడగానే ఇది శివుడికి సంబంధించిన సినిమా అని అర్థమవుతుంది. దుష్ట శిక్షణకు శివుడు వస్తాడని ప్రేక్షకులు ముందే ఊహిస్తారు. అయితే అది జరగడానికి కథ ఎలాంటి మలుపులు తిరిగిందనే అంశం ఉత్కంఠను పంచుతుంది
• డివోషన్‌, ఫ్యామిలీ ఎలిమెంట్స్‌, ఘోస్ట్‌ హంటింగ్‌, శివుడి తాలూకు కథ..ఇలా డిఫరెంట్‌ లేయర్స్‌తో ఈ స్టోరీ సాగుతుంది. అరుణాచల ప్రస్తావన కూడా ఉంటుంది. ప్రస్తుతం మైథాలజీ ట్రెండ్‌ నడుస్తుందని ఈ కథను ఎంచుకోలేదు. అలా అనుకోకుండా జరిగింది. టీజర్‌, ్రట్రైలర్‌కు లభించిన స్పందనతో సినిమా విజయంపై నమ్మకం పెరిగింది.
• సోనాక్షి సిన్హా అద్భుతమైన నటి. ఆమె పోషించిన ధనపిశాచి పాత్ర సినిమాకు హైలైట్‌గా నిలుస్తుంది. శిల్పా శిరోద్కర్‌ శోభ అనే పాత్రలో కనిపిస్తుంది. తనది పర్‌ఫార్మెన్స్‌కు స్కోప్‌ ఉన్న క్యారెక్టర్‌. ఇది పూర్తిగా విజువల్‌ ఎఫెక్ట్స్‌ మీద ఆధారపడిన సినిమా కాదు. సోనాక్షి సిన్హా ఉండే ఎపిసోడ్‌లో గ్రాఫిక్‌ వర్క్‌ ఎక్కువగా ఉంటుంది.
• ఇప్పటికీ 20 సినిమాలు చేశాను. ఈ ప్రయాణం ఆనందాన్నిస్తున్నది. నేను ప్రతీ సినిమాకు వందశాతం ఎఫర్ట్స్‌ పెడతాను. పాత్ర కోసం అహర్నిశలు కష్టపడతాను. రాహుల్‌ రవీంద్రన్‌ దర్శకత్వంలో నా తదుపరి సినిమా ఉంటుంది. ఇప్పటివరకు ఎవరూ టచ్‌ చేయని కాన్సెప్ట్‌ అది. అలాగే పుల్లెల గోపీచంద్‌ బయోపిక్‌ కూడా చేసే ఆలోచన ఉంది.