ప్రముఖ నటుడు శుభలేఖ సుధాకర్ ఇంట్లో విషాదం నెలకొంది. ఆయన మాతృమూర్తి, ప్రముఖ గాయకురాలు ఎస్పీ శైలజ అత్త ఎస్ఎస్ కాంతం(80) మంగళవారం చెన్నైలో కన్నుమూసారు. మూడు నెలల క్రితం గుండెపోటుకు గురైన కాంతం.. ఆ తర్వాత వైద్యుల పర్యవేక్షణలో ఇంట్లోనే చికిత్స పొందుతూ ఆరోగ్యం క్షీణించి తుదిశ్వాస విడిచారు.
చెన్నై మహాలింగపురంలోని సుధాకర్ నివాసంలో తండ్రి సూరావజ్జల కృష్ణారావు, తల్లి ఎస్ఎస్ కాంతం ఉండేవారు. రెండేళ్ల క్రితం కృష్ణారావు మరణించారు. ఇప్పుడు ఆయన తల్లి కూడా చనిపోవడం విషాదాన్ని కలిగిస్తుంది. కృష్ణారావు, కాంతం దంపతులకు ముగ్గురు కుమారులు కాగా సుధాకర్ పెద్దవారు. రెండో కుమారుడు మురళీ దత్తుపోయి వైజాగ్లో, మూడో కుమారుడు సాగర్ అట్లాంటాలో స్థిరపడ్డారు.
కాంతం అంత్యక్రియలు ఈ రోజు మధ్యాహ్నాం జరగనున్నాయి. సుధాకర్ తల్లి మృతి పట్ల పలువురు సినీ ప్రముఖులు సంతాపం తెలియజేస్తూ కుటుంబ సభ్యులకు ప్రగాఢ సానుభూతి తెలియజేస్తున్నారు. కాగా, శుభలేఖ సుధాకర్ అసలు పేరు సూరావజ్జల సుధాకర్. ‘శుభలేఖ’ చిత్రంలో నటించి ఆ తర్వాత ఆయన ఆ పేరుతోనే సుపరిచితుడయ్యాడు