Visit:
‘పుష్ప-2’ (ది రూల్‌) ప్రచార పర్వం క్రమంగా జోరందుకుంటున్నది. తొలిభాగానికి దేశవ్యాప్తంగా దక్కిన అపూర్వ ఆదరణ దృష్ట్యా ఈ సినిమాకు సంబంధించిన ప్రతీ అప్‌డేట్‌ అభిమానుల్లో జోష్‌ను నింపుతున్నది. అల్లు అర్జున్‌ కథానాయకుడిగా సుకుమార్‌ దర్శకత్వంలో రూపొందుతున్న ఈ పాన్‌ ఇండియా చిత్రం ఆగస్ట్‌ 15న ప్రేక్షకుల ముందుకురానున్న విషయం తెలిసిందే. బన్నీ జన్మదినం సందర్భంగా విడుదల చేసిన టీజర్‌ సోషల్‌ మీడియాలో రికార్డులు సృష్టించింది. ఈ నేపథ్యంలో ఈ సినిమా పాటల ప్రమోషన్‌కు తెరలేవనుంది.
దర్శకుడు సుకుమార్‌ పాటల రూపకల్పన మీద ప్రత్యేక శ్రద్ధ తీసుకుంటారనే విషయం తెలిసిందే. దాంతో ‘పుష్ప-2’ గీతాలు ఎలా ఉంటాయోననే ఆసక్తి సంగీత ప్రియుల్లో నెలకొని ఉంది. ఈ సినిమాలో ‘పుష్ప పుష్ప పుష్పరాజ్‌..’ అంటూ సాగే టైటిల్‌ సాంగ్‌ను మే 1న విడుదల చేయబోతున్నారు. బుధవారం విడుదల చేసిన ప్రోమో ఆకట్టుకుంది. దేవిశ్రీప్రసాద్‌ స్వరాలందించిన ఈ సినిమా గీతాలు ప్రేక్షకుల అంచనాలను అందుకునేలా ఉంటాయని చిత్ర బృందం పేర్కొంది. ఈ చిత్రానికి సినిమాట్రోగఫీ: మిరోస్లా క్యూబా బ్రోజెక్‌, సంగీతం: దేవిశ్రీప్రసాద్‌, ప్రొడక్షన్‌ డిజైనర్‌: యస్‌.రామకృష్ణ-మోనిక నిగోత్రే, కథ, కథనం, దర్శకత్వం: సుకుమార్‌ బి.
