కెన్యాలోనే అధికభాగం షూటింగ్‌

రాజమౌళి దర్శకత్వంలో మహేష్‌బాబు కథానాయకుడిగా నటిస్తున్న యాక్షన్‌ అడ్వెంచర్‌ చిత్రం ప్రస్తుతం కెన్యాలో చిత్రీకరణ జరుపుకుంటున్న విషయం తెలిసిందే. కథానుగుణంగా అత్యధిక భాగాన్ని అక్కడే తెరకెక్కిస్తారని చెబుతున్నారు. భారతీయ పురాణాలతో ముడిపడిన ఈ సాహసగాథలో మహేష్‌బాబు పాత్ర మునుపెన్నడూ చూడని విధంగా కొత్త పంథాలో సాగుతుందని సమాచారం.

రాజమౌళి దర్శకత్వంలో మహేష్‌బాబు కథానాయకుడిగా నటిస్తున్న యాక్షన్‌ అడ్వెంచర్‌ చిత్రం ప్రస్తుతం కెన్యాలో చిత్రీకరణ జరుపుకుంటున్న విషయం తెలిసిందే. కథానుగుణంగా అత్యధిక భాగాన్ని అక్కడే తెరకెక్కిస్తారని చెబుతున్నారు. భారతీయ పురాణాలతో ముడిపడిన ఈ సాహసగాథలో మహేష్‌బాబు పాత్ర మునుపెన్నడూ చూడని విధంగా కొత్త పంథాలో సాగుతుందని సమాచారం. కెన్యా షూటింగ్‌ సందర్భంగా చిత్రబృందం ఆ దేశ మంత్రి ముసాలియా ముదావాదిని కలుసుకుంది. ఈ సందర్భంగా చిత్రానికి సంబంధించిన పలు ఆసక్తికరమైన విషయాలను పంచుకుంటూ సదరు మంత్రి సోషల్‌మీడియాలో ఓ పోస్ట్‌ చేశారు.

భారీ కథాంశాల్ని ప్రభావవంతంగా తెరపై ఆవిష్కరించడంలో సిద్ధహస్తుడైన రాజమౌళి తమ దేశంలో షూటింగ్‌ జరపడం ఆనందంగా ఉందని, ప్రపంచ వేదికపై తమ దేశ అందాలను, విభిన్న భౌగోళిక స్వరూపాన్ని ఆవిష్కరించడంలో ఈ సినిమా దోహదపడుతుందని, తమ చరిత్రను ప్రపంచానికి తెలియజేయడానికి ఇదొక అవకాశమని ఆ పోస్ట్‌లో పేర్కొన్నారు. దాదాపు 1200కోట్ల బడ్జెట్‌తో తెరకెక్కిస్తున్న ఈ చిత్రాన్ని 120 దేశాల్లో విడుదల చేసేందుకు సన్నాహాలు చేస్తున్నారు. ఈ సినిమాను రెండు భాగాలుగా విడుదల చేయబోతున్నారనే వార్తలు వినిపించాయి. విశ్వసనీయ సమాచారం ప్రకారం సింగిల్‌ పార్ట్‌ ఫిల్మ్‌గా రిలీజ్‌ చేస్తారని, 2027 ప్రథమార్థంలో ఈ సినిమా విడుదల ఉంటుందని తెలిసింది. ‘ఎస్‌ఎస్‌ఎంబీ29’ వర్కింగ్‌ టైటిల్‌తో తెరకెక్కుతున్న ఈ చిత్రాన్ని కేఎల్‌ నారాయణ నిర్మిస్తున్నారు.