Visit:
Director Shankar | ఇండియాలోని గొప్ప దర్శకుల లిస్ట్‌ తీస్తే అందులో శంకర్‌ పేరు కచ్చితంగా ఉంటుంది. ఆయన నుంచి సినిమా వస్తుందంటే హీరో ఎవరా అని కూడా ఆలోచించకుండా ప్రేక్షకులు థియేటర్‌లకు వెళ్లిపోతుంటారు. సమాజంలోని లోపాల్ని వేలెత్తి చూపిస్తూనే కమర్షియల్ హంగులను బాగా దట్టించడంలో శంకర్‌ సిద్ధ హస్తుడు. ఓ వైపు సోషల్‌ మెసేజ్‌లు ఇస్తూనే మరోవైపు కావలిసినంత ఎంటర్‌టైన్‌మెంట్‌ అందిస్తాడు శంకర్‌. ఇక ఆయనతో సినిమాలు చేయాలని కోలీవుడే కాదు టాలీవుడ్‌ హీరోలు కూడా ఆరాటపడుతుంటారు. ప్రస్తుతం ఆయన రామ్‌చరణ్‌తో గేమ్‌ చేంజర్‌ సినిమా చేస్తున్నాడు. ‘ఆర్‌ఆర్‌ఆర్‌’ వంటి ఇండస్ట్రీ హిట్‌ తర్వాత రామ్‌చరణ్‌ నుంచి వస్తున్న సినిమా కావడంతో అందరిలోనూ విపరీతమైన ఆసక్తి నెలకొంది. పైగా ఇటీవలే విడుదలైన టైటిల్ పోస్టర్‌, ఫస్ట్‌లుక్‌ పోస్టర్‌ సినిమాపై మంచి బజ్‌ను క్రియేట్‌ చేసింది.
ఇదంతా పక్కనపెడితే అసలు శంకర్‌ ముందుగా అనుకున్న హీరో రామ్‌చరణ్‌ కాదట. మరో టాలీవుడ్‌ స్టార్‌ను హీరోగా అనుకున్నాడట. ఇంతకీ ఆ స్టార్ హీరో ఎవరా? అనుకుంటున్నారా? ఆయన మరెవరో కాదు పవర్‌ స్టార్ పవన్‌ కళ్యాణ్‌. శంకర్‌ ఈ కథను దిల్‌రాజుకు వినిపించిన తర్వాత.. పవన్‌ కళ్యాన్‌ను హీరోగా అనుకుంటున్నట్లు తెలిపాడట. అయితే దిల్‌రాజు ఈ కథ రామ్‌చరణ్‌కు అయితే పక్కాగా సెట్‌ అవుతుందని చెప్పి.. ఫోన్‌ ద్వారా చరణ్‌కు కథను శంకర్‌తో చెప్పించాడట. కథ బాగా నచ్చడంతో చరణ్‌ కూడా వెంటనే ఓకే చెప్పాడట. అలా ఈ కథలోకి చరణ్‌ ఎంట్రీ ఇచ్చాడు.
ఇక చరణ్‌ ఇప్పుడు గ్లోబల్‌ స్టార్ అయ్యాడు. చరణ్‌ మార్కెట్‌ వాల్యూ కూడా చాలా పెరిగింది. సినిమాకు కాస్త పాజిటీవ్‌ వచ్చినా సరే కోట్ల వర్షం కురుస్తుంది. పొలిటికల్‌ థ్రిల్లర్‌ నేపథ్యంలో తెరకెక్కుతున్న ఈ సినిమా సంక్రాంతి కానుకగా ప్రేక్షకుల ముందుకు రానుంది. కియారా అద్వాణీ హీరోయిన్‌గా నటిస్తున్న ఈ సినిమాలో సునీల్‌, ఎస్‌.జే సూర్య కీలకపాత్రలో నటిస్తున్నాడు. శ్రీవెంకటేశ్వర క్రియేషన్స్‌ పతాకంపై దిల్‌రాజు ఈ సినిమాను నిర్మిస్తున్నాడు.
