K Raghavendra Reddy l సమకాలీన రాజకీయాలకు దగ్గరగా ఉంటుంది

‘రాజకీయాల్లో జరిగిన సంఘటనలను స్ఫూర్తిగా తీసుకుని ‘శాసనసభ’ కథను రెడీ చేశాను. ‘శాసనసభ’ అంటే పవిత్రస్థలం.

‘రాజకీయాల్లో జరిగిన సంఘటనలను స్ఫూర్తిగా తీసుకుని ‘శాసనసభ’ కథను రెడీ చేశాను. ‘శాసనసభ’ అంటే పవిత్రస్థలం. దానిని దేవాలయంగా భావించాలనే సందేశాన్ని ఈ చిత్రంలో జోడించాం. ‘శాసనసభ’ ప్రతిష్టను పెంచే విధంగా ఈ చిత్రం వుంటుంది’ అన్నారు కె.రాఘవేంద్ర రెడ్డి. ఇంద్రసేన హీరోగా నటించిన ఈ చిత్రం నేడు ప్రేక్షకుల ముందుకు రానుంది. జర్నలిస్ట్‌గా కెరీర్‌ను ప్రారంభించిన రాఘవేంద్ర రెడ్డి ‘శాసనసభ’ చిత్రంతో రచయితగా మారారు.

ఈ సందర్భంగా గురువారం ఆయన పాత్రికేయులతో మాట్లాడుతూ ‘జర్నలిజంలో వున్న అనుభవం, రాజకీయాల పట్ల నాకున్న పరిజ్ఞానంతో పొలిటికల్‌ థ్రిల్లర్‌గా ఈ కథను తయారుచేశాను. ఈ చిత్రంలో నేటి రాజకీయాలపై విమర్శలు ఉంటాయి. అయితే ఏ పార్టీనో, రాజకీయ నాయకుడో లక్ష్యం మాత్రం కాదు. కానీ కాకతాళీయంగా సమకాలీన రాజకీయాలకు అద్దం పట్టే విధంగా ఈ చిత్ర కథ ఉంటుంది.

రాజకీయ వ్యవస్థలో వున్న లోటుపాట్లను చర్చిస్తూ.. ఓటు విలువ తెలియజేసే విధంగా ఈ చిత్రం ఉంటుంది. ప్రతి సన్నివేశం అందరి హృదయాలకు హత్తుకునే విధంగా ఉంటుంది. ముఖ్యంగా ఈ చిత్రంలో ఉండే సందేశం అందరికి ఆమోదయోగ్యంగా ఉంటుంది. ఈ చిత్రంతో పాటు నేను కథను అందించిన మరో యాక్షన్‌ ఇన్వెస్టిగేషన్‌ థ్రిల్లర్‌ షూటింగ్‌ జరుగుతున్నది. మరో పాన్‌ఇండియా కథ రెడీగా వుంది. దీంతో పాటు మరో క్రైమ్‌ థ్రిల్లర్‌ సినిమా కూడా త్వరలో ప్రారంభం కాబోతుంది’ అన్నారు.