Sangeeth Shoban | అంతా రాములోరు చూసుకుంటారు.. గోదావరి నేపథ్యంలో సంగీత్ శోభన్ కొత్త సినిమా!

Sangeeth Shoban | యంగ్ హీరో సంగీత్ శోభన్ వరుసగా విభిన్నమైన కథలను ఎంచుకుంటూ టాలీవుడ్‌లో తనకంటూ ప్రత్యేక గుర్తింపు సంపాదించుకుంటున్నారు. ఇప్పుడు ఆయన మరో ఆసక్తికరమైన రొమాంటిక్ ఎంటర్‌టైనర్‌తో ప్రేక్షకుల ముందుకు రావడానికి సిద్ధమవుతున్నారు. ఈ చిత్రంలో మాలీవుడ్ నటి అనస్వర రాజన్ కథానాయికగా నటిస్తోంది.

Sangeeth Shoban | యంగ్ హీరో సంగీత్ శోభన్ వరుసగా విభిన్నమైన కథలను ఎంచుకుంటూ టాలీవుడ్‌లో తనకంటూ ప్రత్యేక గుర్తింపు సంపాదించుకుంటున్నారు. ఇప్పుడు ఆయన మరో ఆసక్తికరమైన రొమాంటిక్ ఎంటర్‌టైనర్‌తో ప్రేక్షకుల ముందుకు రావడానికి సిద్ధమవుతున్నారు. ఈ చిత్రంలో మాలీవుడ్ నటి అనస్వర రాజన్ కథానాయికగా నటిస్తోంది.అందమైన గోదావరి ప్రాంతం నేపథ్యంలో తెరకెక్కుతున్న ఈ సినిమాకు ‘అంతా రాములోరు చూసుకుంటారు’ అనే ఆసక్తికరమైన టైటిల్‌ను చిత్రబృందం తాజాగా ప్రకటించింది. టైటిల్‌తో పాటు విడుదల చేసిన ప్రచార వీడియో సినిమాపై ఆసక్తిని పెంచుతోంది.

ఈ సినిమాలో సంగీత్ శోభన్ మారుతి అనే పాత్రలో కనిపించనుండగా, అనస్వర రాజన్ శిరీష పాత్రలో ప్రేక్షకులను పలకరించనుంది. సాధారణ ప్రేమకథలా కాకుండా వీరిద్దరి మధ్య జరిగే ఓ అందమైన సంభాషణతో సినిమా కథ సాగుతుందనే సంకేతాలను మేకర్స్ ఇచ్చారు. అయితే ఈ చిత్రాన్ని ఆసక్తికరంగా “నాట్ ఎ లవ్ స్టోరీ” అంటూ ప్రమోట్ చేస్తున్నారు. దీంతో అసలు మారుతి, శిరీషల కథ ఏమిటి? వారి ప్రయాణంలో ఎలాంటి మలుపులు ఉండబోతున్నాయి? అనేది ప్రేక్షకుల్లో ఆసక్తిని రేకెత్తిస్తోంది. గోదావరి ప్రాంతం, అక్కడి సంస్కృతి, పల్లెటూరి వాతావరణం నేపథ్యంలో ఈ చిత్రాన్ని అందంగా తెరకెక్కిస్తున్నట్లు తెలుస్తోంది. ఫీల్‌గుడ్ కథతో పాటు సహజమైన భావోద్వేగాలు, పాత్రల మధ్య కెమిస్ట్రీ ఈ సినిమాకు ప్రధాన ఆకర్షణగా నిలవనున్నాయని చిత్ర యూనిట్ చెబుతోంది.

‘కుమారి 21F’తో దర్శకుడిగా మంచి గుర్తింపు తెచ్చుకున్న పల్నాటి సూర్య ప్రతాప్ ఈ చిత్రానికి దర్శకత్వం వహిస్తున్నారు. ఆయన తెరకెక్కిస్తున్న ఈ కొత్త కథపై ఇప్పటికే మంచి అంచనాలు నెలకొన్నాయి. టైటిల్ అనౌన్స్‌మెంట్ వీడియోలో సంగీత దర్శకుడు మిక్కీ జే మేయర్ అందించిన మెలోడీ ప్రత్యేక ఆకర్షణగా నిలిచింది. గోదావరి నేపథ్యంలో సాగే ఈ అందమైన కథకు ఆయన సంగీతం మరింత బలంగా నిలుస్తుందని అభిమానులు భావిస్తున్నారు.ఫీల్‌గుడ్ సినిమాలకు సంగీతం ఎంత ముఖ్యమో ప్రత్యేకంగా చెప్పాల్సిన అవసరం లేదు. ఈ నేపథ్యంలో మిక్కీ జే మేయర్ సంగీతం ఈ సినిమాకు అదనపు బలంగా మారే అవకాశం ఉంది. ఇక ఈ సినిమాలో సీనియర్ నటులు రావు రమేష్, రోహిణి, రఘుబాబు, అలీ, ఝాన్సీ, వినోద్ కుమార్, శివనారాయణ, శ్రీలక్ష్మి తదితరులు కీలక పాత్రల్లో నటిస్తున్నారు.