Visit:
Bihar : బిహార్లోని జముయిలో బాలికపై కొందరు దుండగులు వేధింపులకు పాల్పడిన సంగతి తెలిసిందే. ఈ ఘటనకు సంబంధించిన వీడియో వైరల్ అయింది. ఈ ఘటనలో కీలక నిందితుడు ఎన్కౌంటర్లో గాయపడ్డాడు. నందన్ యాదవ్ అనే ప్రధాన నిందితుడి కాలుపై పోలీసులు కాల్పులు జరపగా.. అతడు గాయపడ్డాడు. సెప్టెంబర్ 19న బిహార్లోని జముయిలో ఒక బాలుడు, బాలిక రాత్రి పూట కోచింగ్ నుంచి తిరిగి వస్తున్నారు.
అయితే, వీరిని కొందరు యువకులు అడ్డుకున్నారు. ఇద్దరిపై వేధింపులకు పాల్పడ్డారు. ముఖ్యంగా బాలికతో అసభ్యంగా ప్రవర్తించారు. లైంగిక దాడికి దిగారు. ఈ ఘటనలో బాలికపై దాడిని ఆ వ్యక్తి అడ్డుకునేందుకు ప్రయత్నించగా.. అతడిపై కూడా దాడి చేశారు. దీనికి సంబంధించిన వీడియో వైరల్గా మారింది. ఈ ఘటనపై నెటిజన్ల నుంచి తీవ్ర విమర్శలు వ్యక్తమయ్యాయి. దీంతో పోలీసులు స్పందించారు. అయితే, బాధితుల నుంచి తమకు ఎలాంటి ఫిర్యాదు అందలేదని స్తానిక పోలీసులు తెలిపారు. వీడియో వైరల్గా మారిన తర్వాత నిందితులపై కేసు నమోదు చేశారు. ఈ కేసులో ఏడుగురిని నిందితులుగా గుర్తించారు. వీరిలో ముగ్గురిని అరెస్టు చేశారు. ఈ కేసు విచారణ కోసం పోలీసులు సిట్ (ప్రత్యేక విచారణ బృందం) ఏర్పాటు చేశారు.
ఈ ఘటనకు పాల్పడిన వారిలో నందన్ యాదవ్ ప్రధాన నిందితుడిగా ఉన్నారు. ఘటన జరిగినప్పటి నుంచి అతడు పరారీలో ఉన్నాడు. అతడి కోసం పోలీసులు వెతుకుతుండగా ఒక చోట అతడు ఉన్నట్లు గుర్తించారు. ఈ క్రమంలో అతడు పారిపోయేందుకు ప్రయత్నించగా.. పోలీసులు అతడి కాలిపై కాల్పులు జరిపారు. ఈ ఘటనలో అతడు తీవ్రంగా గాయపడ్డాడు. వెంటనే అతడిని స్థానిక ఆస్పత్రికి తరలించి, చికిత్స అందిస్తున్నారు. నందన్ యాదవ్కు ఇతర అక్రమ వ్యాపారులు కూడా ఉన్నట్లు పోలీసులు గుర్తించారు. మిగతా నిందితుల కోసం పోలీసులు గాలిస్తున్నారు.
