నిర్మాత కష్టాలేమిటో తెలిసొచ్చాయి!

నటిగా 15 ఏళ్ల కెరీర్‌ పూర్తయింది. ఈ ప్రయాణంలో ఎంతో మంది అభిమానాన్ని సంపాదించుకున్నా. అయినా ఇంకా ఏదో చేయాలనే తపన నన్ను వెంటాడేది. ఇండస్ట్రీలో ఇంత అనుభవం ఉంది కాదా అనే ధీమాతో నిర్మాతగా మారాను’ అని చెప్పారు అగ్ర కథానాయిక సమంత.

‘నటిగా 15 ఏళ్ల కెరీర్‌ పూర్తయింది. ఈ ప్రయాణంలో ఎంతో మంది అభిమానాన్ని సంపాదించుకున్నా. అయినా ఇంకా ఏదో చేయాలనే తపన నన్ను వెంటాడేది. ఇండస్ట్రీలో ఇంత అనుభవం ఉంది కాదా అనే ధీమాతో నిర్మాతగా మారాను’ అని చెప్పారు అగ్ర కథానాయిక సమంత. ట్రా లా లా పేరుతో నూతన నిర్మాణ సంస్థను ప్రారంభించిన ఆమె తొలి ప్రయత్నంగా తెరకెక్కించిన ‘శుభం’ చిత్రం ఈ నెల 9న ప్రేక్షకుల ముందుకురానుంది. ఈ సందర్భంగా మంగళవారం సమంత పాత్రికేయులతో ముచ్చటిస్తూ పంచుకున్న విశేషాలు…

• నటిగా శుక్రవారం ఎలా ఉంటుందో నాకు అనుభవం ఉంది. కానీ నిర్మాతగా నాకిది మొదటి శుక్రవారం. చాలా ఒత్తిడిగా ఫీలవుతున్నా. నిర్మాతకు ఎన్ని కష్టాలు ఉంటాయో ఇప్పుడు నాకు అర్థమవుతున్నది. వారం రోజులుగా నిద్రలేని రాత్రులు గడుపుతున్నా. లొకేషన్‌లో ఒక్క సీన్‌ అనుకున్నట్లుగా రాకపోతే నిర్మాతకు ఎంత నష్టం వస్తుంది? ఎంత డబ్బు వృథా అవుతుందో ఇప్పుడు ప్రత్యక్షంగా తెలుసుకున్నా.
• ఈ సినిమా కథ సీరియల్స్‌ చుట్టూ నడుస్తుంది. సీరియల్స్‌లో శుభం కార్డు ఎప్పుడు పడుతుందా అని అందరూ ఎదురుచూస్తుంటారు. అందుకే అదే టైటిల్‌ పెట్టాం. ఇక ప్రొడక్షన్‌ హౌస్‌కు ట్రా లా లా అనే పేరు పెట్టడానికి ఓ కారణం ఉంది. చిన్నప్పుడు స్కూల్లో ‘బ్రౌన్‌ గర్ల్‌ ఇన్‌ ది రెయిన్‌’ అనే ఓ పోయెమ్‌ ఉండేది. అందులోని వాక్యాల్ని తీసుకొని బ్యానర్‌ పేరు పెట్టాను.
• నాకు నేనే పెద్ద విమర్శకురాలిని. సినిమా విషయంలో ఎక్కడ తప్పు చేశానో వెంటనే తెలిసిపోతుంది. ‘శుభం’ విషయంలో అలాంటి తప్పులు జరగకూడదని అనుకున్నా. ఫస్ట్‌సీన్‌ నుంచి లాస్ట్‌ సీన్‌ వరకు ఎక్కడా బోర్‌ కొట్టకుండా ఉండేలా జాగ్రత్తలు తీసుకున్నాం. ఇది హారర్‌ కామెడీ చిత్రం. ఇందులో సోషల్‌ సెటైర్‌ కూడా ఉంటుంది.
• ఈ మధ్య ఓ అభిమాని నాకోసం గుడి కట్టారని తెలిసింది. నా మీద ఇంత ప్రేమ చూపిస్తున్నారా? అనుకున్నా. ఏం చెప్పాలో కూడా తెలియలేదు. కానీ ఇలా గుడులు కట్టే ధోరణిని మాత్రం నేను ప్రోత్సహించను. ‘శుభం’ చిత్రానికి మంచి రిలీజ్‌ డేట్‌ దొరికింది. ఈ వేసవిలో అందరూ ఫ్యామిలీతో కలిసి సినిమా చూడాలని కోరుకుంటున్నా.