అదృశ్యశక్తులు ఉంటాయేమో అనుకున్నా!

కెరీర్‌ ఆరంభం నుంచి వినూత్న కథలతో ప్రయాణం సాగిస్తున్నారు ఆది పినిశెట్టి. ఆయన నటించిన హారర్‌ చిత్రం ‘శబ్దం’. అరివళగన్‌ దర్శకుడు. పారానార్మల్‌ యాక్టివిటీ నేపథ్యంలో తెరకెక్కించిన ఈ చిత్రం ఈ నెల 28న ప్రేక్షకుల ముందుకురానుంది.

కెరీర్‌ ఆరంభం నుంచి వినూత్న కథలతో ప్రయాణం సాగిస్తున్నారు ఆది పినిశెట్టి. ఆయన నటించిన హారర్‌ చిత్రం ‘శబ్దం’. అరివళగన్‌ దర్శకుడు. పారానార్మల్‌ యాక్టివిటీ నేపథ్యంలో తెరకెక్కించిన ఈ చిత్రం ఈ నెల 28న ప్రేక్షకుల ముందుకురానుంది. నైజాంలో ఈ చిత్రాన్ని మైత్రీ డిస్ట్రిబ్యూషన్‌ సంస్థ విడుదల చేస్తున్నది. ఈ సందర్భంగా ఆది పినిశెట్టి పంచుకున్న సినిమా విశేషాలు..

• శబ్దం’ భావోద్వేగాలు కలబోసిన హారర్‌ చిత్రం. రెగ్యులర్‌ హారర్‌ చిత్రాలకు చాలా భిన్నంగా ఉంటుంది. ఆత్మలను సైంటిఫిక్‌ పంథాలో అన్వేషించే పాయింట్‌ కొత్తగా అనిపిస్తుంది. ఇలాంటి హారర్‌ వరల్డ్‌ను ప్రేక్షకులు ఇప్పటివరకు చూసి ఉండరు. సాంకేతికంగా అన్ని అంశాల్లో ఉన్నతంగా కనిపిస్తుంది.
• ఈ సినిమాలో నేను పారానార్మల్‌ యాక్టివిటీస్‌ను పరిశోధించే ఇన్వెస్టిగేటర్‌ పాత్రలో కనిపిస్తా. ఆత్మలను శబ్దం ద్వారా కనిపెట్టి వాటి చర్యలను తెలుసుకుంటాను. టైటిల్‌ తగినట్లుగానే ప్రతి సన్నివేశంలో సౌండ్‌ ఇంట్రెస్టింగ్‌ ఎలిమెంట్‌గా ఉంటుంది. స్వతహాగా నాకు ఆత్మలు, అతీత శక్తులపై నమ్మకం లేదు. కానీ ఈ సినిమా కోసం సేకరించిన పుస్తకాలను చదివినప్పుడు నిజంగా అదృశ్య శక్తులు ఉంటాయేమో అనిపించింది.
• ఈ కథలో శబ్దం ఎలిమెంట్‌ కీలక భూమిక పోషిస్తుంది కాబట్టి థియేటర్‌లో చూస్తేనే నిజమైన అనుభూతిని పొందగలం.
• తమన్‌ మ్యూజిక్‌ ఈ సినిమాకు ప్రధానాకర్షణ. ఆయన పెద్ద సినిమాలు చేస్తూ కూడా ఈ సినిమాకు మ్యూజిక్‌ అందించాడు. సౌండ్‌ డిజైనింగ్‌ కూడా అద్భుతంగా కుదిరింది.
• నాకు డ్రీమ్‌రోల్స్‌ అంటూ ఏమీ లేవు. ఏ పాత్ర చేసినా గుర్తుండిపోవాలన్నదే నా అభిమతం. ప్రస్తుతం ‘అఖండ-2’ సినిమాలో ఓ ముఖ్య పాత్రను పోషిస్తున్నా. దేవాకట్టా డైరెక్షన్‌లో ఓ సినిమా చేస్తున్నా. ‘డ్రైవ్‌’ ‘మరకతమణి-2’ షూటింగ్స్‌ జరుగుతున్నాయి.