‘కాంతార: చాప్టర్‌ 1’లో మా ఊరంతా భాగమైంది

‘కాంతార’ ఫ్రాంచైజీతో దేశవ్యాప్తంగా తిరుగులేని గుర్తింపు పొందారు కన్నడ అగ్ర హీరో రిషబ్‌ శెట్టి. దసరా సందర్భంగా విడుదలైన ‘కాంతార చాప్టర్‌ 1’ పానిండియా రికార్డులను అధిగమిస్తూ దూసుకుపోతున్నది.

‘కాంతార’ ఫ్రాంచైజీతో దేశవ్యాప్తంగా తిరుగులేని గుర్తింపు పొందారు కన్నడ అగ్ర హీరో రిషబ్‌ శెట్టి. దసరా సందర్భంగా విడుదలైన ‘కాంతార చాప్టర్‌ 1’ పానిండియా రికార్డులను అధిగమిస్తూ దూసుకుపోతున్నది. ఇప్పటికే ఈ సినిమా 500కోట్ల మార్క్‌ని దాటడం విశేషం. రిషబ్‌ శెట్టిలోని దర్శకుడికీ, నటుడికీ దేశవ్యాప్తంగా ప్రశంసలు వెల్లువెత్తుతున్నాయి. ఈ నేపథ్యంలో శనివారం ఆయన విలేకరులతో ముచ్చటించారు..

• స్వతహాగా నాకు జానపద కథలు ఇష్టం. ఇండియా జానపద కథలకు నిలయం. ఈ సినిమా విజయంతో మరిన్ని జానపద కథలు వచ్చేందుకు మార్గం సుగమమైంది. ‘కాంతార’ మా ప్రాంతంలో నిజంగా జరిగిన కథ. అందుకే అక్కడే సినిమా తీశాను. ఇది చాలా కాంప్లికేటెడ్‌ స్క్రిప్ట్‌. తెరకెక్కించడం నిజంగా పెద్ద ఛాలెంజ్‌. నిర్మాణంలో ప్రతి రోజూ ఓ ఛాలెంజ్‌గానే గడిచింది. ఈ సినిమా కోసం మా ప్రాంతంలో ప్రత్యేకమైన స్టూడియోను కూడా ఏర్పాటు చేశాను. చిన్నప్పట్నుంచీ మా ఊళ్లో సినిమా చేయాలని నా కోరిక. అది ‘కాంతర’ ఫ్రాంచైజీతో నెరవేరింది. మా ఊరివాళ్లంతా ఈ ప్రాసెస్‌లో ఇన్వాల్వ్‌ అయ్యారు. నేను స్టార్‌గా ఎదిగినా నాలోని దర్శకుడ్నే ఇష్టపడతాను. దర్శకత్వానికే తొలి ప్రాధాన్యతనిస్తాను.
• అజనీష్‌ ఇచ్చిన సంగీతం ఈ చిత్రానికి అదనపు బలం. ట్రైబల్‌ ఏరియాలకు వెళ్లి అక్కడి ఒరిజినల్‌ స్కోర్‌ని రికార్డ్‌ చేసి, ఈ సినిమాకు ఉపయోగించాడు. హోంబలే వారు ఇచ్చిన సపోర్ట్‌ కూడా సాధారణమైనది కాదు. నిర్మాతలుగానే కాక, వ్యక్తిగతంగా కూడా మోరల్‌ సపోర్ట్‌ ఇచ్చారు. వారి సహకారం వల్లే ఇది సాధ్యమైంది. ప్రస్తుతం ‘కాంతార: చాప్టర్‌ 1’ ప్రమోషన్స్‌లో బిజీగా ఉన్నా. తర్వాత కొంత విశ్రాంతి తీసుకొని జనవరి నుంచి ‘జై హనుమాన్‌’ షూటింగ్‌లో జాయిన్‌ అవుతా. దర్శకుడిగా కొన్ని కథల్ని సిద్ధం చేస్తున్నా.