Renu desai reentry | రవితేజ సినిమాతో రేణు దేశాయ్ రీ ఎంట్రీ !

January 30, 2022 / 06:45 PM IST

Renu desai reentry | రేణు దేశాయ్.. ఈ పేరుకు ప్రత్యేకంగా పరిచయం అవసరం లేదు. ఎందుకంటే ఒకప్పుడు కేరాఫ్ పవన్ కళ్యాణ్ గా ఉండే ఈమె ఆ తర్వాత తనకంటూ సొంత గుర్తింపు తెచ్చుకుంటుంది. 17 ఏండ్లుగా సినిమాల‌కు దూరంగా ఉన్న రేణు దేశాయ్‌.. మ‌ధ్య‌లో ఒక మ‌రాఠీ సినిమాకు ప్రొడ్యూస‌ర్‌గా వ్య‌వ‌హ‌రించింది. ప‌లు టీవీ షోల‌కు హోస్ట్‌గా ఉన్న ఈమె.. ఇప్పుడు మ‌ళ్లీ న‌ట‌న వైపు కూడా వ‌చ్చేస్తుంది. సెకండ్ ఇన్నింగ్స్ బ‌లంగా ఉండాల‌ని ప్లాన్ చేసుకుంటుంది. ఈ క్రమంలోనే ఆ మధ్య బెల్లంకొండ శ్రీనివాస్ సినిమాలో హీరో అక్కగా నటించడానికి ఓకే చెప్పింది. కానీ అనుకోని కార‌ణాల‌తో ఆ సినిమా ఆగిపోయింది. ఈ క్ర‌మంలో ఇప్పుడు ఈమెకు మ‌రో అవ‌కాశం వ‌చ్చిన‌ట్లు తెలుస్తోంది.

టైగ‌ర్ నాగేశ్వ‌ర‌రావు జీవితం ఆధారంగా బెల్లంకొండ శ్రీనివాస్ ఒక సినిమా చేయాల‌ని అనుకున్నాడు. దీనికి స్టూవ‌ర్ట్‌పురం దొంగ అనే టైటిల్ కూడా ఖ‌రారు చేశారు. ఈ సినిమాలో హీరో అక్క పాత్ర కోసం రేణు దేశాయ్‌ని అనుకున్నారు. క‌థాబ‌లం ఉండ‌టంతో త‌న రీఎంట్రీకి ఇదే స‌రైన క్యారెక్ట‌ర్ అని భావించిన రేణు దేశాయ్ కూడా ఈ సినిమాకు గ్రీన్ సిగ్న‌ల్ ఇచ్చింది. ఈ సినిమాకు సంబంధించి బెల్లంకొండ శ్రీనివాస్ లుక్‌ను కూడా విడుద‌ల చేశారు. కానీ అక్క‌డే అస‌లు స‌మ‌స్య వ‌చ్చింది. ఈ పోస్ట‌ర్ రిలీజ్ చేసిన స‌మ‌యంలోనే ర‌వితేజ హీరోగా వంశీ ద‌ర్శ‌క‌త్వంలో కూడా టైగ‌ర్ నాగేశ్వ‌ర‌రావు బ‌యోపిక్‌ను అనౌన్స్ చేశారు. రెండు సినిమాలు ఒకే క‌థ‌తో వ‌స్తుండ‌టంతో బెల్లంకొండ శ్రీనివాస్ వెన‌క్కి త‌గ్గాడు. స్టూవ‌ర్ట్‌పురం దొంగ సినిమా ఆగిపోయింది. ర‌వితేజ టైగ‌ర్ నాగేశ్వ‌ర‌రావు పాన్ ఇండియా ప్రాజెక్ట్‌గా వ‌స్తుంది. త్వ‌ర‌లోనే ఈ సినిమా షూటింగ్ మొద‌లుకానుంది. ఈ క్ర‌మంలోనే టైగ‌ర్ నాగేశ్వ‌ర‌రావు సినిమాలో సేమ్ అదే హీరో అక్క‌ పాత్ర‌లో న‌టించే అవ‌కాశం వ‌చ్చిన‌ట్లు తెలుస్తోంది. ఈ సినిమా త‌ర్వాత త‌న సెకండ్ ఇన్నింగ్స్ వేగంగా ఉండేలా ప్లాన్ చేసుకుంటుంది రేణు దేశాయ్‌.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి