చిరంజీవి మాట కోసం క‌దిలివ‌స్తున్న రామ్‌చ‌ర‌ణ్‌.. సంతోషంలో కీర్తి సురేశ్‌

January 26, 2022 / 06:01 PM IST

Keerthy suresh, Chiranjeevi and Ramcharan | Good Luck sakhi pre release event — Keerthy suresh, Chiranjeevi and Ramcharan

Good Luck Sakhi Pre release event | ఈ మ‌ధ్య‌కాలంలో ఇండ‌స్ట్రీలో ఏ చిన్న‌ ఫంక్ష‌న్ అయినా చిరంజీవి ముఖ్య అతిథిగా వెళ్తున్నాడు. పిలిచిన ప్ర‌తి ఫంక్ష‌న్‌కు హాజ‌రై వారికి స‌పోర్ట్‌గా నిలుస్తున్నాడు. ఇప్పుడు కీర్తి సురేశ్ కోసం కూడా చీఫ్ గెస్ట్‌గా వెళ్ల‌డానికి సిద్ధ‌మ‌య్యాడు. గుడ్ ల‌క్ స‌ఖి సినిమా ప్రీ రిలీజ్ ఈవెంట్‌కు వ‌స్తాన‌ని మాట ఇచ్చాడు మెగాస్టార్ చిరంజీవి. సాయంత్రం ఈవెంట్ అన‌గా పొద్దున చిరంజీవికి క‌రోనా అని తెలిసింది. దీంతో ముందు నుంచి అనుకున్న ప్లాన్స్ అన్నీ త‌ల‌కిందుల‌య్యాయి. అయిన‌ప్ప‌టికీ ఇచ్చిన మాట పోకూడ‌ద‌ని తాను వెళ్ల‌లేక‌పోయినా.. త‌న‌కు బ‌దులు త‌న త‌న‌యుడు రామ్‌చ‌ర‌ణ్‌ను పంపిస్తున్నాడు మెగాస్టార్‌.

షూటింగ్ నేప‌థ్యంలో రూపొందిన గుడ్ ల‌క్ స‌ఖి సినిమాలో కీర్తి సురేశ్ మెయిన్ రోల్‌లో న‌టిస్తోంది. ఆది పినిశెట్టి, జ‌గ‌పతి బాబు కీల‌క పాత్ర‌ల్లో న‌టిస్తున్నారు. న‌గేశ్ కుకునూరు ఈ సినిమాకు ద‌ర్శ‌కుడు. ఇందులో కీర్తి సురేశ్ ప‌క్కా ప‌ల్లెటూరి అమ్మాయిగా న‌టించింది. ఇప్ప‌టికే విడుద‌లైన సినిమా ట్రైల‌ర్ ఆక‌ట్టుకుంటుంది. యూట్యూబ్‌లో మిలియ‌న్ వ్యూస్‌ను ద‌క్కించుకుంది. ఈ ట్రైల‌ర్ విడుద‌లైన త‌ర్వాత సినిమాపై అంచ‌నాలు కూడా పెరిగిపోయాయి. ఈ క్ర‌మంలో సినిమాపై అంచ‌నాల‌ను మ‌రింత పెంచేందుకు మెగాస్టార్ చిరంజీవిని ప్రీరిలీజ్ ఈవెంట్‌కు పిల‌వాల‌ని ద‌ర్శ‌క‌నిర్మాత‌లు భావించారు. ఇదే విష‌యం చెబితే చిరంజీవి కూడా ఓకే చెప్పేశాడు.

చిరంజీవి త‌దుప‌రి చిత్రం భోళా శంక‌ర్‌లో ఆయ‌న చెల్లెలుగా కీర్తి సురేశ్ న‌టిస్తుంది. దీంతో కీర్తి సురేశ్ కోసం అని మ‌రో ఆలోచ‌న చేయ‌కుండా ఈవెంట్‌కు వ‌స్తాన‌ని మాటిచ్చాడు. కానీ చివ‌రి నిమిషంలో మెగాస్టార్ క‌రోనా బారిన ప‌డ్డాడు. ఇవాళ సాయంత్రం ఈవెంట్ ఉంద‌న‌గా.. ఉద‌య‌మే క‌రోనా సోకిన‌ట్లు తెలిసింది. ప్ర‌స్తుతం స్వ‌ల్ప ల‌క్ష‌ణాలే ఉండ‌టంతో హోం క్వారంటైన్‌లోనే ఉండిపోయాడు చిరంజీవి. దీంతో గుడ్ ల‌క్ స‌ఖి చిత్ర బృందం అంచ‌నాలు అన్నీ త‌ల‌కిందుల‌య్యాయి. చీఫ్ గెస్ట్ లేకుండా ఈవెంట్ ఎలా అని అయోమ‌యంలో ప‌డిపోయారు. దీంతో త‌న‌కు బ‌దులు త‌న కొడుకుని చీఫ్ గెస్ట్‌గా పంపిస్తున్నాడు మెగాస్టార్ చిరంజీవి. ఇప్పుడు గుడ్ ల‌క్ స‌ఖి ప్రీ రిలీజ్ ఈవెంట్‌కు రామ్ చ‌ర‌ణ్ ముఖ్య అతిథిగా రాబోతున్నాడు. ఈ మేర‌కు చిత్ర బృందం కూడా అధికారికంగా పోస్ట‌ర్ రిలీజ్ చేసింది.