భీమ్లా నాయక్‌లో కోతలు భారీగా ఉండబోతున్నాయా.. రన్ టైమ్ అంత త‌క్కువ‌!!

January 26, 2022 / 10:25 AM IST

Bheemla Nayak Run Time | కొన్నిసార్లు రీమేక్ సినిమాల విషయంలో ఉన్నదున్నట్లు తీస్తారు. మరికొన్ని మాత్రం మన ప్రేక్షకుల అభిరుచికి తగ్గట్టుగా మార్పులు చేర్పులు చేసి తీస్తారు. రాక్షసుడు, దృశ్యం, నారప్ప లాంటి సినిమాలను ఉన్నదున్నట్లు తీస్తేనే బాగుంటుంది. అందులో ఏ మాత్రం మార్పులు చేసినా ఫలితం తేడా కొడుతుంది. కానీ గబ్బర్‌సింగ్‌ లాంటి సినిమాలకు మాత్రం ఇది వర్తించదు. కేవలం లైన్ తీసుకుని మన ప్రేక్షకులకు తగ్గట్లు మార్పు చేసి తీస్తుంటారు. ఇప్పుడు భీమ్లా నాయక్ సినిమా విషయంలో ఇదే జరుగుతుంది. మలయాళంలో సూపర్ హిట్ అయిన అయ్యప్పనుమ్ కోశీయుమ్ సినిమాకు తెలుగు రీమేక్ పేరుకు రీమేక్ ఇది. అయినా కూడా ఇందులో చాలా వరకు మార్పులు చేర్పులు బాగానే జరిగాయని తెలుస్తోంది.

ముఖ్యంగా త్రివిక్రమ్ వచ్చిన తర్వాత భీమ్లా నాయ‌క్ సినిమా స్క్రిప్టు మొత్తం మారిపోయింది. పవన్ కళ్యాణ్ ఉన్నాడు కాబట్టి ఆయన ఇమేజ్ కోసం కథను కాస్త మార్చేశారని.. ఒరిజినల్ వర్షన్ చూసిన వాళ్లకు కూడా తెలుగు సినిమా కొత్తగా ఉంటుందని తెలుస్తోంది. మలయాళంలో లేని కొన్ని సన్నివేశాలు తెలుగులో అదనంగా యాడ్ చేస్తున్నారు. అలాగే అక్కడ భారంగా అనిపించిన కొన్ని సన్నివేశాలు తెలుగులో తొలగిస్తున్నారు. ఇప్పుడు మరో సంచలన విషయం కూడా బయటికి వచ్చింది. ఒరిజినల్ సినిమా నిడివి దాదాపు రెండు గంటల 40 నిమిషాలు ఉంటుంది. కానీ తెలుగు వెర్షన్ మాత్రం కేవలం 2 గంటల 12 నిమిషాల తోనే వస్తుందని తెలుస్తోంది. ఈ లెక్కన దారుణంగా కోతలు విధించాడు మాటల మాంత్రికుడు త్రివిక్రమ్. ఏ మాత్రం బోర్ కొట్టకుండా క్రిస్పీ స్క్రీన్ ప్లే ఈ సినిమాకు రాసేశాడు అని అర్థమవుతుంది. సినిమా అంతా చకచకా అయిపోతుందని ఫస్టాఫ్ కేవలం గంట సేపు మాత్రమే ఉంటుందని తెలుస్తోంది.

పవన్ కళ్యాణ్ లాంటి స్టార్ హీరో ఉన్న సినిమాకు ఇంత తక్కువ నిడివి ఉండటం ఒక రకంగా ఆశ్చర్యం కలిగించే విషయమే. కానీ ఈ సినిమా ఫైనల్ స్క్రిప్ట్ చూసుకున్న తర్వాత ఇంత నిడివి ఉంటే బాగుంటుందని త్రివిక్రమ్ తన టీమ్ డిసైడ్ చేయడంతో అదే మాట మీద వెళ్లిపోయారు. సినిమా ఫిబ్రవరి 25న శివరాత్రి కానుకగా విడుదల కానుంది. సితార ఎంటర్టైన్‌మెంట్ బ్యాన‌ర్‌పై సూర్యదేవర నాగవంశీ ఈ సినిమాను నిర్మిస్తున్నాడు.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి