నాన్న కోసం మరో రీమేక్‌

‘నేను ‘గాడ్‌ ఫాదర్‌' సినిమా చేసేందుకు రామ్‌ చరణ్‌ కారణం. సినిమా చూసి.. నాన్నా ఈ సబ్జెక్ట్‌ మీకు బాగుంటుంది అని చెప్పి ఒప్పించాడు, దర్శకుడిని కూడా తనే సెలెక్ట్‌ చేశాడు’ అని ఇటీవల సినిమా ప్రచార కార్యక్రమాల్లో అగ్ర హీరో చిరంజీవి చెప్పారు.

‘నేను ‘గాడ్‌ ఫాదర్‌’ సినిమా చేసేందుకు రామ్‌ చరణ్‌ కారణం. సినిమా చూసి.. నాన్నా ఈ సబ్జెక్ట్‌ మీకు బాగుంటుంది అని చెప్పి ఒప్పించాడు, దర్శకుడిని కూడా తనే సెలెక్ట్‌ చేశాడు’ అని ఇటీవల సినిమా ప్రచార కార్యక్రమాల్లో అగ్ర హీరో చిరంజీవి చెప్పారు. మలయాళ చిత్రం ‘లూసీఫర్‌’ రీమేక్‌గా ‘గాడ్‌ ఫాదర్‌’ తెలుగు తెరపైకి వచ్చింది. ఈ సినిమాకు మంచి స్పందన వస్తున్న నేపథ్యంలో రామ్‌ చరణ్‌ స్క్రిప్ట్‌ జడ్జిమెంట్‌ బాగుందని అంటున్నారు. ఈ క్రమంలో చరణ్‌ మరో మలయాళ రీమేక్‌ హక్కులు తీసుకున్నట్లు వార్తలొస్తున్నాయి.

మమ్ముట్టి హీరోగా నటించిన ‘భీష్మ పర్వం’ ఈ మార్చిలో విడుదలై ఘన విజయాన్ని సాధించింది. గ్యాంగ్‌స్టర్‌ డ్రామాగా దర్శకుడు అమల్‌ నీరాద్‌ ఈ సినిమాను తెరకెక్కించారు. ఈ చిత్రంలోని కథా నేపథ్యం, క్యారెక్టర్‌ డిజైనింగ్‌, డైలాగ్స్‌…ఇలాంటి అంశాలకు మంచి పేరొచ్చింది. చిరంజీవి కోసమే చరణ్‌ ఈ సినిమా కథా హక్కులను తీసుకున్నట్లు సమాచారం. ఈ చిత్రంలో మమ్ముట్టి పోషించిన అంజుట్టి మైఖేల్‌ పాత్ర చిరంజీవికి బాగా సరిపోతుందనేది చరణ్‌ ఆలోచన. ప్రస్తుతం చిరంజీవి పలు చిత్రాల్లో నటిస్తూ తీరిక లేకుండా ఉన్నందువల్ల ఈ ప్రాజెక్ట్‌ రియాల్టిలోకి వచ్చేందుకు కొంత సమయం పట్టేలా ఉంది.