నిరీక్షణకు దక్కిన ఫలితం

ఇరవైఏళ్ల సినీ ప్రయాణంలో ఎన్నో ఒడిదుడుకుల్ని ఎదుర్కొన్నానని చెప్పింది గ్లోబల్‌స్టార్‌ ప్రియాంకచోప్రా. కెరీర్‌ ఆరంభంలో తాను నటించిన చాలా సినిమాలు దారుణమైన పరాజయాల్ని చవిచూశాయని గుర్తుచేసుకుంది. పదేళ్ల సుదీర్ఘ నిరీక్షణ తర్వాత కెరీర్‌ను అనుకున్న విధంగా తీర్చిదిద్దుకున్నానని పేర్కొంది. ఓ అంతర్జాతీయ మ్యాగజైన్‌కు ఇచ్చిన ఇంటర్వ్యూలో ఆమె మాట్లాడుతూ ‘కెరీర్‌ తొలిరోజుల్లో నేను నటించిన కొన్ని సినిమాల్ని ఎవరూ చూసేవారు కాదు. నా పేరు కూడా ఎక్కడా వినిపించలేదు. అయినా నేను ఏనాడు ఆత్మవిశ్వాసాన్ని కోల్పోలేదు. ఆ తర్వాత కమర్షియల్‌గా కొన్ని విజయాలు సాధించిప్పనటికీ మనసుకు నచ్చిన కథల్ని ఎంచుకోలేకపోతున్నాననే అసంతృప్తి ఉండేది. పదేళ్ల నుంచి కెరీర్‌లో గొప్ప మార్పువచ్చింది. కథాంశాలు, పాత్రలపరంగా అనేక ప్రయోగాలు చేసే అవకాశం దక్కింది. హాలీవుడ్‌లో అడుగుపెట్టడం నా జీవితగమనాన్ని మార్చివేసింది. ప్రస్తుతం నేను కోరుకున్న స్థానాన్ని ఆస్వాదిస్తున్నా. అయితే నాకు ప్రత్యేక లక్ష్యాలంటూ ఏమీ లేవు. గమ్యం కంటే జీవిత గమనాన్నే నేను ఎక్కువగా ఇష్టపడతాను’ అని తాత్విక ధోరణిలో చెప్పింది. ప్రస్తుతం ఆమె హాలీవుడ్‌లో మ్యాట్రిక్స్‌-4, టెక్ట్స్‌ ఫర్‌ యూ చిత్రాలతో పాటు ‘సిటాడెల్‌’ పేరుతో ఓ సిరీస్‌లో నటిస్తోంది.