Visit:
ప్రముఖ దర్శకుడు రామ్ గోపాల్ వర్మ (RGV) మరోసారి తన సంచలన వ్యాఖ్యలతో వార్తల్లో నిలిచారు. ఇప్ప‌టికే రాజ‌మౌళి వివాదంపై విమ‌ర్శ‌ల‌కు గ‌ట్టి స‌మాధానమిచ్చిన ఆర్జీవీ తాజాగా ఐబొమ్మ రవి వివాదంపై స్పందించాడు. ముఖ్యంగా సినీ పరిశ్రమను పట్టి పీడిస్తున్న పైరసీ వెబ్‌సైట్స్‌ ఐబొమ్మ (iBomma) వంటి వెబ్‌సైట్‌లకు కారణమైన వ్యక్తులు వారికి మద్దతునిచ్చే ‘రాబిన్ హుడ్’ సిద్ధాంతంపై ఆయన తీవ్రంగా విరుచుకుపడ్డారు. ఈ సంద‌ర్భంగా ఎక్స్ వేదిక‌గా పోస్ట్ పెట్టాడు.
“పైరసీ ఎప్పటికీ ఆగదు. దానికి కారణం సాంకేతిక‌త అభివృద్ధి చెందడమో లేదా పోలీసుల పర్యవేక్షణ బలహీనంగా ఉండటమో కాదు. పైరసీ సినిమా చూడటానికి పెద్ద సంఖ్యలో ప్రజలు ఉన్నంత కాలం, వారికి సేవ చేయడానికి రవి లాంటివారు ఎప్పుడూ పుడుతూనే ఉంటారు” అని వర్మ అన్నారు. ఐబొమ్మ రవిని ‘రాబిన్ హుడ్’తో పోల్చడాన్ని వర్మ ఎగతాళి చేశారు. “ఇప్పుడు నవ్వు తెప్పిస్తున్న విషయం ఏమిటంటే, రవి అభిమానులు అతడిని రాబిన్ హుడ్‌తో పోలుస్తూ, తాము ఏదో నోబెల్ బహుమతి స్థాయి లాజిక్ కనుక్కున్నట్లుగా గర్వపడటం చేస్తుంటే నవ్వు ఆగట్లేదు” అని ఆర్జీవీ విమర్శించారు.
ముందుగా రాబిన్ హుడ్ హీరో కాదు. నేటి నిర్వ‌చ‌నం ప్రకారం అతను ప్రపంచంలోనే మొట్టమొదటి రికార్డ్ చేయబడిన టెర్రరిస్ట్. అతను ధనవంతులపై దాడి చేసి, వారిని చంపి, ఆ సొమ్మును పేదలకు పంచుతాడు. ధనవంతులు కావడమే వారు చేసిన ఏకైక నేరం అవుతుంది. ఆర్థికంగా విజయం సాధించడం, దొంగతనం, హత్యలకు అర్హమైన నేరంగా భావించడం ఎంత విచారకరం? అని వర్మ ప్రశ్నించారు. దొంగిలించబడిన వస్తువులను ఉచితంగా పొందుతున్నారనే ఒకే ఒక్క కారణంతో ఒక నేరస్తుడిని ‘సాధువు’గా భావించడానికి చాలా అమాయకత్వం కావాలని ఆయన అన్నారు.
పైరసీని సమర్థించుకునే వారి “సినిమా టికెట్ ధర ఎక్కువైతే పైరసీ చేయవచ్చు” అనే వాదనను వర్మ ఖండించారు.
సినిమా ఖరీదైందా? అయితే పైరసీ చేయడం త‌ప్పు కాదు.
పాప్‌కార్న్ ధర అధికమా? అయితే సినిమాను లీక్ చేయండి.
టికెట్లు అధిక ధరలో ఉన్నాయా? అయితే కంటెంట్‌ను దొంగిలించండి.
“ఇలాంటి లాజిక్‌ల ప్రకారం చూస్తే.. BMW ఖరీదైందా? అయితే షోరూమ్‌ దోచేసి, స్లమ్‌లో ఉన్నవారికి కార్లు ఉచితంగా పంచేయాలి! జ్యువెలరీ ఖరీదైందా? షాప్ దోచేసి అందరికీ ఉచితంగా పంచేయాలి! అలా అయితే అన్ని వస్తువులకూ ఇదే లాజిక్ వర్తిస్తుంది. ఈ రకమైన ఆలోచనా విధానం సామాజిక పతనానికి, అరాచకానికి దారితీస్తుంది” అని వర్మ తీవ్రంగా హెచ్చరించారు.
ప్రజలు పైరేటెడ్ కంటెంట్ చూసేది ఏదైనా నైతిక విప్లవం కోసం కాదు, కేవలం సౌకర్యం (Convenience) కోసం మాత్రమేనని వర్మ తేల్చి చెప్పారు. డబ్బు ఆదా చేసుకోవడానికి కొందరు, థియేటర్‌కు వెళ్లడం కంటే లింక్‌ను క్లిక్ చేయడం ద్వారా సమయాన్ని ఆదా చేసుకోవడానికి ఇంకొందరు చూస్తారని, సినీ పరిశ్రమలోని తనతో సహా చాలా మంది ఇదే కారణంతో పైరసీ కంటెంట్ చూస్తారని ఆయన అంగీకరించారు. పైరసీని ఆపడానికి ఎవరైనా సీరియస్‌గా ప్రయత్నిస్తే, ఒకే ఒక నిజమైన పరిష్కారం ఉంది. సరఫరా చేసేవారిని (Supplier) నేరస్తులుగా పరిగణించడమే కాకుండా, చూసేవారిని (Viewer) కూడా నేరస్తులుగా పరిగణించాలి. పైరేట్‌ను పట్టుకోవడం కష్టం, కానీ చూసేవారిని పట్టుకోవడం సులభం అని వర్మ సూచించారు. పైరసీ కంటెంట్ చూస్తున్న 100 మందిని యాదృచ్ఛికంగా అరెస్టు చేసి, వారి పేర్లను బహిరంగంగా ప్రకటిస్తే, ప్రతి ఒక్కరూ సినిమా లింక్‌ను చూడటం లేదా ఫార్వర్డ్ చేయడం అనేది దొంగిలించబడిన వస్తువులను అక్రమంగా రవాణా చేయడం లేదా స్వీకరించడం లాంటిదని గుర్తిస్తారు. భయం పని చేస్తుంది. నైతికత కాదు అంటూ రామ్ గోపాల్ వర్మ తన వ్యాఖ్యల‌ను ముగించారు.
ROBIN HOOD RAVI
Piracy will never stop. Not because technology is too advanced or policing too weak , but because as long as there are a large number of people to watch a pirated film there will always be Ravis to serve them.
Now the funniest thing is Ravi supporters proudly…
— Ram Gopal Varma (@RGVzoomin) November 22, 2025
