“సారంగదరియా’ పాట విజయం ఊహించిందే. అయితే ఇంత భారీ స్పందన లభిస్తుందని అనుకోలేదు. లిరికల్ వీడియో వంద మిలియన్ల వ్యూస్ సాధించడం ఆనందంగా ఉంది’ అని అన్నారు దర్శకుడు శేఖర్ కమ్ముల. ఆయన దర్శకత్వం వహిస్తున్న తాజా చిత్రం ‘లవ్స్టోరి’. నాగచైతన్య, సాయిపల్లవి జంటగా నటిస్తున్నారు. నారాయణ్ దాస్ కె నారంగ్, పి.రామ్మోహన్రావు నిర్మిస్తున్నారు. ఈ నెల 16న విడుదలకానుంది. ఈ చిత్రంలోని ‘సారంగదరియా’ పాట యూట్యూబ్లో 32 రోజుల్లోనే వంద మిలియన్ల వ్యూస్ను సాధించింది. ఈ సందర్భంగా శేఖర్ కమ్ముల మాట్లాడుతూ ‘మూడేళ్ల క్రితమే ‘సారంగదరియా’ పాట విన్నా. అవకాశం వచ్చినప్పుడు సినిమాలో ఉపయోగించాలనుకున్నా. సందర్భం, సీన్ కుదరడంతో ‘లవ్స్టోరి’లో ఈ పాటను తీసుకున్నాం. జానపద గీతానికి తనదైన ముద్రతో సుద్దాల అశోక్తేజ అద్భుతంగా సాహిత్యాన్ని అందించారు. కొత్త పదప్రయోగాలు చేశారు. ఫోక్ శైలిని అర్థం చేసుకుంటూ పవన్ చక్కటి బాణీలను సమకూర్చారు. మంగ్లీ పాడిన విధానం, శేఖర్ మాస్టర్ నృత్యాలు చక్కగా కుదిరాయి. ఈ లిరికల్ గీతానికి మించి పదింతల ఆదరణ వీడియో సాంగ్కు వస్తుందని నమ్ముతున్నాం. సినిమా అందరి అంచనాలను అందుకుంటుంది’ అని తెలిపారు.
ఇవి కూడా చదవండి..