Kalyan Krishna | బంగార్రాజు దర్శకుడికి నాగార్జున చివాట్లు.. అసలు కారణం ఇదే..

January 21, 2022 / 11:52 AM IST

Kalyan Krishna | అదేంటి.. హిట్ ఇచ్చిన దర్శకుడిని నాగార్జున ఎందుకు తిడతాడు.. పైగా అక్కినేని హీరోలకు ఒకటి రెండు కాదు ఏకంగా మూడు మంచి సినిమాలు ఇచ్చాడు కళ్యాణ్ కృష్ణ కురసాల. ఆయన కెరీర్‌లో ఉన్న మూడు విజయాలు అక్కినేని హీరోలతో చేసినవే. సోగ్గాడే చిన్నినాయన సినిమాతో దర్శకుడిగా మారిన ఈయన.. రారండోయ్ వేడుక చూద్దాం, మొన్న బంగార్రాజు సినిమాలతో మంచి విజయాలు అందుకున్నాడు. మధ్యలో రవితేజతో చేసిన నేల టిక్కెట్టు మాత్రమే అంచనాలను అందుకోలేకపోయింది. ఇదిలా ఉంటే తాజాగా బంగార్రాజు సినిమా ప్రమోషన్స్ తో బిజీగా ఉన్న కళ్యాణ్ కృష్ణ ఒక షాకింగ్ విషయాన్ని మీడియా ముందు చెప్పాడు.

తనను నాగార్జున ఒక సందర్భంలో పిలిచి చివాట్లు పెట్టాడు అని.. అది తాను ఎప్పటికీ మర్చిపోలేను అంటున్నాడు కళ్యాణ్. సోగ్గాడే చిన్నినాయన సినిమా పూర్తయిన తర్వాత అన్నపూర్ణ స్టూడియోస్ లోనే నాగ చైతన్యతో రారండోయ్ వేడుక చూద్దాం సినిమా చేశాడు కళ్యాణ్. ఇది కూడా సూపర్ హిట్ అయింది. అయితే ఆ సమయంలో అనుకున్న దానికంటే షూటింగ్ కాస్త లేట్ అయింది. అలా ఎందుకు జరిగింది అని నాగార్జున పిలిచి అడిగినప్పుడు.. కొందరి తప్పులు తాను కవర్ చేయాలని చూడటంతో తిట్టేశాడని చెప్పుకొచ్చాడు కళ్యాణ్ కృష్ణ.

వాళ్లు చేసిన తప్పులు నువ్వు ఎందుకు కవర్ చేస్తున్నావ్.. అలా చేస్తే సినిమాపై ప్రభావం పడుతుంది.. ఆలస్యమవుతుంది కదా ఇంకెప్పుడూ ఇలా చేయకు అంటూ సీరియస్ గా తనకు చెప్పాడని.. అప్ప‌టినుంచి ఇంకొకరి తప్పులు కవర్ చేయడానికి తాను ఎప్పుడూ చూడలేదు అంటున్నాడు కళ్యాణ్ కృష్ణ కురసాల. ఇక బంగార్రాజు సినిమా గురించి మాట్లాడుతూ ముందు నుంచి ఇది పండగ బరిలో దింపాలని అనుకున్నట్లు చెప్పాడు కళ్యాణ్. తమ నమ్మకం నిలబెడుతూ ప్రేక్షకులు సినిమాకు అద్భుతమైన విజయం అందించారు అని ఆయన చెప్పాడు. మొదటి వారం బంగార్రాజు 34 కోట్ల షేర్ వసూలు చేసింది.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి