హాట్రిక్ కొట్టిన బేబమ్మ‌.. గోల్డెన్ లెగ్ అయిపోయిన కృతి శెట్టి..

January 17, 2022 / 03:13 PM IST

Krithi Shetty | ఏడాది కింద కృతి శెట్టి అంటే ఎవరికీ పెద్దగా తెలియదు.. కానీ ఇండస్ట్రీలో ఫేమస్ అవ్వడానికి ఒక్క సినిమా చాలు.. అలాంటి ఒక సాలిడ్ సినిమాతో ఇండస్ట్రీకి వచ్చింది కృతి శెట్టి. అదే ఉప్పెన. సాయి ధరమ్ తేజ్‌ తమ్ముడు వైష్ణవ్ తేజ్ హీరోగా పరిచయం అయిన ఈ సినిమా సంచలన విజయం సాధించింది. మొదటి సినిమాతోనే కుర్రాళ్ల‌ గుండెల్లో గుబులు పుట్టించింది బేబమ్మ. ఈ సినిమా తర్వాత ఓవర్ నైట్ స్టార్ అయిపోయింది కృతి శెట్టి. ఒక్కో సినిమాకు కోటి రూపాయల పారితోషికం తీసుకునే వరకు వెళ్లిపోయింది. ప్రస్తుతం ఈ ముద్దుగుమ్మ వరస సినిమాలతో బిజీగా ఉంది. దానికి తోడు వరుస విజయాలు కూడా ఈమె రేంజ్ పెంచేస్తున్నాయి.

ఉప్పెన తర్వాత విడుదలైన శ్యామ్ సింగరాయ్ మంచి విజయం అందుకుంది. నాని హీరోగా నటించిన ఈ సినిమాలో సాయి పల్లవి మరో హీరోయిన్. ఇందులో లిప్ లాక్ సన్నివేశాలతో పాటు బెడ్ రూమ్ సీన్స్ కూడా చేసింది కృతి శెట్టి. ఇక సంక్రాంతికి విడుదలైన బంగార్రాజు సినిమాలో కూడా ఈమె ఒక హీరోయిన్. నాగ చైతన్య జోడీగా ఈమె ఇందులో అల్లరి పాత్రలో ఆకట్టుకుంది. బంగార్రాజు కూడా మంచి విజయం దిశగా అడుగులు వేస్తోంది. దాంతో మొదటి మూడు సినిమాలతో హ్యాట్రిక్ అందుకున్న హీరోయిన్‌గా రికార్డ్ క్రియేట్ చేసింది కృతి శెట్టి.

కృతిశెట్టి గోల్డెన్ లెగ్ ఇప్పుడు మరికొందరు హీరోలకు వరంగా మారనుందా అనేది ఆసక్తికరంగా మారింది. ప్రస్తుతం నితిన్ మాచర్ల నియోజకవర్గం, సుధీర్ బాబు ఆ అమ్మాయి గురించి మీకు చెప్పాలి, రామ్ పోతినేని లింగస్వామి సినిమాలలో నటిస్తుంది. ప్రస్తుతం ఈ ముగ్గురు హీరోలు ఫ్లాపుల్లోనే ఉన్నారు. కృతి శెట్టి అడుగుపెట్టిన తర్వాత వాళ్ల‌ జాతకం మారుతుందేమో చూడాలి..?

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి