Love Insurance Kompany | లవ్ ఇన్సూరెన్స్ కంపెనీ మార్నింగ్ షోస్‌ రద్దు .. ఫ‌స్ట్ షో ఎప్పుడు వేయ‌నున్నారు..!

Love Insurance Kompany | కోలీవుడ్ యువ నటుడు ప్ర‌దీప్ రంగ‌నాథ‌న్, కృతి శెట్టి జంటగా నటించిన ప్రేమకథా చిత్రం ‘లవ్ ఇన్సూరెన్స్ కంపెనీ’ విడుదల రోజే అనుకోని సమస్యలను ఎదుర్కొంది. శుక్రవారం ఉదయం ప్రదర్శనలు ప్రారంభం కావాల్సి ఉండగా, ఒక్కసారిగా పలు నగరాల్లో ప్రదర్శనలు రద్దవడం అభిమానులను తీవ్ర నిరాశకు గురిచేసింది.

Love Insurance Kompany | కోలీవుడ్ యువ నటుడు ప్ర‌దీప్ రంగ‌నాథ‌న్, కృతి శెట్టి జంటగా నటించిన ప్రేమకథా చిత్రం ‘లవ్ ఇన్సూరెన్స్ కంపెనీ’ విడుదల రోజే అనుకోని సమస్యలను ఎదుర్కొంది. శుక్రవారం ఉదయం ప్రదర్శనలు ప్రారంభం కావాల్సి ఉండగా, ఒక్కసారిగా పలు నగరాల్లో ప్రదర్శనలు రద్దవడం అభిమానులను తీవ్ర నిరాశకు గురిచేసింది. ఈ చిత్రం తెలుగు, తమిళ భాషల్లో ఒకేసారి విడుదల కావాల్సి ఉండగా, రెండు ప్రాంతాల్లోనూ ఉదయం ప్రదర్శనలు ఆగిపోయాయి. ముఖ్యంగా ఉదయం 8 గంటలకు ప్రదర్శన మొదలవ్వాల్సి ఉండగా, అది జరగకపోవడంతో థియేటర్లకు వెళ్లిన ప్రేక్షకులు అసంతృప్తి వ్యక్తం చేశారు. ఈ సమస్యకు ప్రధాన కారణం చిత్ర ప్రదర్శనకు అవసరమైన డిజిటల్ అనుమతి సందేశం ఆలస్యంగా చేరడమేనని సమాచారం.

కొన్ని వర్గాలు ఆర్థిక కారణాల వల్ల ఈ ఆలస్యం జరిగిందని ప్రచారం చేసినప్పటికీ, దీనిపై అధికారిక స్పష్టత రాలేదు. అయితే ఉదయం 10 గంటల తర్వాత పరిస్థితి సాధారణమైంది. చెన్నైతో పాటు తెలుగు రాష్ట్రాల్లోని ప్రధాన నగరాల్లో ప్రదర్శనలు ప్రారంభమయ్యాయి. దీంతో అభిమానులు ఊపిరి పీల్చుకున్నారు. ఎలాంటి అపోహలు నమ్మవద్దని, ప్రదర్శనలు జరుగుతున్నాయని సామాజిక మాధ్యమాల్లో పలువురు పేర్కొన్నారు. ఈ చిత్రానికి న‌య‌న‌తార భ‌ర్త విఘ్నేష్ శివ‌న్ దర్శకత్వం వహించారు. ప్రముఖ నటి న‌య‌న‌తార‌తో కలిసి ఆయన నిర్మాణ బాధ్యతలు కూడా చేపట్టారు. ఈ చిత్రంలో ఎస్‌జే సూర్య‌, యోగి బాబు, సీమ‌న్, గౌరీ జీ కిష‌న్ తదితరులు కీలక పాత్రలు పోషించారు.

ఈ సినిమా కథ భవిష్యత్ నేపథ్యంలో రూపొందింది. 2040 సంవత్సరంలో ప్రేమ, సంబంధాలు, జీవన విధానం అన్నీ సాంకేతిక ఆధారంగా మారిన పరిస్థితిని ఈ చిత్రం ప్రతిబింబిస్తుంది. మనుషుల కంటే యంత్రాలపై నమ్మకం పెరిగిన కాలంలో, ఎవరు పెళ్లి చేసుకోవాలో కూడా యాప్‌లు నిర్ణయించే పరిస్థితి ఏర్పడితే ఏమవుతుంది అనే అంశాన్ని ప్రధానంగా చూపించారు. కొత్త కాన్సెప్ట్‌తో తెరకెక్కిన ఈ చిత్రం ప్రేక్షకులను ఎంతవరకు ఆకట్టుకుంటుందో చూడాలి. మొత్తానికి విడుదల రోజే ఇబ్బందులు ఎదుర్కొన్న ‘లవ్ ఇన్సూరెన్స్ కంపెనీ’ చిత్రం తిరిగి ప్రదర్శనలు ప్రారంభమవడంతో పరిస్థితి సర్దుకుంది. ఇప్పుడు ఈ సినిమా ప్రేక్షకుల నుంచి ఎలాంటి స్పందన అందుకుంటుందో అన్నది ఆసక్తికరంగా మారింది.