Photographer Raghu Rai | ఫోటోగ్రఫీ దిగ్గజం రఘు రాయ్ కన్నుమూత.. భారతీయ ఫోటో జర్నలిజంలో ఒక శకం ముగింపు!

Raghu Rai | ప్రపంచ ప్రఖ్యాతి గాంచిన భారతీయ ఫోటోగ్రఫీ దిగ్గజం, ఫోటో జర్నలిజం పితామహుడిగా గుర్తింపు పొందిన పద్మశ్రీ రఘు రాయ్ (83) ఆదివారం తెల్లవారుజామున ఢిల్లీలోని ఒక ప్రైవేట్ ఆసుపత్రిలో కన్నుమూశారు.

Indian Photographer Raghu Rai | ప్రపంచ ప్రఖ్యాతి గాంచిన భారతీయ ఫోటోగ్రఫీ దిగ్గజం, ఫోటో జర్నలిజం పితామహుడిగా గుర్తింపు పొందిన పద్మశ్రీ రఘు రాయ్ (83) ఆదివారం తెల్లవారుజామున ఢిల్లీలోని ఒక ప్రైవేట్ ఆసుపత్రిలో కన్నుమూశారు. గత కొంతకాలంగా క్యాన్సర్‌తో పోరాడుతున్న ఆయన ఆదివారం తుది శ్వాస విడిచారు. 1942లో ఉమ్మడి పంజాబ్‌లో జన్మించిన రఘు రాయ్, సివిల్ ఇంజనీరింగ్ చదివినప్పటికీ ఫోటోగ్రఫీపై ఉన్న మక్కువతో ఆ రంగంలోకి అడుగుపెట్టి భారతీయ చిత్రకళా చరిత్రలో ఒక సుదీర్ఘ శకాన్ని లిఖించారు. ముఖ్యంగా 1984 భోపాల్ గ్యాస్ దురంతం సమయంలో ఆయన తీసిన చిత్రాలు ప్రపంచాన్ని కుదిపేయడమే కాకుండా, బాధితుల దీనస్థితిని అంతర్జాతీయ వేదికలపై చాటిచెప్పాయి.

మదర్ థెరిసా, ఇందిరా గాంధీ, దలైలామా వంటి మహోన్నత వ్యక్తుల జీవితాలను తన లెన్స్ ద్వారా అద్భుతంగా బంధించిన ఆయన, ప్రపంచ ప్రఖ్యాత ‘మెగ్నమ్ ఫోటోస్’ ఏజెన్సీకి ఎంపికైన అతికొద్ది మంది భారతీయుల్లో ఒకరిగా నిలిచారు. 1972లో బంగ్లాదేశ్ యుద్ధ సమయంలో ఆయన అందించిన విశిష్ట సేవలకు గాను భారత ప్రభుత్వం ‘పద్మశ్రీ’ పురస్కారంతో గౌరవించింది. సుమారు 50కి పైగా ఫోటో పుస్తకాలను వెలువరించిన రఘు రాయ్, తన కెమెరా కేవలం బొమ్మలను మాత్రమే కాకుండా భారతదేశ ఆత్మను స్పృశిస్తుందని బలంగా నమ్మేవారు. ఆయన మృతి పట్ల ప్రధాని మోదీ సహా పలువురు ప్రముఖులు సంతాపం వ్యక్తం చేయగా, ఆదివారం సాయంత్రం ఢిల్లీలోని లోధి శ్మశాన వాటికలో ఆయన అంతిమ సంస్కారాలు నిర్వహించనున్నట్లు కుటుంబ సభ్యులు ప్రకటించారు.