Balagam | ఉత్తమ చిత్రంగా బలగం.. సినీ చరిత్రలోనే మైలురాయి: కేటీఆర్‌

Balagam | సినీ చరిత్రలోనే ‘బలగం’ సినిమా మైలురాయిగా నిలిచి, మూడు ఫిలింఫేర్‌ అవార్డులను గెలుచుకోవడం పట్ల బీఆర్‌ఎస్‌ వర్కింగ్‌ ప్రెసిడెంట్‌ కే తారకరామారావు హర్షం వ్యక్తంచేశారు.

• సినిమాకు 3 క్యాటగిరీల్లో ఫిల్మ్‌ఫేర్‌ అవార్డులు
• సినీ చరిత్రలోనే బలగం ఓ మైలురాయి: కేటీఆర్‌
• బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌
• బలగం డైరక్టర్‌ వేణుకు అభినందన
• బలగంకు మొదటి నుంచీ అండగా కేటీఆర్‌
• సినిమా షూటింగ్‌ అంతా సిరిసిల్లలోనే

Balagam | హైదరాబాద్‌, ఆగస్టు 4 (నమస్తే తెలంగాణ): సినీ చరిత్రలోనే ‘బలగం’ సినిమా మైలురాయిగా నిలిచి, మూడు ఫిలింఫేర్‌ అవార్డులను గెలుచుకోవడం పట్ల బీఆర్‌ఎస్‌ వర్కింగ్‌ ప్రెసిడెంట్‌ కే తారకరామారావు హర్షం వ్యక్తంచేశారు. బలగం సినిమాకు ఉత్తమ చిత్రం, ఉత్తమ దర్శకుడు, ఉత్తమ సహాయ నటి అవార్డులు లభించిన నేపథ్యంలో ఈ సినిమా డైరెక్టర్‌ వేణు యెల్దండితోపాటు సినీ యూనిట్‌కు అభినందనలు తెలియజేశారు. తాను ప్రాతినిధ్యం వహిస్తున్న సిరిసిల్ల నియోజకవర్గంలోని నేత కార్మిక కుటుంబానికి చెందిన వేణు యెల్దండి కష్టపడి ఎదిగి ‘బలంగం’ అనే గొప్ప సినిమాను తీశారని కొనియాడారు.

రాజన్న-సిరిసిల్ల జిల్లాలో ఈ సినిమా తీసిన విషయాన్ని కేటీఆర్‌ గుర్తు చేశారు. వేణుతోపాటు అతని టీం కష్టానికి దకిన ఫలితం ఈ ఫిలింఫేర్‌ అవార్డులని అభివర్ణించారు. తెలంగాణ సంస్కృతిలో భాగమైన ‘పిట్ట ముట్టుడు’ ఇతివృత్తంతో తీసిన ‘బలగం’ సినిమా కొట్లాది తెలుగు ప్రేక్షకుల మనస్సులను దోచింది. చిన్న బడ్జెట్‌తో తీసిన బలగం సినిమా రూ.40 కోట్లకుపైగా వసూళ్లు రాబట్టి రికార్డు సృష్టించడమే కాకుండా రాష్ట్రవ్యాప్తంగా ప్రతి గ్రామంలో భారీస్రీన్లు పెట్టి ఈ సినిమాను ప్రదర్శించిన విషయాన్ని కేటీఆర్‌ గుర్తుచేశారు. గ్రామ చావడి వద్ద గ్రామస్థులంతా కలిసి కొన్ని ఏండ్ల తర్వాత చూసిన సినిమా ‘బలగం’ అని పేర్కొన్నారు.

వేణుకు మొదటి నుంచీ కేటీఆర్‌ అండ

‘బలగం’ సినిమా ఎకడో తీయడం ఎందుకు రాజన్న-సిరిసిల్ల జిల్లాలో అద్భుతమైన లోకేషన్లు ఉన్నాయి. మన దగ్గరే తీయండి. అన్ని విధాల సహకరిస్తా’ అని చిత్ర దర్శకుడు వేణుకు కేటీఆర్‌ అభయం ఇచ్చారు. టెసాబ్‌ చైర్మన్‌ కొండూరి రవీందర్‌కు ఈ సినిమా నిర్మాత దిల్‌రాజు కూడా సన్నిహితుడు కావడంతో సిరిసిల్లలో ఈ సినిమా మొత్తం షూట్‌ చేశారు. కోనసీమను తలపించే పచ్చని పొలాలు.. మెట్టప్రాంతమైన సిరిసిల్లలో కూడా ఉన్నాయా? అని ఆశ్చర్యపోయిన ప్రేక్షకులు అప్పట్లో కాళేశ్వరం జలాల గొప్పతనాన్ని చర్చించుకున్నారు.

సినీ షూటింగ్‌ మాత్రమే కాకుండా కేటీఆర్‌ సూచన మేరకు ప్రీరిలీజ్‌ ఈవెంట్‌ను కూడా సిరిసిల్లలోనే నిర్వహించడం విశేషం. ఒక సినిమా ఫంక్షన్‌ చిన్న జిల్లా కేంద్రంలో నిర్వహించడం తెలుగు సినీచరిత్రలోనే ఇదే మొదటిదని చెప్తున్నారు. మంత్రిగా బిజీ షెడ్యూల్‌ ఉన్నప్పటికీ, నాడు కేటీఆర్‌ ప్రీరిలీజ్‌ ఈవెంట్‌కు హాజరై శుభాకాంక్షలు తెలియజేయడం మరో విశేషం. మరోవైపు నాడు అసెంబ్లీ సాక్షిగా ‘బలగం’ సినిమా విశేషాలను కేటీఆర్‌ ఉదహరించిన సందర్భాలున్నాయి.

ఇది తెలంగాణకే గర్వకారణం

సౌతిండియన్‌ ఫిల్మ్‌ఫేర్‌ అవార్డ్స్‌లో ‘బలగం’ ఉత్తమ చిత్రంగా నిలవడంతోపాటు పలు విభాగాల్లో అవార్డులు గెలుచుకోవడం పట్ల తెలంగాణ రాష్ట్ర చలనచిత్ర, టీవీ, థియేటర్స్‌ అభివృద్ధి సంస్థ మాజీ ఛైర్మన్‌ అనిల్‌ కుర్మాచలం ఆనందం వ్యక్తం చేశారు. ఈ సందర్భంగా చిత్రయూనిట్‌కి ఆయన శుభాకాంక్షలు అందించారు.

69 శోభ ఫిల్మ్‌ఫేర్‌ అవార్డ్స్‌ సౌత్‌ 2024 తెలుగు విజేతలు

• ఉత్తమ చిత్రం – బలగం
• ఉత్తమ నటుడు – నాని
• ఉత్తమ నటి – కీర్తి సురేశ్‌
• ఉత్తమ దర్శకుడు – వేణు యెల్దండి
• ఉత్తమ పరిచయ దర్శకుడు – శ్రీకాంత్‌ ఓదెల (దసరా), శౌర్యువ్‌ (హాయ్‌ నాన్న)
• ఉత్తమ చిత్రం (క్రిటిక్స్‌) – బేబీ (దర్శకుడు సాయిరాజేశ్‌)
• ఉత్తమ నటుడు (క్రిటిక్స్‌) – నవీన్‌ పోలిశెట్టి (మిస్‌ శెట్టి-మిస్టర్‌ పోలిశెట్టి), ప్రకాశ్‌రాజ్‌ (రంగమార్తాండ)
• ఉత్తమ సహాయ నటుడు – రవితేజ (వాల్తేరు వీరయ్య), బ్రహ్మానందం (రంగమార్తాండ)
• ఉత్తమ సహాయనటి – రూప లక్ష్మీ (బలగం)
• ఉత్తమ గాయకుడు – శ్రీరామచంద్ర (‘బేబీ’ సినిమాలోని ‘ఓ రెండు ప్రేమ మేఘాలిలా..’ సాంగ్‌)
• ఉత్తమ గాయని – శ్వేతా మోహన్‌ ( ‘సార్‌’ సినిమాలోని ‘మాస్టారు.. మాస్టారూ.. సాంగ్‌)
• ఉత్తమ గేయ రచయిత – అనంతశ్రీరామ్‌ (‘బేబీ’ సినిమాలోని ‘ఓ రెండు ప్రేమ మేఘాలిలా..’ సాంగ్‌)
• ఉత్తమ సంగీతం – విజయ్‌ బుల్గానిన్‌ (బేబీ)
• ఉత్తమ సినిమాటోగ్రఫీ – సత్యన్‌ సూరన్‌ (దసరా)
• ఉత్తమ ప్రొడక్షన్‌ డిజైనర్‌ – కొల్లా అవినాష్‌ (దసరా)
• ఉత్తమ కొరియోగ్రఫీ – ప్రేమ్‌ రక్షిత్‌ (ధూమ్‌ ధామ్‌ దోస్తానా.. సాంగ్‌ (దసరా)