Kamal meets CM Vijay | సీఎం విజయ్‌తో నటుడు కమల్ హాసన్ భేటీ.. తమిళ చిత్ర పరిశ్రమ సమస్యలపై కీలక చర్చ

CM Vijay | తమిళనాడు నూతన ముఖ్యమంత్రి విజయ్‌(TN Chief Minister)తో మక్కల్ నీది మయ్యం అధినేత, నటుడు కమల్ హాసన్ (Kamal Hasan) మర్యాదపూర్వకంగా భేటీ అయ్యారు.

CM Vijay | తమిళనాడు నూతన ముఖ్యమంత్రి విజయ్‌(TN Chief Minister)తో మక్కల్ నీది మయ్యం అధినేత, నటుడు కమల్ హాసన్ (Kamal Hasan) మర్యాదపూర్వకంగా భేటీ అయ్యారు. మే 10న విజయ్ ముఖ్యమంత్రిగా ప్రమాణ స్వీకారం చేసిన కొద్ది రోజులకే ఈ సమావేశం జరగడం ప్రాధాన్యత సంతరించుకుంది. ఈ సందర్భంగా తమిళ చిత్ర పరిశ్రమ ఎదుర్కొంటున్న వివిధ సమస్యలు, సవాళ్లను సీఎం విజయ్ దృష్టికి తీసుకెళ్లినట్లు కమల్ హాసన్ సోషల్ మీడియా ద్వారా వెల్లడించారు. ప్రస్తుతం కోలీవుడ్ తీవ్ర ఒడిదొడుకులను ఎదుర్కొంటోందని, పరిశ్రమ నిలదొక్కుకోవడానికి ప్రభుత్వ మద్దతు, ప్రోత్సాహం ఎంతో అవసరమని ఆయన పేర్కొన్నారు. ఇందులో భాగంగానే తమిళ చిత్ర పరిశ్రమ సంక్షేమానికి సంబంధించి ఆరు కీలక డిమాండ్లతో కూడిన వినతిపత్రాన్ని ముఖ్యమంత్రికి సమర్పించినట్లు కమల్ హాసన్ తెలిపారు. అయితే ఆ ఆరు డిమాండ్లకు సంబంధించిన పూర్తి వివరాలను ఆయన బహిరంగంగా వెల్లడించనప్పటికీ, థియేటర్ల నిర్వహణ భారం మరియు చలనచిత్ర వ్యాపారంలో నిర్మాతలు ఎదుర్కొంటున్న క్లిష్ట పరిస్థితులపై ఈ ప్రతిపాదనలు ఉన్నట్లు పరిశ్రమ వర్గాల్లో చర్చ నడుస్తోంది.

ఈ భేటీ అనంతరం ముఖ్యమంత్రి విజయ్ వైఖరిని కమల్ హాసన్ ఎంతగానో అభినందించారు. సమావేశంలో విజయ్ ఎంతో వినమ్రంగా, ఆప్యాయంగా ప్రవర్తించారని, తమిళనాడు అభివృద్ధికి సంబంధించిన తన ప్రణాళికలను ఎంతో ఉత్సాహంగా పంచుకున్నారని కమల్ తెలిపారు. విజయ్‌ను కేవలం ఒక సినిమా స్టార్‌గా మాత్రమే చూడకూడదని, ముఖ్యమంత్రిగా ఆయనపై మరిన్ని బాధ్యతలు ఉన్నాయని ఆయన పేర్కొన్నారు. సినీ పరిశ్రమకు చెందిన వ్యక్తి రాష్ట్రానికి ముఖ్యమంత్రి కావడం తమిళ చిత్ర పరిశ్రమకే గర్వకారణమని హర్షం వ్యక్తం చేశారు. అంతకుముందు తమిళనాడులో దేవాలయాలు, పాఠశాలలు, కళాశాలలు మరియు బస్ స్టాండ్ల సమీపంలో ఉన్న 717 ప్రభుత్వ మద్యం దుకాణాలను మూసివేయాలని సీఎం విజయ్ ప్రభుత్వం తీసుకున్న నిర్ణయాన్ని కమల్ హాసన్ బహిరంగంగా స్వాగతించారు. ఈ నిర్ణయం ఎంతో అభినందనీయమని కొనియాడిన ఆయన, భవిష్యత్తులోనూ ఇలాంటి దుకాణాల సంఖ్యను మరింతగా తగ్గించాలని కోరారు. తమిళనాడులో ఇటీవల జరిగిన అసెంబ్లీ ఎన్నికల్లో విజయ్ నేతృత్వంలోని టీవీకే (TVK) పార్టీ సంకీర్ణ కూటమి ద్వారా మెజారిటీ సాధించి ప్రభుత్వం ఏర్పాటు చేయడం అక్కడ ఒక పెద్ద రాజకీయ మార్పుకు దారితీసింది.

மாண்புமிகு தமிழ்நாடு முதலமைச்சர், தம்பி விஜய் @TVKVijayHQ அவர்களை இன்று நேரில் சந்தித்து வாழ்த்துகளைத் தெரிவித்தேன்.

தமிழ்நாட்டை மேம்படுத்தும் பல கனவுகளை உற்சாகத்துடன் பகிர்ந்துகொண்டார். சந்திப்பின்போது அவர் காட்டிய பண்பும் அன்பும் நெகிழ்ச்சியளித்தது.

பல்வேறு இடையூறுகளைச்… pic.twitter.com/timwTZeEdY

— Kamal Haasan (@ikamalhaasan) May 16, 2026