Kenishaa Francis | జయం రవితో కెనీషా బ్రేకప్?.. సోష‌ల్ మీడియాకు గుడ్‌బై చెబుతూ పాప్ సింగర్ ఎమోషనల్ పోస్ట్

Kenishaa Francis | తమిళ స్టార్ హీరో జయం రవి, పాప్ సింగర్ కెనీషా ఫ్రాన్సిస్ మధ్య ఉన్న రిలేషన్‌షిప్‌కు ముగింపు పడినట్లు తెలుస్తుంది.

Jayam Ravi | తమిళ స్టార్ హీరో జయం రవి, పాప్ సింగర్ కెనీషా ఫ్రాన్సిస్ మధ్య ఉన్న రిలేషన్‌షిప్‌ ముగింపు పడినట్లు తెలుస్తుంది. జయం రవి తన భార్య ఆర్తితో విడాకులు ప్రకటిస్తున్నట్లు పేర్కొన్నప్పటి నుంచి, ఈ విడాకులకు కెనీషానే కారణమంటూ సోషల్ మీడియాలో విపరీతమైన ట్రోలింగ్, ఆరోపణలు వెల్లువెత్తిన సంగ‌తి తెలిసిందే. గతంలో జయం రవి భార్య ఆర్తి కూడా తన విడాకుల వ్యవహారంలో మూడో వ్యక్తి ప్రమేయం ఉందంటూ పరోక్షంగా కెనీషాపై ఆరోపణలు చేయడంతో వివాదం మరింత ముదిరింది. ఈ నేపథ్యంలోనే కెనీషాకు సోషల్ మీడియాలో తీవ్రమైన వేధింపులు, చంపేస్తామనే హత్యా బెదిరింపులు కూడా వచ్చాయి.

అయితే, ఈ వివాదాలపై తాజాగా కెనీషా ఇన్‌స్టాగ్రామ్ వేదికగా ఒక సుదీర్ఘమైన ఎమోషనల్ పోస్ట్ పెడుతూ, తాను ఈ వ్యవహారం నుంచి పూర్తిగా తప్పుకుంటున్నట్లు ప్రకటించారు. ఈ వివాదాలు, ట్రోలింగ్స్ వల్ల తీవ్ర మనస్తాపానికి గురయ్యానని, అందుకే చెన్నై నగరాన్ని సైతం వదిలి వెళ్లిపోతున్నట్లు ఆమె తెలిపారు. సినిమా పరిశ్రమకు, జయం రవిని సమర్థించే వారికి స్పందిస్తూ.. అతడు (రవి మోహన్) ఇక పూర్తిగా మీవాడేనని, దీనిపై తాను ఎలాంటి వివరణలు ఇవ్వలేనని, ఇకపై ఎలాంటి యుద్ధాలు చేయలేనని పేర్కొన్నారు. ఒక మంచి వ్యక్తికి అండగా నిలబడాలని అనుకోవడం తన అమాయకత్వమని, కానీ ఈ ప్రపంచం కేవలం అబద్ధాల కోరులతో నిండిపోయిందని ఆమె ఆవేదన వ్యక్తం చేశారు. ఈ మానసిక ఒత్తిడిని తట్టుకోలేక ఇప్పటివరకు తాను తీసుకున్న బాధ్యతలన్నింటి నుండి వైదొలుగుతున్నానని, తనకెంతో ఇష్టమైన సంగీతాన్ని కూడా వదులుకుంటున్నట్లు చెప్తూ.. తన ఇన్‌స్టాగ్రామ్ అకౌంట్‌ను కూడా డిలీట్ చేస్తున్నట్లు ప్రకటించింది.