ఇప్పటికీ ఆ పేర్లతోనే పిలుస్తారు!

ఒకప్పుడు తెలుగు తెరపై యువతరం కలల రాణిగా భాసిల్లింది జెనీలియా. చూడముచ్చటైన అందంతో కాస్త అమాయకత్వం, చలాకీతనం కలబోసిన పాత్రల ద్వారా ఫ్యామిలీ ఆడియెన్స్‌కు బాగా చేరువైంది. ముఖ్యంగా ‘బొమ్మరిల్లు’లో ఆమె పోషించిన హాసిని పాత్ర అందరికి గుర్తుండిపోయింది. వివాహానంతరం సెలెక్టివ్‌గా సినిమాలు చేస్తున్న జెనీలియా..

ఒకప్పుడు తెలుగు తెరపై యువతరం కలల రాణిగా భాసిల్లింది జెనీలియా. చూడముచ్చటైన అందంతో కాస్త అమాయకత్వం, చలాకీతనం కలబోసిన పాత్రల ద్వారా ఫ్యామిలీ ఆడియెన్స్‌కు బాగా చేరువైంది. ముఖ్యంగా ‘బొమ్మరిల్లు’లో ఆమె పోషించిన హాసిని పాత్ర అందరికి గుర్తుండిపోయింది. వివాహానంతరం సెలెక్టివ్‌గా సినిమాలు చేస్తున్న జెనీలియా.. దాదాపు 13ఏళ్ల విరామం తర్వాత దక్షిణాదిలో రీఎంట్రీ ఇస్తూ నటించిన చిత్రం ‘జూనియర్‌’. కిరీటి రెడ్డి హీరోగా పరిచయమవుతున్న ఈ చిత్రానికి రాధాకృష్ణ దర్శకుడు. ఈ నెల 18న విడుదలకానుంది. ఈ సినిమాలో జెనీలియా కీలక పాత్రలో నటించింది. ఈ సందర్భంగా మంగళవారం ఆమె విలేకరులతో ముచ్చటిస్తూ పంచుకున్న విశేషాలు..

• మూడేళ్ల క్రితం ఈ కథ నా దగ్గరకు వచ్చింది. తొలుత చేయాలా? వద్దా? అనుకున్నా. నా భర్త రితేష్‌దేశ్‌ముఖ్‌కు కూడా కథ బాగా నచ్చింది. ఆయన సినిమా చేయమని సలహా ఇచ్చారు. అదే సమయంలో దర్శకుడి స్టోరీ నరేషన్‌ కూడా ఇంప్రెస్‌ చేయడంతో సినిమాకు గ్రీన్‌సిగ్నల్‌ ఇచ్చాను.
• ఈ సినిమాలో నేను స్వతంత్ర వ్యక్తిత్వం కలిగిన లేడీ బాస్‌ పాత్రలో కనిపిస్తా. కథాగమనంలో నా పాత్ర చాలా కీలకంగా ఉంటుంది. నా క్యారెక్టర్‌ కాస్త సీరియస్‌గా కనిపించినా..బలమైన భావోద్వేగాలతో సాగుతుంది.
• కెరీర్‌ అద్భుతమైన దశలో ఉన్నప్పుడే తెలుగు ఇండస్ట్రీ నుంచి తప్పుకొని వివాహబంధంలోకి అడుగుపెట్టా. జీవితమంటే అన్నింటిని బ్యాలెన్స్‌ చేయాల్సిందే. పెళ్లి తర్వాత పదేళ్లు నా పిల్లల ఆలనాపాలనా చూసుకున్నా. ‘బొమ్మరిల్లు’లో హాసిని, ‘హ్యాపీ’లో మధుమతి పాత్రలు మెమొరబుల్‌గా మిగిలిపోయాయి. ఇప్పటికీ ప్రేక్షకులు నన్ను ఆ పేర్లతోనే పిలుస్తుంటారు. ఓ నటికి అంతకుమించిన ఆనందం ఏముంటుంది?
• రామ్‌చరణ్‌, ఎన్టీఆర్‌, అల్లు అర్జున్‌ ఇప్పుడు పాన్‌ ఇండియా స్టార్స్‌గా ఎదగడం చాలా ఆనందంగా ఉంది. ‘ఆర్‌ఆర్‌ఆర్‌’ సినిమాలో రామ్‌చరణ్‌, ఎన్టీఆర్‌ను చూస్తుంటే వారిద్దరితో కలిసి నటించిన రోజులు గుర్తొచ్చాయి. మంచి క్యారెక్టర్‌ వస్తే తెలుగులో నటించడానికి సిద్ధంగా ఉన్నా. పది నిమిషాల పాత్ర అయినా చాలా ప్రభావవంతంగా ఉండాలన్నది నా అభిమతం.