తండ్రీకూతురు అనుబంధానికి దర్పణం

“హాయ్‌ నాన్న’ క్లీన్‌ ఫ్యామిలీ ఎంటర్‌టైనర్‌. ఎలాంటి హింస, డబుల్‌ మీనింగ్‌ డైలాగ్స్‌ ఉండవు. తండ్రీకూతురు అనుబంధానికి దర్పణంలా నిలుస్తుంది’ అన్నారు దర్శకుడు శౌర్యువ్‌.

“హాయ్‌ నాన్న’ క్లీన్‌ ఫ్యామిలీ ఎంటర్‌టైనర్‌. ఎలాంటి హింస, డబుల్‌ మీనింగ్‌ డైలాగ్స్‌ ఉండవు. తండ్రీకూతురు అనుబంధానికి దర్పణంలా నిలుస్తుంది’ అన్నారు దర్శకుడు శౌర్యువ్‌. ఆయన నిర్దేశకత్వంలో నాని, మృణాల్‌ ఠాకూర్‌, బేబీ కియారా ఖన్నా ప్రధాన పాత్రల్లో నటించిన ఈ చిత్రం ఈ నెల 7న ప్రేక్షకుల ముందుకురానుంది. ఈ సందర్భంగా శనివారం దర్శకుడు శౌర్యువ్‌ పాత్రికేయులతో పంచుకున్న విశేషాలు..

నాలుగేళ్ల క్రితం ఈ కథ రాసుకున్నా. నానికి కథ చెప్పినప్పుడు బాగా నచ్చింది. వెంటనే సినిమాకు ఓకే చెప్పాడు. ఆరు నెలల పాటు ప్రీప్రొడక్షన్‌ వర్క్‌ జరిపి షూటింగ్‌ మొదలుపెట్టాం. తండ్రీకూతురు అనుబంధం నేపథ్యంలో ఈ కథ నడుస్తుంది. సింగిల్‌ ఫాదర్‌ మళ్లీ ప్రేమలో పడితే అనే కాన్సెప్ట్‌తో గతంలో కుచ్‌ కుచ్‌ హోతా హై, సంతోషం వంటి చాలా సినిమాలొచ్చాయి. అయితే ఆ సినిమాలతో మా కథకు ఎలాంటి సంబంధం ఉండదు. సమాజంలో జరుగుతున్న చాలా అంశాలను ఈ సినిమాలో చూపించాను.

సింగిల్‌ ఫాదర్‌ కథ

ట్రైలర్‌లోనే కథ ఎలా ఉండబోతుందో తెలియజేశాం. ఇప్పటి పరిస్థితుల్లో చెప్పాల్సిన బలమైన పాయింట్‌ అనిపించింది. చక్కటి కుటుంబ కథగా హృదయాన్ని స్పృశించే భావోద్వేగాలతో ఈ సినిమా ఆకట్టుకుంటుంది. మామూలుగా అయితే పిల్లలకు సంబంధించిన సగం బాధ్యతలను తల్లి తీసుకుంటుంది. సింగిల్‌ పేరెంట్‌ ఫాదర్‌ విషయంలో మాత్రం అతనే పూర్తి బాధ్యతలు తీసుకోవాలి. పిల్లల చుట్టూ తన జీవితాన్ని నిర్మించుకోవాలి. ఆ తండ్రి భావోద్వేగాలు, సంఘర్షణ ఎలా ఉంటుందనే అంశాలను ఈ సినిమాలో ఆవిష్కరించాను. నాని పాత్ర ఆద్యంతం ఎమోషనల్‌గా సాగుతుంది. ఈ కథ విషయంలో ఆయన విలువైన సలహాలిచ్చారు. మృణాల్‌ ఠాకూర్‌ తన పాత్రలో అద్భుతంగా ఒదిగిపోయింది. ఈ సినిమాలో శృతిహాసన్‌తో పాటు ఒకటి రెండు సర్‌ప్రైజింగ్‌ పాత్రలు ఉంటాయి. దర్శకుడిగా నా బలం ఎమోషన్‌. కమర్షియల్‌ చిత్రాల్లో కూడా ఎమోషన్స్‌ మిస్‌ చేయను. నా తదుపరి సినిమా వివరాలను త్వరలో వెల్లడిస్తా.