మనకు రాసిపెట్టిందే దక్కుతుంది!

అగ్ర కథానాయిక అనుష్క సినీ ప్రయాణంలో ఇరవై ఏండ్ల మైలురాయిని చేరుకుంది. సుదీర్ఘ కెరీర్‌లో ఎన్నో బ్లాక్‌బస్టర్‌ హిట్‌ ఆమె ఖాతాలో ఉన్నాయి. దక్షిణాది అగ్ర కథానాయికల్లో ఒకరిగా పేరు తెచ్చుకున్న అనుష్క గత కొన్నేళ్లుగా మహిళా ప్రధాన ఇతివృత్తాలకు పెద్దపీట వేస్తూ సెలెక్టివ్‌గా సినిమాలు చేస్తున్నది.

అగ్ర కథానాయిక అనుష్క సినీ ప్రయాణంలో ఇరవై ఏండ్ల మైలురాయిని చేరుకుంది. సుదీర్ఘ కెరీర్‌లో ఎన్నో బ్లాక్‌బస్టర్‌ హిట్‌ ఆమె ఖాతాలో ఉన్నాయి. దక్షిణాది అగ్ర కథానాయికల్లో ఒకరిగా పేరు తెచ్చుకున్న అనుష్క గత కొన్నేళ్లుగా మహిళా ప్రధాన ఇతివృత్తాలకు పెద్దపీట వేస్తూ సెలెక్టివ్‌గా సినిమాలు చేస్తున్నది. ఆమె ప్రధాన పాత్రలో క్రిష్‌ దర్శకత్వంలో రూపొందిన తాజా చిత్రం ‘ఘాటి’ ఈ నెల 5న ప్రేక్షకుల ముందుకురానుంది. ఈ సందర్భంగా బుధవారం అనుష్కశెట్టి పాత్రికేయులతో ముచ్చటిస్తూ పంచుకున్న విశేషాలు..

• సినీరంగంలో ఇరవైఏండ్ల జర్నీ పూర్తికావడంతో చాలా ఆనందంగా ఉంది. చూస్తుండగానే సమయం గడచిపోయింది. ఇక ‘ఘాటి’ సినిమా విషయానికొస్తే..నా కెరీర్‌లో ఇలాంటి పాత్ర చేయలేదు. అరుంధతి, రుద్రమదేవి, బాహుబలి, భాగమతి వంటి సినిమాల్లో నేను బలమైన పాత్రలు చేశాను. ‘ఘాటి’లో చేసిన శీలావతి పాత్ర కూడా అంత బలంగా ఉంటుంది.
• మహిళల్లో చాలా మంది సున్నిత మనస్కులు ఉంటారు. కానీ ఏవైనా ప్రతికూల పరిస్థితులు తలెత్తినప్పుడు వారి శక్తిసామర్థ్యాలన్నింటిని ప్రదర్శిస్తారు. మహిళల్లో ఉండే గొప్ప లక్షణమది. దర్శకుడు క్రిష్‌..శీలావతి రూపంలో అలాంటి బలమైన పాత్రను క్రియేట్‌ చేశారు. ఓ నేర ప్రపంచం నుంచి విడిపడి గొప్ప పరివర్తనతో ఆమె లెజెండ్‌గా ఎలా మారిందన్నది ఈ సినిమాలో ఆసక్తికరమైన పాయింట్‌.
• ఈ సినిమాలో గంజాయి స్మగ్లింగ్‌ అనే అంశం ఉన్నప్పటికీ.. కథను అది నెగెటివ్‌గా ప్రభావితం చేయదు. దర్శకుడు క్రిష్‌ సామాజిక ప్రయోజనంతో సినిమాలు చేస్తారు. అలాంటి కథల్నే ఎంచుకుంటారు. నేటి సమాజంలో ఉన్న సీరియస్‌ ఇష్యూని తీసుకొని దానిని సందేశాత్మక పంథాలో చర్చించారు. ఇది కమర్షియల్‌ సినిమా అయినా..అంతర్లీనంగా గొప్ప సందేశం కనిపిస్తుంది.
• ‘వేదం’లో సరోజ పాత్రకు కొనసాగింపుగా ఓ సినిమా చేద్దామనుకున్నా. అలాంటి మంచి కథ కోసం ఎదురుచూస్తున్న సమయంలో ‘ఘాటి’ నా వద్దకు వచ్చింది. శ్రీకాకుళం పర్వత ప్రాంతాల్లోని ఘాటి తెగ ప్రజలు, ప్రకృతితో మమేకమై సాగే వారి జీవన విధానం నన్ను బాగా ఆకట్టుకుంది. ఆర్గానిక్‌ కథ అనే భావన కలిగింది.
• ఆంధ్రా, ఒరిస్సా బోర్డర్‌లో ఈ సినిమా షూటింగ్‌ చేశాం. అదొక కొత్త ప్రపంచం. షూటింగ్‌ సమయంలో శారీరకంగా ఎన్నో సవాళ్లను ఎదుర్కోవాల్సి వచ్చింది. అయినా సినిమాపై ఇష్టంతో టీమ్‌ అంతా శ్రమించాం. ఈ సినిమాలోని కొన్ని యాక్షన్‌ సీక్వెన్స్‌లలో నేను డూప్‌ లేకుండా నటించాను.
• నేను సోషల్‌మీడియాలో అంత యాక్టివ్‌గా ఉండను. పబ్లిక్‌ లైఫ్‌లో కూడా ఎక్కువగా కనిపించను. విరామ సమయాల్లో నేను ప్రయాణాలు ఎక్కువగా చేస్తాను. పుస్తకాలు బాగా చదువుతాను. ప్రస్తుతం మహాభారతం చదువుతున్నా. గత రెండేళ్లుగా నా ఫ్యామిలీతోనే ఎక్కువ సమాయాన్ని గడుపుతున్నా.
• నా సినీ ప్రయాణం పట్ల చాలా సంతృప్తిగా, సంతోషంగా ఉన్నా. నాకు గొప్ప పాత్రలు ఇచ్చిన ప్రోత్సహించిన దర్శకనిర్మాతలకు ఈ సందర్భంగా కృతజ్ఞతలు చెబుతున్నా. ఈ సుదీర్ఘ ప్రయాణంలో బాధపడిన సందర్భాలేవీ లేవు. జీవితంలో ఏదైనా మనకు రాసిపెట్టిందే దక్కుతుందని నేను బలంగా విశ్వసిస్తాను. సినిమాల విషయంలో అనే జరిగిందనుకుంటున్నా. బలమైన కథ కుదిరితే నెగెటివ్‌ క్యారెక్టర్‌ కూడా చేయడానినికి నేను సిద్ధమే. తెలుగులో ఓ సినిమాకు అంగీకరించాను. ఆ వివరాలను మేకర్స్‌ త్వరలో తెలియజేస్తారు.