RRR ముందున్న టార్గెట్ తెలిస్తే కళ్లు బైర్లు గమ్మడం ఖాయం..

September 28, 2021 / 10:20 PM IST

RRR | రాజమౌళి సినిమాలకు ఇప్పుడు బిజినెస్ ఎంత జరుగుతుందనేది ప్రత్యేకంగా గుర్తు చేయాలా..? ముఖ్యంగా బాహుబలి తర్వాత ఈయన సినిమాల బిజినెస్ స్థాయి వందల కోట్లకు చేరిపోయింది. బాహుబలి రెండు భాగాలు కలిపి 2400 కోట్ల వరకు వసూలు చేసింది. అందుకే ఇప్పుడు తెరకెక్కిస్తున్న RRR సినిమా గురించి దేశం అంతా ఆసక్తిగా వేచి చూస్తుంది. తెలుగు, తమిళ, హిందీ భాషకు సంబంధించిన స్టార్స్ ఈ సినిమాలో నటిస్తున్నారు. దాదాపు 400 కోట్ల బడ్జెట్‌తో డి.వి.వి.దానయ్య ట్రిపుల్‌ ఆర్ సినిమా నిర్మిస్తున్నారు. క‌రోనా వైరస్, లాక్ డౌన్ ఇవన్నీ లేకపోయి ఉంటే ఈ పాటికే సినిమా విడుదలై ఉండేది. ఇదిలా ఉంటే ఈ సినిమా గురించి ఏదైనా ఒక్క అప్‌డేట్ తెలిసినా కూడా పండగ చేసుకుంటున్నారు అభిమానులు.

ఈ సినిమా బిజినెస్ కూడా అలాగే జరుగుతుంది. అక్టోబర్ 13న విడుదల అంటూ మొన్నటి వరకు ఊరించినా కూడా చివరికి ఉసూరుమనిపించాడు రాజమౌళి. పోస్ట్ ప్రొడక్షన్ పేరు చెప్పి మళ్లీ వాయిదా వేశాడు. దీంతో కొత్త రిలీజ్ డేట్ కోసం ఆసక్తిగా చూస్తున్నారు ఫ్యాన్స్. తాజాగా ఈ సినిమా బిజినెస్ గురించి కొన్ని లెక్కలు బయటికి వస్తున్నాయి. 700 కోట్ల వరకు ఈ చిత్ర ప్రీ రిలీజ్ బిజినెస్ జరుగుతుందని తెలుస్తుంది. తెలుగులోనే 240 కోట్లకు పైగా ట్రిపుల్ ఆర్ బిజినెస్ జరుగుతుంది. ఇక ఓవర్సీస్, హిందీ, మిగిలిన రాష్ట్రాలు కలిపి మరో 500 కోట్ల వరకు బిజినెస్ జరుగుతుంది. పైగా మొన్న ఓ షోకు వచ్చిన ఈ చిత్ర రైటర్ విజయేంద్ర ప్రసాద్ సినిమా గురించి చాలా విషయాలు చెప్పుకొచ్చాడు. ఈ సినిమాలో ఒక కీలకమైన సన్నివేశం గురించి నోరు జారాడు ఈ సీనియర్ రైటర్.

ట్రిపుల్‌ ఆర్ ఆర్ సినిమాలో రామ్ చరణ్, జూనియర్ ఎన్టీఆర్ మధ్య ఒక ఫైట్ సీక్వెన్స్ ఉంటుంది అని తెలిపాడు. ఇద్దరు మంచి వాళ్లు కొట్టుకుంటున్నప్పుడు మనకు తెలియకుండానే కంటి నుంచి నీళ్లు వస్తాయంటూ అసలు విషయం బయట పెట్టాడు విజయేంద్ర ప్రసాద్. ఈ సన్నివేశం రాజమౌళి చాలా అద్భుతంగా తెరకెక్కించాడు అని ప్రశంసించాడు. క‌చ్చితంగా ఈ సినిమా చరిత్రలో నిలిచిపోతుందని బల్లగుద్ది చెబుతున్నాడు. ఈ సినిమాలో కీలకమైన సన్నివేశం గురించి బయట పడిపోవడంతో ఇప్పుడు దానిపై అంచనాలు మరింత పెరిగిపోయాయి. ఇంత భారీగా ఉండబోతుంది కాబట్టే బిజినెస్ కూడా అలాగే జరుగుతుంది. ఏదేమైనా 700 కోట్ల ప్రీ రిలీజ్ బిజినెస్ అంటే మాటలు కాదు.. మరి దాన్ని ట్రిపుల్ ఆర్ ఎంతవరకు అందుకుంటుందో చూడాలిక.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి