Visit:
Dhanush | కోలీవుడ్ స్టార్ హీరో ధనుష్ బాలీవుడ్లోనూ వరుస సినిమాలతో తనదైన ముద్ర వేస్తున్నారు. తమిళం, తెలుగు చిత్రాలతో పాటు హిందీ ప్రాజెక్ట్లకూ సమాన ప్రాధాన్యం ఇస్తున్న ఆయన, ఇప్పుడు మరో ప్రతిష్టాత్మక బాలీవుడ్ చిత్రానికి సిద్ధమవుతున్నారు. ప్రముఖ దర్శకుడు, నిర్మాత సంజయ్ లీలా భన్సాలీ నిర్మాణంలో తెరకెక్కనున్న ఈ భారీ ప్రాజెక్ట్కు సంబంధించిన ఓ వార్త ప్రస్తుతం బాలీవుడ్లో హాట్ టాపిక్గా మారింది. ఈ చిత్రాన్ని ‘ఇరుంబు తిరై’, ‘సర్దార్’ వంటి విజయవంతమైన చిత్రాలను తెరకెక్కించిన తమిళ దర్శకుడు పీ.ఎస్. మిత్రన్ రూపొందించనున్నారు. బాలీవుడ్లో ఆయనకు ఇదే తొలి చిత్రం కానుంది. మైథలాజికల్ అంశాలను జంగిల్ అడ్వెంచర్ కథతో మేళవిస్తూ ఈ సినిమాను భారీ స్థాయిలో రూపొందించేందుకు సన్నాహాలు జరుగుతున్నట్లు సమాచారం. ప్రస్తుతం చిత్రబృందం స్క్రిప్ట్ పనులను పూర్తి చేసే దశలో ఉంది.
బాలీవుడ్ మీడియా కథనాల ప్రకారం, ఈ చిత్రంలో హీరోయిన్ పాత్ర కోసం స్టార్ నటి కరీనా కపూర్ ఖాన్ని మేకర్స్ సంప్రదించినట్లు ప్రచారం జరుగుతోంది. కథ నచ్చడంతో కరీనా కూడా ఈ ప్రాజెక్ట్పై ఆసక్తి చూపుతున్నట్లు వార్తలు వినిపిస్తున్నాయి. అయితే దీనిపై చిత్రబృందం లేదా కరీనా నుంచి ఇప్పటివరకు ఎలాంటి అధికారిక ప్రకటన వెలువడలేదు. సంజయ్ లీలా భన్సాలీ, కరీనా కపూర్ కలిసి పని చేయాలనే చర్చలు గతంలో కూడా జరిగాయి. ముఖ్యంగా ‘దేవదాస్’ సినిమా సమయంలో వీరిద్దరి మధ్య ఏర్పడిన విభేదాల తర్వాత మళ్లీ కలిసి పనిచేసే అవకాశం రాలేదు. ప్రస్తుతం ప్రచారంలో ఉన్న వార్తలు నిజమైతే, దాదాపు 24 ఏళ్ల తర్వాత భన్సాలీ దర్శకత్వం లేదా నిర్మాణంలో కరీనా నటించే తొలి ప్రాజెక్ట్గా ఈ చిత్రం నిలవనుంది.
ఈ చిత్రాన్ని భారీ బడ్జెట్తో రూపొందించనున్నట్లు సమాచారం. స్క్రిప్ట్ విషయంలో సంజయ్ లీలా భన్సాలీ ప్రత్యేక శ్రద్ధ తీసుకుంటున్నారని, పలుమార్లు మార్పులు చేసి కథను ఫైనల్ చేసినట్లు బాలీవుడ్ వర్గాలు చెబుతున్నాయి. ప్రస్తుతం భన్సాలీ దర్శకత్వంలో రణ్బీర్ కపూర్, ఆలియా భట్, విక్కీ కౌశల్ ప్రధాన పాత్రల్లో తెరకెక్కుతున్న ‘లవ్ అండ్ వార్’ చిత్రం చివరి దశ చిత్రీకరణలో ఉంది. ఆ సినిమా పూర్తయిన తర్వాత ధనుష్–పీ.ఎస్. మిత్రన్ ప్రాజెక్ట్ను ప్రారంభించే అవకాశముంది.తాజా సమాచారం ప్రకారం, ఈ చిత్రం 2027 ప్రారంభంలో సెట్స్పైకి వెళ్లే అవకాశం ఉంది. ధనుష్, కరీనా కపూర్ కాంబినేషన్ నిజమైతే, ఈ ప్రాజెక్ట్పై దేశవ్యాప్తంగా భారీ అంచనాలు నెలకొనే అవకాశముంది. అయితే, హీరోయిన్ ఎంపికకు సంబంధించి వస్తున్న వార్తలు ప్రస్తుతం ప్రచారంలో ఉన్న సమాచారం మాత్రమే. దీనిపై చిత్రబృందం అధికారిక ప్రకటన వెలువడిన తర్వాతే పూర్తి స్పష్టత రానుంది.
