Visit:
Yellamma | టాలీవుడ్‌లో రెండు సంవత్సరాలుగా చర్చల్లో ఉన్న ప్రాజెక్ట్ ‘ఎల్లమ్మ’ మరోసారి వార్తల్లో నిలిచింది. ‘బలగం’ చిత్రంతో దర్శకుడిగా సూపర్ హిట్ అందుకున్న వేణు యెల్దండి ఈ సినిమాను డైరెక్ట్ చేయబోతున్నారు. అయితే ప్రాజెక్ట్ ప్రకటించి దాదాపు రెండేళ్లు గడిచినా ఇప్పటికీ పట్టాలెక్కలేదు. ‘బలగం’తో పెద్ద విజయం సాధించిన తర్వాత వేణు రెండో సినిమా కోసం అందరూ ఆసక్తిగా ఎదురుచూస్తున్నారు. చాలా మంది నిర్మాతలు అడ్వాన్స్‌ ఇచ్చేందుకు సిద్ధంగా ఉన్నప్పటికీ, వేణు మాత్రం తన గురువు దిల్ రాజు బ్యానర్‌లోనే ఈ సినిమా చేయాలని నిర్ణయించుకున్నారు. ‘ఎల్లమ్మ’ కథ సిద్ధమైనా హీరో మాత్రం ఇప్పటివరకు ఫిక్స్‌ కాలేదు.
మొదట ఈ సినిమాను నానితో చేయాలని నిర్మాతలు అనుకున్నారు. కానీ ఇతర కమిట్మెంట్స్ కారణంగా నాని ఈ ప్రాజెక్ట్ నుంచి తప్పుకున్నారు. ఆ తర్వాత నితిన్ పేరు వినిపించింది. ఓ దశలో అధికారిక ప్రకటన కూడా వచ్చింది. అయితే ‘తమ్ముడు’ ఫలితం ఆశించినంతగా రాకపోవడంతో, బడ్జెట్ ఇష్యూల కారణంగా నితిన్ కూడా ప్రాజెక్ట్ నుంచి వైదొలిగినట్లు టాక్‌ వచ్చింది. తరువాత బెల్లంకొండ సాయి శ్రీనివాస్ పేరు వినిపించింది, కానీ అది కూడా కేవలం రూమర్‌గానే మిగిలిపోయింది. ఇప్పుడు తాజా సమాచారం ప్రకారం, ఈ సినిమాకు హీరోగా ప్రముఖ సంగీత దర్శకుడు దేవిశ్రీ ప్రసాద్ (DSP) ను తీసుకోవాలని ఆలోచిస్తున్నార‌ట. వేణు యెల్దండి దర్శకత్వంలో, దిల్ రాజు నిర్మాణంలో డీఎస్పీ హీరోగా ఎంట్రీ ఇవ్వనున్నారని సోషల్ మీడియాలో వార్తలు వైరల్ అవుతున్నాయి.
డీఎస్పీని హీరోగా చూడాలనే ఆలోచన చాలా కాలంగా టాలీవుడ్‌లో వినిపిస్తూనే ఉంది. అయితే ఇప్పటివరకు అది నిజం కాలేదు. ఈసారి మాత్రం వేణు – దిల్ రాజు కాంబోలో ‘ఎల్లమ్మ’ ద్వారా ఆయన నటుడిగా పరిచయం కానున్నారనే ప్రచారం పెద్ద ఎత్తున సాగుతోంది. ఈ వార్తపై ఇప్పటివరకు అధికారిక నిర్ధారణ రాలేదు. అయినప్పటికీ, వేణు రెండో సినిమా ఎప్పుడు ప్రారంభమవుతుందో, ఎవరే హీరోగా ఫైనల్ అవుతారో తెలుసుకోవాలని సినీ ప్రేమికులు ఆసక్తిగా ఎదురు చూస్తున్నారు. ‘బలగం’ తర్వాత వేణు యెల్దండి తెరకెక్కించే ‘ఎల్లమ్మ’* ప్రాజెక్ట్ ఎప్పుడెప్పుడు మొదలవుతుందా అనే ప్రశ్న టాలీవుడ్‌లో హాట్ టాపిక్‌గా మారింది. నాని, నితిన్‌ల తర్వాత ఇప్పుడు దేవిశ్రీ ప్రసాద్ పేరు వినిపించడంతో ప్రాజెక్ట్‌పై మరింత ఆసక్తి పెరిగింది.
