Grammys 2027 | గ్రామీ బరిలో ‘ధురంధర్’ సౌండ్‌ట్రాక్.. ఏకంగా ఎనిమిది కేటగిరీల్లో ఎంట్రీలు!

Dhurandhar The Revenge | రణ్‌వీర్ సింగ్ ప్రధాన పాత్రలో నటించిన బ్లాక్‌బస్టర్ చిత్రం "ధురంధర్: ది రివెంజ్" సినిమా సంగీతం 2027 గ్రామీ అవార్డుల పరిశీలన కోసం ఎనిమిది విభాగాల్లో దరఖాస్తు చేసుకుంది.

Dhurandhar The Revenge | రణ్‌వీర్ సింగ్ ప్రధాన పాత్రలో నటించిన బ్లాక్‌బస్టర్ చిత్రం “ధురంధర్: ది రివెంజ్” సినిమా సంగీతం 2027 గ్రామీ అవార్డుల పరిశీలన కోసం ఎనిమిది విభాగాల్లో దరఖాస్తు చేసుకుంది. చిత్ర నిర్మాణ సంస్థ బి62 స్టూడియోస్ ఈ విషయాన్ని అధికారికంగా వెల్లడించింది. దర్శకుడు ఆదిత్య ధర్ మరియు ఆయన సోదరుడు లోకేష్ స్థాపించిన ఈ స్టూడియో, సంగీత దర్శకుడు శాశ్వత్ సచ్‌దేవ్ అందించిన బాణీలకు అంతర్జాతీయ గుర్తింపు తెచ్చేలా ఈ ప్రచారాన్ని చేపట్టింది. ఈ సినిమాకు సంబంధించి సౌండ్‌ట్రాక్ ఆల్బమ్‌తో పాటు విడి పాటలను కలిపి మొత్తం తొమ్మిది ఎంట్రీలను గ్రామీకి పంపినట్లు స్టూడియో తెలిపింది. విజువల్ మీడియా కోసం ఉత్తమ సంకలన సౌండ్‌ట్రాక్ విభాగంలో ఈ ఆల్బమ్ పోటీపడుతుండగా, అరిజిత్ సింగ్ పాడిన “ఫిర్ సే” పాటను ‘విజువల్ మీడియా కోసం వ్రాసిన ఉత్తమ పాట’ విభాగానికి పంపారు.

అలాగే “ఆరి ఆరి” పాటను ‘ఉత్తమ ఆసియన్ పాప్ మ్యూజిక్ పెర్ఫార్మెన్స్’ కేటగిరీకి, “జాన్ సే గుజార్తే హై”, “కన్హయ్య” పాటలను ‘ఉత్తమ గ్లోబల్ మ్యూజిక్ పెర్ఫార్మెన్స్’ విభాగంలోనూ పరిశీలిస్తున్నారు. “జాయే సజనా” పాటను ‘ఉత్తమ పాప్ డ్యూయో పెర్ఫార్మెన్స్’ విభాగంలో, “డెస్టినీ – మన్ అట్కేయా” పాటను ‘ఉత్తమ రాప్ పెర్ఫార్మెన్స్’ విభాగంలో, “వారి జావాన్” పాటను ‘ఉత్తమ డాన్స్, ఎలక్ట్రానిక్ రికార్డింగ్’ విభాగంలో, అలాగే “హమ్ ప్యార్ కర్నే వాలే” పాటను ‘ఉత్తమ రీమిక్స్డ్ రికార్డింగ్’ విభాగంలో నామినేషన్ల కోసం సమర్పించారు.

ఇర్షాద్ కమిల్ మరియు ఇతర రచయితలు సాహిత్యం అందించిన ఈ చిత్రంలోని పాటలకు శాశ్వత్ సచ్‌దేవ్ సంగీతం అందించారు. ఆదిత్య ధర్ దర్శకత్వంలో వచ్చిన ‘ధురంధర్’ ఫ్రాంచైజీ బాక్సాఫీస్ వద్ద భారీ విజయాలను సాధించింది. డిసెంబర్ 2025లో వచ్చిన మొదటి భాగం రూ. 1,300 కోట్లకు పైగా వసూలు చేయగా, మార్చి 2026లో విడుదలైన సీక్వెల్ “ధురంధర్: ది రివెంజ్” ప్రపంచవ్యాప్తంగా రూ. 1,800 కోట్లకు పైగా వసూళ్లతో రికార్డు సృష్టించింది. అయితే, ఈ గ్రామీ సమర్పణలు కేవలం పరిశీలన కోసం మాత్రమేనని, ఇవి నామినేషన్లను నేరుగా ఖాయం చేయవని నిర్వాహకులు తెలిపారు. రికార్డింగ్ అకాడమీ అర్హత ప్రమాదాలను పూర్తి చేసుకుని, ఓటింగ్ ప్రక్రియను దాటిన తర్వాతే అసలు నామినేషన్లు ప్రకటిస్తారు.