Visit:
Pawan Kalyan | ఆంధ్రప్రదేశ్ ఉప ముఖ్యమంత్రి, జనసేన అధినేత పవన్ కళ్యాణ్ ఆరోగ్యానికి సంబంధించిన తాజా అప్డేట్ ఇప్పుడు రెండు తెలుగు రాష్ట్రాల్లో హాట్ టాపిక్గా మారింది. ముంబైలోని కోకిలాబెన్ ధీరూభాయ్ అంబానీ ఆసుపత్రిలో పవన్ కళ్యాణ్ కుడి భుజానికి వైద్యులు విజయవంతంగా శస్త్రచికిత్స నిర్వహించారు. సర్జరీ అనంతరం ఆయన ఆరోగ్య పరిస్థితి నిలకడగా ఉందని వైద్య వర్గాలు తెలిపాయి. ఈ క్లిష్ట సమయంలో పవన్ కళ్యాణ్కు అండగా నిలిచిన ఆయన భార్య అన్నా కొణిదెల సోషల్ మీడియాలో చేసిన భావోద్వేగ పోస్టు అభిమానులను కదిలించింది. భర్త ఆరోగ్యం గురించి ఆమె వ్యక్తం చేసిన భావాలు ప్రస్తుతం విస్తృతంగా వైరల్ అవుతున్నాయి.
శస్త్రచికిత్స అనంతరం పవన్ కళ్యాణ్ను పరామర్శించేందుకు ఆంధ్రప్రదేశ్ ముఖ్యమంత్రి నారా చంద్రబాబు నాయుడు ముంబై ఆసుపత్రికి వెళ్లారు. ఆ సందర్భంగా తీసిన ఫొటోను పంచుకున్న అన్నా కొణిదెల, తన భర్త వ్యక్తిత్వాన్ని ప్రతిబింబించేలా భావోద్వేగ సందేశాన్ని రాశారు. ఆయన జీవితంలో మోస్తున్న బాధ్యతలు, ఆయన అనుభవిస్తున్న శారీరక నొప్పి కంటే ఎంతో పెద్దవి. భరించలేని స్థాయికి నొప్పి వచ్చినా ఆయన ఎప్పుడూ ఫిర్యాదు చేయరు. ఎవరి జాలినీ కోరుకోరు. ప్రస్తుతం నా బాధ్యత ఆయనను జాగ్రత్తగా చూసుకోవడమే. ఆయన మంచి వైద్యుల పర్యవేక్షణలో ఉన్నారు అంటూ ఆమె పేర్కొన్నారు.
ఈ పోస్టుకు అభిమానుల నుంచి భారీ స్పందన లభిస్తోంది. పవన్ త్వరగా కోలుకోవాలని వేలాది మంది సోషల్ మీడియా వేదికగా ఆకాంక్షిస్తున్నారు. వైద్య సమాచారం ప్రకారం, పవన్ కళ్యాణ్ 2016 నుంచే రోటేటర్ కఫ్ సమస్యతో బాధపడుతున్నారు. రాజకీయ కార్యక్రమాలు, నిరంతర పర్యటనలు, శారీరక శ్రమ కారణంగా భుజంపై ఒత్తిడి మరింత పెరిగినట్లు తెలుస్తోంది. శస్త్రచికిత్స సమయంలో వైద్య బృందం మరో కీలక సమస్యను గుర్తించింది. గత స్కాన్లలో స్పష్టంగా కనిపించని అదనపు అవల్షన్ ఫ్రాక్చర్ కుడి భుజంలో ఉన్నట్లు ఆపరేషన్ సమయంలో బయటపడింది. దీంతో ముందుగా అనుకున్న దానికంటే శస్త్రచికిత్స మరింత క్లిష్టంగా మారి, దాదాపు మూడున్నర గంటల పాటు కొనసాగింది.
వైద్యులు విజయవంతంగా ఆపరేషన్ పూర్తి చేసినట్లు సమాచారం. మరో రెండు నెలల తర్వాత ఎడమ భుజానికి కూడా శస్త్రచికిత్స నిర్వహించే అవకాశం ఉందని తెలుస్తోంది. వైద్యుల సూచన మేరకు పవన్ కళ్యాణ్ కొన్ని వారాల పాటు పూర్తిగా విశ్రాంతి తీసుకోవాల్సి ఉంటుంది. అనంతరం ఫిజియోథెరపీ, రీహాబిలిటేషన్ ప్రక్రియ కొనసాగనుంది. పూర్తి స్థాయిలో కోలుకోవడానికి కొంత సమయం పట్టే అవకాశముందని వైద్యులు సూచించినట్లు సమాచారం. పవన్ కళ్యాణ్ ఆరోగ్య పరిస్థితి కారణంగా ఆయన నటిస్తున్న చిత్రాల షూటింగ్ షెడ్యూల్స్లో మార్పులు చోటుచేసుకునే అవకాశాలు కనిపిస్తున్నాయి. ముఖ్యంగా దర్శకుడు సుజీత్ తెరకెక్కిస్తున్న ‘ఓజీ 2’ చిత్రంలోని భారీ యాక్షన్ సన్నివేశాల చిత్రీకరణను తాత్కాలికంగా వాయిదా వేసే అవకాశమున్నట్లు సినీ వర్గాల్లో ప్రచారం జరుగుతోంది.అయితే దీనిపై చిత్ర బృందం నుంచి ఇప్పటివరకు ఎలాంటి అధికారిక ప్రకటన వెలువడలేదు. పవన్ కళ్యాణ్ పూర్తిగా కోలుకున్న తర్వాత మిగిలిన షూటింగ్ను పూర్తి చేసేలా షెడ్యూల్ను రూపొందించే అవకాశాలు ఉన్నాయని ఇండస్ట్రీ వర్గాలు భావిస్తున్నాయి.
