ఆ మాటవింటే భయమేస్తుంది

లఘు చిత్రాలతో కెరీర్‌ను మొదలుపెట్టి ‘కలర్‌ ఫొటో’ ‘రైటర్‌ పద్మభూషణ్‌' సినిమాలతో హీరోగా గుర్తింపును సంపాదించుకున్నాడు సుహాస్‌.

లఘు చిత్రాలతో కెరీర్‌ను మొదలుపెట్టి ‘కలర్‌ ఫొటో’ ‘రైటర్‌ పద్మభూషణ్‌’ సినిమాలతో హీరోగా గుర్తింపును సంపాదించుకున్నాడు సుహాస్‌. ఆయన తాజా చిత్రం ‘అంబాజీపేట మ్యారేజి బ్యాండు’. దుశ్యంత్‌ కటికినేని దర్శకత్వంలో తెరకెక్కిన ఈ చిత్రం ఫిబ్రవరి 2న ప్రేక్షకుల ముందుకురానుంది. ఈ సందర్భంగా మంగళవారం పాత్రికేయులతో సుహాస్‌ పంచుకున్న విశేషాలు..

• గత ఏడాది ఫిబ్రవరిలో ‘రైటర్‌ పద్మభూషణ్‌’తో మంచి విజయం దక్కింది. అదే సెంటిమెంట్‌ను రిపీట్‌ చేస్తూ ‘అంబాజీపేట మ్యారేజి బ్యాండు’ చిత్రం సక్సెస్‌ అవుతుందనే నమ్మకం ఉంది. జనవరి 22న అయోధ్యలో శ్రీరాముడి విగ్రహ ప్రాణప్రతిష్ట రోజే నాకు బాబు పుట్టాడు. అదొక శుభసంకేతంలా అనిపించింది. ఇవన్నీ చూస్తుంటే అంతా మంచే జరుగుతుందనిపిస్తుంది.
• ఈ సినిమా కోసం రెండేళ్లు కష్టపడ్డాను. బ్యాండ్‌ కొట్టడం నేర్చుకోవడంతో పాటు సన్నివేశాల డిమాండ్‌ మేరకు గుండు కొట్టించుకొని కనిపించా. దర్శకుడు దుశ్యంత్‌ రాసిన కథ నన్ను కదిలించింది. అందుకే సినిమా కోసం మనసు పెట్టి పనిచేశా.
• 2007లో ఈ కథ నడుస్తుంది. దర్శకుడు తన నిజజీవితంలో చూసిన సంఘటనల స్ఫూర్తితో కథ రాసుకున్నాడు. ఇంటర్వెల్‌కు ఇరవై నిమిషాల ముందు వరకు చక్కటి కామెడీతో అలరించే కథ..ఆ తర్వాత మలుపులు తీసుకొని ఎమోషనల్‌గా సాగుతుంది. నా పాత్రలో కూడా ఇప్పటివరకూ చూడని హై ఎమోషన్స్‌ కనిపిస్తాయి.
• ఈ సినిమాలో కులాల ప్రస్తావన ఉంటుంది కానీ..కథా నేపథ్యం మాత్రం అది కాదు. మనుషుల మధ్య అహం ఎలాంటి అడ్డుగోడలు సృష్టిస్తుందన్నదే మెయిన్‌ పాయింట్‌. మన జీవితాల్లో జరిగిన చాలా సంఘటనలు తెరపై చూసిన అనుభూతి కలుగుతుంది. ‘నీ భుజాల మీదే సినిమాను మోస్తున్నావ్‌’ అని చాలా మంది అంటుంటారు. ఆ మాట వింటే భయమేస్తుంటుంది. నాకు హీరోగా కంటే మంచి నటుడిగా పేరు తెచ్చుకోవడమే ఇష్టం. ప్రస్తుతం ప్రసన్న వదనం, కేబుల్‌ రెడ్డి చిత్రాలతో పాటు దిల్‌రాజుగారి బ్యానర్‌లో ఓ చక్కటి వినోదాత్మక చిత్రంలో నటిస్తున్నా.