సంక్రాంతికి ఏంటి సినీ జాతర.. బరిలో దిగిన 8 సినిమాలు..

January 3, 2022 / 09:30 AM IST

Sankranti movies | మొన్నటి వరకు సంక్రాంతికి ఎన్ని సినిమాలు వస్తున్నాయి అంటే ముందు ట్రిపుల్ ఆర్‌.. ఆ త‌ర్వాత ప్ర‌భాస్ రాధేశ్యామ్ సినిమా పేర్లు వినిపించాయి. ఆ త‌ర్వాత నాగార్జున బంగార్రాజు సినిమా కూడా డౌట్‌గానే ఉండేది. కానీ ఇప్పుడు ప‌రిస్థితులు మారిపోయాయి. క‌రోనా వైరస్ కారణంగా మరోసారి థియేటర్లు మూతపడటం.. 50 శాతం ఆక్యుపెన్సీ ఉండాలంటూ ప్రభుత్వాలు ఆంక్షలు విధించడంతో పెద్ద సినిమాలన్నీ ఒక్కసారిగా వెనక్కి వెళ్లిపోయాయి. దాంతో చాలా రోజులుగా విడుదల కోసం వేచి చూస్తున్న చిన్న సినిమాలు రెక్కలు విప్పుకొని థియేటర్ల వైపు పరుగులు పెడుతున్నాయి.

సంక్రాంతికి పెద్ద సినిమాలు రావడం లేదు అన్న విషయం తెలిసిన తర్వాత.. ఒకటి రెండు కాదు ఏకంగా ఒకే రోజు ఎనిమిది సినిమాల నిర్మాత‌లు విడుదల తేదీలను క‌న్ఫార్మ్ చేశారు. అన్ని సంక్రాంతికే వస్తున్నట్లు పోస్టర్స్ విడుదల చేశారు. అందులో నాగార్జున బంగార్రాజు ఎలాగూ ఉంది. మరోవైపు మహేశ్‌ బాబు మేనల్లుడు గల్లా అశోక్ హీరోగా పరిచయం అవుతున్న తొలి సినిమా హీరో జనవరి 15న విడుదల కానుంది. దానికి ఒకరోజు ముందు సిగ్గు జొన్నలగడ్డ హీరోగా నటిస్తున్న డీజే టిల్లు విడుదలవుతుంది. ట్రిపుల్‌ ఆర్ విడుదల కావాల్సిన జనవరి 7న ఆది సాయి కుమార్ హీరోగా నటిస్తున్న అతిథి దేవోభవ వస్తోంది. వీటితో పాటు రాజశేఖర్ శేఖర్.. ఎమ్మెస్ రాజు 7 డేస్ 6 నైట్స్.. చిరంజీవి చిన్నల్లుడు కళ్యాణ్ దేవ్ హీరోగా నటిస్తున్న సూపర్ మచ్చి.. దిల్ రాజు వారసుడు ఆశిష్ రెడ్డి హీరోగా పరిచయమవుతున్న రౌడీ బాయ్స్.. ఇలా ఒకేసారి 8 సినిమాలు విడుదలకు సిద్ధమయ్యాయి. మరి ఇందులో ఎన్ని సినిమాలకు ప్రేక్షకులు ఓటేస్తారో చూడాలి.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి