nitish bharadwaj | ఇండస్ట్రీలో మరో విడాకులు.. భార్యకు దూరమైన బుల్లితెర కృష్ణుడు..

January 19, 2022 / 07:06 PM IST

Nitish Bharadwaj divorce with his wife smita gate

Nitish Bharadwaj Divorce | సినిమా ఇండస్ట్రీలో ఏమవుతుందో ఎవరికీ అర్థం కావడం లేదు. ఎన్నో ఏండ్లు అన్యోన్యంగా క‌లిసి ఉన్న జంట‌లు ఉన్న‌ట్టుండి విడిపోతున్నాయి. గ‌త ఏడాది నాగచైతన్య, సమంత విడిపోయినప్పుడు ఎంతోమంది అభిమానులు బాధపడ్డారు. బాలీవుడ్‌లో 15 సంవత్సరాలు కలిసి ఉన్న అమీర్ ఖాన్, కిరణ్ రావు విడాకులు తీసుకున్నారు. మొన్నటికి మొన్న త‌మిళ స్టార్‌ హీరో ధనుష్, రజనీకాంత్ కూతురు ఐశ్వర్య కూడా విడిపోయారు. ఈ ఇద్దరు విడిపోతారని అభిమానులు కలలో కూడా ఊహించలేదు. కానీ ఎవరూ ఊహించని ఈ విధంగా తమ విడాకుల విషయం సోషల్ మీడియాలో పోస్ట్ చేశాడు ధనుష్. ఇదిలా ఉంటే తాజాగా మరో స్టార్ కపుల్ కూడా విడాకులు తీసుకున్నారు.

బుల్లితెరపై శ్రీకృష్ణుడిగా తనకంటూ ప్రత్యేక గుర్తింపు సంపాదించుకున్న నితీశ్‌ భరద్వాజ్.. తన భార్య స్మిత గేట్ కు విడాకులు ఇచ్చాడు. ప్రముఖ దర్శకుడు బీఆర్ చోప్రా తెరకెక్కించిన మహాభారత్ సీరియల్‌లో శ్రీ కృష్ణుడు పాత్రతో ఇండియన్ వైడ్‌గా గుర్తింపు సంపాదించుకున్నాడు నితీశ్‌ భరద్వాజ్. 58 ఏండ్ల‌ ఈ నటుడు 2019 సెప్టెంబర్‌లో తన భార్య స్మితతో విడాకుల కోసం కోర్టులో అప్లై చేసుకున్నాడు. 2009లో ఈ ఇద్దరి పెండ్లి జరిగింది. ఈ జంటకు కవల పిల్లలు ఉన్నారు. వాళ్ల పేర్లు దేవయాని, శివరంజని. ప్రస్తుతం ఈ ఇద్దరు అమ్మాయిలు తల్లి దగ్గరే ఉన్నారు. తాము ఎందుకు విడిపోవాల్సి వచ్చిందో కారణాలు చెప్పాలని లేదు అంటూ సోషల్ మీడియాలో రాసుకొచ్చాడు నితీశ్‌ భరద్వాజ్. తాము తీసుకున్న నిర్ణయానికి కాస్త ప్రైవసీ కావాలి అంటున్నాడు. కాగా ఆయన భార్య ఒక ఐఏఎస్ అధికారిణి. ఈమెను 12 ఏండ్ల‌ కింద రెండో పెళ్లి చేసుకున్నాడు నితీశ్‌. ఇప్పుడు ఇద్దరూ విడిపోవడంతో సోషల్ మీడియాలో వీళ్ల గురించి చర్చ జరుగుతుంది.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి