Sameera Reddy | సమీరారెడ్డికి చాలా కిరీటాలు ఉన్నాయి. నటి, అమ్మ, ఇన్ఫ్లుయెన్సర్. ఒంటి రంగును బట్టో, జుట్టు నెరపును బట్టో మనిషిని అంచనా వేయడం అనాగరికమంటూ సమీర చాలాసార్లు గొంతెత్తింది. తెల్లజుట్టును, పొట్ట చారలను దాచుకునే ప్రయత్నం తానెప్పుడూ చేయలేదు. మహిళల ఆరోగ్యం పట్ల ఆమెకు పట్టింపు ఎక్కువ.
‘సోషల్ మీడియాలో కనిపించే ప్రతి డైట్ ప్లాన్నూ అనుసరించడం సరికాదు. ముందుగా మనం మన శరీరంతో సంభాషించాలి. శరీరం చెప్పిందే వినాలి. నా మట్టుకు నేను చిన్నచిన్న భోజనాలను ఎంచుకున్నాను. కొద్దికొద్దిగా తినడం అలవాటు చేసుకున్నాను. మా నాన్న మాకు డ్రైఫ్రూట్స్ అలవాటు చేశారు. నేను వాటిని నా పిల్లలకూ రుచి చూపించాను. వాళ్లే నా ప్రపంచం. మనం ఆరోగ్యవంతమైన జీవన విధానాన్ని ఎంచుకుంటే, వాళ్లూ ఆ మార్గాన్నే ఎంచుకుంటారు. మనం చిరుతిళ్లు ఇష్టపడితే, వాళ్లూ ఆ చెత్తతోనే పొట్టనింపుకొంటారు. మహిళ ఆరోగ్యంపైనే కుటుంబ ఆరోగ్యం ఆధారపడి ఉంటుంది. తల్లి కాకముందు, గర్భధారణ సమయంలో, పిల్లల్ని కన్నాక.. ప్రతి దశలోనూ మనం ఆరోగ్యానికి విలువ ఇవ్వాలి” అని సలహా ఇస్తున్నది సమీర.