Union Budget 2024 | 23న కేంద్ర బడ్జెట్.. ఆర్థికశాఖ కార్యాలయంలో హల్వా వేడుక

Union Budget 2024 | ఈ నెల 23న పార్లమెంటులో కేంద్ర బడ్జెట్ సమర్పించనున్న నేపథ్యంలో కేంద్ర ఆర్థిక మంత్రి నిర్మలా సీతారామన్ మంగళవారం నార్త్ బ్లాక్ లోని ఆర్థికశాఖ ప్రధాన కార్యాలయంలో సంప్రదాయ హల్వా వేడుక నిర్వహించారు.

July 16, 2024 / 10:29 PM IST

Union Budget 2024 | 23న కేంద్ర బడ్జెట్.. ఆర్థికశాఖ కార్యాలయంలో హల్వా వేడుక

Union Budget 2024 | ప్రస్తుత ఆర్థిక సంవత్సరం (2024-25) లో పూర్తిస్థాయి బడ్జెట్ ప్రవేశపెట్టేందుకు రంగం సిద్ధమైంది. ఈ నెల 23న బడ్జెట్ ను పార్లమెంటుకు ఆర్థిక మంత్రి నిర్మలా సీతారామన్ సమర్పిస్తారు. ఈ నేపథ్యంలో బడ్జెట్ తయారీ ప్రక్రియ చివరి దశకు చేరుకోవడంతో ఢిల్లీలోని ఆర్థికశాఖ ప్రధాన కార్యాలయం ‘నార్త్ బ్లాక్’లో సంప్రదాయ హల్వా వేడుక నిర్వహించారు. కేంద్ర ఆర్థిక మంత్రి నిర్మలా సీతారామన్.. అధికారులందరికీ స్వయంగా హల్వా వడ్డించారు. ఈ కార్యక్రమంలో కేంద్ర ఆర్థికశాఖ సహాయ మంత్రి పంకజ్ చౌదరితోపాటు ఆర్థిక శాఖ ఉన్నతాధికారులు పాల్గొన్నారు.

ప్రతిఏటా పార్లమెంటులో బడ్జెట్ సమర్పించడానికి ముందు కేంద్ర ఆర్థికశాఖ కార్యాలయంలో హల్వా వేడుక నిర్వహిస్తారు. ఈ కార్యక్రమంలో పాల్గొనే సిబ్బంది పార్లమెంటులో కేంద్ర ఆర్థిక మంత్రి బడ్జెట్ సమర్పించే వరకూ సుమారు 10 రోజులు ఆర్థికశాఖ ప్రధాన కార్యాలయంలోనే ఉంటారు. వారికి ఇక్కడే వసతి కల్పిస్తారు. బంధువులకు, కుటుంబ సభ్యులకు కూడా సిబ్బంది ఫోన్ చేసుకునే అవకాశం ఉండదు. అత్యవసర పరిస్థితుల్లో సెక్యూరిటీ సిబ్బంది సమక్షంలోనే మాట్లాడాల్సి ఉంటుంది.