క్రెడిట్‌ రిపోర్ట్‌లో చూడాల్సినవి

ఎంత చిన్న లోన్‌ తీసుకోవాలన్నా ప్రస్తుతం క్రెడిట్‌ రిపోర్ట్‌ తప్పనిసరి. మనకున్న పరపతిని తెలిపే ఈ రిపోర్ట్‌లో ఏమాత్రం తేడాలున్నా మనకు అప్పు పుట్టదు. కేవలం క్రెడిట్‌ స్కోర్‌ ఒక్కటే ప్రధానం కాదు. ఆ రిపోర్ట్‌లోని ఇంకా అనేక అంశాలను పరిశీలించిన తర్వాతనే రుణాలను లేదా క్రెడిట్‌ కార్డును జారీ చేస్తారు. అయితే ఒక్కోసారి తప్పుగా నమోదయ్యే వివరాలు మన పరపతి మీద ప్రభావాన్ని చూపిస్తాయి. క్రెడిట్‌ రిపోర్ట్‌ను తరచుగా చూడటం వల్ల ఇలాంటి పొరబాట్లను దిద్దుకోవచ్చు. క్రెడిట్‌ రిపోర్ట్‌లో స్కోర్‌తోపాటు ఇంకేం అంశాలను నిశితంగా పరిశీలించాలో చూద్దాం.

క్రెడిట్‌ అకౌంట్లు-రీపేమెంట్‌ హిస్టరీ
క్రెడిట్‌ రిపోర్ట్‌లో మీరు తీసుకున్న రుణాలు, ఇటీవలే ముగిసిన రుణాల చెల్లింపు వివరాలుంటాయి. వీటిని కొత్తగా రుణాలిచ్చే సంస్థలు నిశితంగా చూస్తాయి. ఎందుకంటే అందులో మీ చెల్లింపు హిస్టరీని మీ క్రమశిక్షణను బేరిజు వేసుకుంటాయి. మీ పరపతిని నిర్ణయించడానికి అదొక కొలమానం. అందుకని మీ క్రెడిట్‌ రిపోర్ట్‌లో ఈ వివరాలు సక్రమంగా నమోదు అయ్యాయో లేదో చూడండి. తప్పుగా ఉంటే సవరించేందుకు సిబిల్‌లో సంప్రదించండి. అలాగే అలా నమోదు రుణాల వివరాలను సరిదిద్దడానికి సంబంధిత సంస్థతో సంప్రదించి సవరించండి. క్రెడిట్‌ కార్డుల రీపేమెంట్‌ హిస్టరీ కూడా ఉంటుంది. రీపేమెంట్‌లో మన ప్రవర్తనను గమనించి, కొత్త రుణాలను ఇవ్వాలా?.. లేదా? నిర్ణయిస్తారు. అందుకనే ఇవి కరెక్టుగా ఉన్నాయో లేదో చూడండి.

క్రెడిట్‌ యుటిలైజేషన్‌ రేషియో
ఇది మరో కీలక అంశం. క్రెడిట్‌ స్కోర్‌ను ప్రభావితం చేస్తుంది. క్రెడిట్‌ లిమిట్‌ను ఎంత వినియోగించారో ఇది తెలుపుతుంది. ఎట్టి పరిస్థితిలోనూ 50 శాతాన్ని దాటానివ్వకండి. క్రెడిట్‌ కార్డు లిమిట్‌ పెంచమని కోరవచ్చుగానీ దానికి కూడా మీ రీపేమెంట్‌ హిస్టరీ చాలా కీలకం. కాబట్టి క్రెడిట్‌ కార్డును ఎంత పరిమితంగా వాడితే అంత మేలు.

ఇందులో పేరు, పాన్‌ నెంబర్‌, మొబైల్‌ నెంబర్‌, అడ్రస్‌ తదితర వివరాలుంటాయి. మీ దరఖాస్తులోని వివరాలకు ఇందులోని వివరాలకు తేడా ఉంటే ఇబ్బందే. అలాగే కేవైసీ వివరాలు కూడా ఎప్పటికప్పడు అప్‌డేట్‌ చేయడం చాలా అవసరం. మొత్తంగా క్రెడిట్‌ రిపోర్ట్‌లో ఎక్కడ తేడా ఉన్నా వెంటనే సిబిల్‌కు లేదా మీకు రుణాలిచ్చిన సంస్థను సంప్రదించి వెంటనే సవరించాలని కోరండి.