ఎల్‌ఐసీ నయా జీవన్‌ ఉత్సవ్‌.. 12 నుంచి సింగిల్‌ ప్రీమియం పాలసీ

ప్రభుత్వ రంగ జీవిత బీమా సంస్థ లైఫ్‌ ఇన్సూరెన్స్‌ కార్పొరేషన్‌ ఆఫ్‌ ఇండియా (ఎల్‌ఐసీ) ఓ సరికొత్త బీమా పథకాన్ని తీసుకొచ్చింది. జీవన్‌ ఉత్సవ్‌ సింగిల్‌ ప్రీమియం (ప్లాన్‌ 883) స్కీమ్‌ ప్రారంభించింది.

ముంబై, జనవరి 6: ప్రభుత్వ రంగ జీవిత బీమా సంస్థ లైఫ్‌ ఇన్సూరెన్స్‌ కార్పొరేషన్‌ ఆఫ్‌ ఇండియా (ఎల్‌ఐసీ) ఓ సరికొత్త బీమా పథకాన్ని తీసుకొచ్చింది. జీవన్‌ ఉత్సవ్‌ సింగిల్‌ ప్రీమియం (ప్లాన్‌ 883) స్కీమ్‌ ప్రారంభించింది. ఈ నెల 12 నుంచి కొనుగోలుదారులకు ఈ పాలసీ అందుబాటులో ఉంటుందని ఎల్‌ఐసీ మంగళవారం ఓ ప్రకటనలో స్పష్టం చేసింది. ఇదిలావుంటే ఇదో నాన్‌-పార్టిసిపేటెడ్‌, నాన్‌-లింక్డ్‌, ఇండివిడ్యువల్‌, సేవింగ్స్‌, హోల్‌ లైఫ్‌ ఇన్సూరెన్స్‌ ప్లాన్‌. గ్యారంటీడ్‌ అడిషన్స్‌ పీరియడ్‌లో పాలసీదారులకు నిర్దిష్ట ప్రయోజనాలుంటాయి. ఇక ఈ ప్లాన్‌ యూనిక్‌ ఐటెంటిఫికేషన్‌ నెంబర్‌ 512N392V01.

• 30 రోజుల దగ్గర్నుంచి 65 ఏండ్లదాకా అందరూ ఈ ప్లాన్‌కు అర్హులే.
• కనీస బీమా రూ.5 లక్షలు. గరిష్ఠ పరిమితి లేదు. అయినప్పటికీ సంస్థ బోర్డు విధివిధానాలకు లోబడి ఉంటుంది.
• గ్యారంటీడ్‌ అడిషన్‌ వ్యవధిలో పూర్తయిన ప్రతి ఏడాదికీ కనీస బీమా మొత్తంలోని ఒక్కో వెయ్యి రూపాయలకు రూ.40 చొప్పున ప్రయోజనం.
• సర్వైవల్‌ బెనిఫిట్‌గా పాలసీదారుడు ఆప్షన్‌ 1-రెగ్యులర్‌ ఇన్‌కమ్‌ బెనిఫిట్‌, ఆప్షన్‌ 2-ఫ్లెక్సీ ఇన్‌కమ్‌ బెనిఫిట్‌లను ఎంచుకోవచ్చు.
• రెగ్యులర్‌ ఇన్‌కమ్‌ బెనిఫిట్‌లో బీమాలోని 10 శాతాన్ని పూర్తయిన ప్రతి పాలసీ ఇయర్‌కు చెల్లిస్తారు. పాలసీ మొదలైన 7 ఏండ్ల తర్వాత నుంచి 17 ఏండ్ల వరకు పాలసీదారులు ఈ ఆప్షన్‌ను ఎంచుకోవచ్చు.
• పాలసీదారులు ఫ్లెక్సీ ఇన్‌కమ్‌ బెనిఫిట్‌నూ ఎంచుకోవచ్చు. ఇందులో 5.5 శాతం వార్షిక వడ్డీని ఎల్‌ఐసీ చెల్లిస్తుంది. మరిన్ని ప్రయోజనాలూ ఉంటాయి.
• మరణానంతర ప్రయోజనం కింద పాలసీదారునికి గ్యారంటీడ్‌ అడిషన్స్‌ ఉంటాయి. పాలసీ కూడా కొనసాగుతుంది. దురదృష్టవశాత్తు పాలసీదారుడు చనిపోతే బేసిక్‌ సమ్‌ అష్యూర్డ్‌ పెరుగుతుంది.
• పాలసీపై రుణాలు లభిస్తాయి.
• ఆకర్షణీయమైన అధిక బీమా రిబేటు ఉంటుంది.
• అర్హత ఉంటే పాలసీ నిబంధనలకు లోబడి ఎల్‌ఐసీ ప్రమాద మృతి, దివ్యాంగ ప్రయోజన రైడర్‌తోపాటు ఎల్‌ఐసీ కొత్త టర్మ్‌ అస్యూరెన్స్‌ రైడర్‌ అందుబాటులో ఉంటుంది. ఇందుకు అదనపు ప్రీమియం చెల్లించాల్సి ఉంటుంది.
• కాగా, గత ఏడాది ఎల్‌ఐసీ.. ప్రొటెక్షన్‌ ప్లస్‌ (ప్లాన్‌ 886), బీమా కవచ్‌ (ప్లాన్‌ 887), జన్‌ సురక్షణ్‌ (ప్లాన్‌ 880), బీమా లక్ష్మి (ప్లాన్‌ 881), స్మార్ట్‌ పెన్షన్‌ ప్లాన్‌ (ప్లాన్‌ 879)లను పరిచయం చేసిన విషయం తెలిసిందే. ఇక ఇటీవలే ఆగిపోయిన పాలసీల పునరుద్ధరణకూ సంస్థ అవకాశం ఇచ్చిన సంగతి విదితమే. ఆలస్య రుసుములో 30 శాతం మేర రాయితీ ఇస్తున్నది. రెండు నెలలపాటు ఈ అవకాశం ఉంటుంది.