HDFC Bank Data Breach | షాకింగ్‌ న్యూస్‌.. డార్క్‌ వెబ్‌లో హెచ్‌డీఎఫ్‌సీ బ్యాంక్‌ వినియోగదారుల డేటా లీక్‌?

HDFC | దేశంలోని ప్రైవేటు రంగ బ్యాంకుల్లో అతి పెద్దదైన హెచ్‌డీఎఫ్‌సీ బ్యాంకు వినియోగదారులు ఆపదలో చిక్కుకున్నారు. వారి వ్యక్తిగత వివరాలకు సంబంధించిన 7.5 జీబీ డాటా లీకైంది. ఓ ప్రఖ్యాత అండర్‌గ్రౌండ్‌ హ్యాకర్‌ ఫోరంకు చెందిన వినియోగదారుడు ఈ డాటాను డార్క్‌వెబ్‌లో పోస్టు చేయడంతోపాటు ఉచితంగా ఆ డాటాను డౌన్‌లోడ్‌ చేసుకునేలా చేశాడు.

HDFC Bank Data Breach | న్యూఢిల్లీ, మార్చి 6: దేశంలోని ప్రైవేటు రంగ బ్యాంకుల్లో అతి పెద్దదైన హెచ్‌డీఎఫ్‌సీ బ్యాంకు వినియోగదారులు ఆపదలో చిక్కుకున్నారు. వారి వ్యక్తిగత వివరాలకు సంబంధించిన 7.5 జీబీ డాటా లీకైంది. ఓ ప్రఖ్యాత అండర్‌గ్రౌండ్‌ హ్యాకర్‌ ఫోరంకు చెందిన వినియోగదారుడు ఈ డాటాను డార్క్‌వెబ్‌లో పోస్టు చేయడంతోపాటు ఉచితంగా ఆ డాటాను డౌన్‌లోడ్‌ చేసుకునేలా చేశాడు.

లీక్‌ అయిన డాటాలో హెచ్‌డీఎఫ్‌సీ బ్యాంకు వినియోగదారుల పూర్తి పేర్లు, పుట్టిన తేదీలు, వయసు, ఫోన్‌నంబర్లు, వ్యక్తిగత ఈ-మెయిల్‌, వైవాహిక స్థితి, నివాస, శాశ్వత చిరునామాలు, పిన్‌కోడ్లు, ఉద్యోగ, రుణ సమాచారం, లావాదేవీల పద్ధతులు, క్రెడిట్‌ స్కోర్లు సహా పలు ఇతర వివరాలు ఉన్నట్టు ఆ హ్యాకర్‌ తన పోస్టులో పేర్కొన్నాడు. దాన్ని బలపర్చేలా కొన్ని ‘డాటా శాంపిళ్ల’ను కూడా పోస్టు చేశాడు. వాటి స్క్రీన్‌షాట్లలో హెచ్‌డీఎఫ్‌సీ బ్యాంకు వినియోగదారుల ఖాతా నంబర్లు, కస్టమర్‌ ఐడీలు, పాస్‌వర్డ్‌లు, పిన్‌ నంబర్లు మినహా వారి పేర్లు, ఇంటి పేర్లు, అప్లికేషన్‌ స్టేటస్‌ తదితర వివరాలన్నీ కనిపిస్తున్నాయి. ఇవన్నీ డౌన్‌లోడ్‌ చేసుకునేందుకు సిద్ధంగా ఉన్నాయి. అయితే, తమ బ్యాంక్‌ నుంచి డాటా లీక్‌ అయ్యే చాన్సే లేదని బ్యాంక్‌ వివరణ ఇచ్చింది. తమ వ్యవస్థను వేరేవాళ్లు యాక్సెస్‌ చేసే అవకాశమే లేదని స్పష్టం చేసింది.