Bournvita | అది ఎంత మాత్రమూ హెల్త్ డ్రింక్ కాదు.. ఈ-కామర్స్ సంస్థలకు స్పష్టం చేసిన కేంద్రం

Bournvita | బోర్నవిటాతోపాటు ఇతర కూల్ డ్రింక్స్ / బేవరేజెస్‌ను హెల్త్ డ్రింక్ క్యాటగిరీ నుంచి తొలగించాలని ఈ-కామర్స్ సంస్థలను కేంద్ర వాణిజ్య, పరిశ్రమలశాఖ ఆదేశించింది.

Bournvita | బోర్నవిటాతోపాటు ఇతర కూల్ డ్రింక్స్ / బేవరేజెస్‌ను హెల్త్ డ్రింక్ క్యాటగిరీ నుంచి తొలగించాలని ఈ-కామర్స్ సంస్థలను కేంద్ర వాణిజ్య, పరిశ్రమలశాఖ ఆదేశించింది. ‘పిల్లల హక్కుల పరిరక్షణ చట్టం-2005లోని మూడో సెక్షన్ కింద ఏర్పాటు చేసిన జాతీయ పిల్లల హక్కుల రక్షణ కమిషన్ (ఎన్సీపీసీఆర్) నిర్వహించిన విచారణ ప్రకారం ఆహార భద్రతా ప్రమాణాల చట్టం-2006 ప్రకారం దేన్ని ‘హెల్త్ డ్రింక్‌’గా నిర్వచించలేదని తేలిందని ఈ నెల 10న కేంద్ంర జారీ చేసిన నోటిఫికేషన్ లో తెలిపింది. కనుక బోర్నవిటాతోపాటు ఇతర కూల్ డ్రింక్స్, బేవరెజెస్‌ను ‘హెల్త్ డ్రింక్’ క్యాటగిరీ నుంచి తొలగించాలని కేంద్రం ఈ-కామర్స్ సంస్థలను ఆదేశించింది.

బోర్నవిటాలో పంచదార ఎక్కువగా ఉందంటూ ఓ సోషల్ మీడియా ఇన్‌ఫ్లూయెన్సర్ ఒక వీడియో పోస్ట్ చేయడంతో ఈ సంగతి బయట పడింది. బోర్నవిటాలోని కొన్ని పదార్థాలు పిల్లలకు హాని కలిగించేలా ఉన్నాయని పేర్కొన్నాడు. ఆ వ్యక్తికి బోర్నవిటా తయారీ సంస్థ మాండెలెజ్ ఇండియా లీగల్ నోటీసు పంపింది. దీంతో సదరు సోషల్ మీడియా ఇన్‌ఫ్లూయెన్సర్.. ఆ వీడియోనూ అన్ని సోషల్ మీడియా వేదికల నుంచి డిలిట్ చేసినా, దీనిపై ఫిర్యాదు అందడంతో ఎన్సీపీసీఆర్ విచారించింది. అనుమతించిన దానికంటే ఎక్కువగా బోర్నవిటాలో చక్కెర ఉందని గుర్తించింది. తప్పుదోవ పట్టించే ప్రకటనలు మానుకోవాలని మాండలెజ్ ఇండియాకు నోటీసులు కూడా జారీ చేసిన నేపథ్యంలో కేంద్రం తాజా ఆదేశాలకు ప్రాధాన్యం ఏర్పడింది.