Oyo : టెక్, సోషల్మీడియా సంస్థలతో పాటు ఫుడ్ డెలివరీ యాప్ జొమాటోలో కూడా ఈమధ్య భారీ సంఖ్యలో ఉద్యోగులను తొలగిస్తున్నాయి. తాజాగా హోటల్ సర్వీస్ అందించే ఒయో కంపెనీ కూడా ఉద్యోగులను ఇంటికి పంపించనుంది. దాదాపు 600 మందిని తొలగిస్తున్నట్టు ఒయో శనివారం వెల్లడించింది. అంటే.. ప్రస్తుతం ఉన్న 3,700 మందిలో 10 శాతం మంది ఇంటిదారి పట్టనున్నారు. అంతేకాదు సేల్స్ విభాగంలో 250 మంది కొత్తవాళ్లను తీసుకుంటామని కంపెనీ తెలిపింది. వీళ్లకు వ్యాపార వృద్ధి, అనుబంధాల నిర్వహణ బాధ్యతలు అప్పగించనుంది. కంపెనీని లాభాల బాట పట్టించేందుకు, నిర్వహణ వ్యయం తగ్గించుకునేందుకు ఒయో ఈమధ్య భారీ మార్పులు చేపట్టింది. ఆ క్రమంలోనే ఉద్యోగుల తొలగింపు నిర్ణయం తీసుకుంది. ఈ నిర్ణయంతో ప్రొడక్ట్, ఇంజనీర్ల మీద ప్రభావం పడనుంది.
ఒయో స్టార్టప్ను రితేశ్ అగర్వాల్ 2012లో ప్రారంభించాడు. ఒయో రూమ్స్ను హోటల్స్, హోమ్ అని కూడా పిలుస్తారు. హోటళ్లను లీజుకు లేదా ఫ్రాంఛైజ్కు ఇస్తుంది. ఒయో అధికారులు మొదట్లో బడ్జెట్ హోటళ్లకే ప్రాధాన్యం ఇచ్చేవాళ్లు. 2020 నాటికి 80 దేశాల్లోని 800 పట్టణాలకు ఒయో కంపెనీ విస్తరించింది. ప్రస్తుతం ఒయో చేతిలో 10 లక్షలకు పైగా రూమ్స్ ఉన్నాయి.