Visit:
Facebook | ప్రముఖ సోషల్‌ మీడియా ప్లాట్‌ఫామ్‌ ఫేస్‌బుక్‌ వీడియో షేరింగ్‌ విధానంలో కీలక మార్పులు చేస్తూ నిర్ణయం తీసుకున్నది. ఫేస్‌బుక్‌లపై అప్‌లోడ్‌ చేయనున్న వీడియోలన్నీ ఇకపై రీల్స్‌ ఫార్మాట్‌లో మాత్రమే అప్‌డేట్‌ అవుతాయని ప్రకటించింది. చిన్న వీడియో అయినా, లెన్త్‌ వీడియో అయినా రీల్స్‌ ఫార్మాట్‌లోనే పబ్లిష్‌ అవుతాయని స్పష్టం చేసింది. యూజర్లు వీడియో కంటెంట్‌ను ఎలా సృష్టించాలో.. చూసే విధానాన్ని పూర్తిగా మార్చే దిశలో ఈ మార్పు చేసింది. ప్రస్తుతం యూజర్లు వీడియోను రీల్‌గా పోస్ట్‌ చేయాలనుకుంటున్నారా? సాధారణ వీడియో పోస్ట్‌గా చేయాలనుకుంటున్నారా? అని నిర్ణయించుకునే అవకాశం ఉంది. రెండింటికీ వేర్వేరు ఎడిటింగ్‌ టూల్స్‌ ఉన్నాయి. కానీ, ప్రస్తుతం మెటా నిర్ణయం తర్వాత రీల్స్‌.. సాధారణ వీడియో పోస్ట్‌ మధ్య తేడా ముగియనున్నది. ఇకపై వీడియోలన్నీ స్పెషల్‌ సిస్టమ్‌ ద్వారా నిర్వహిస్తారు. ఇందులో రీల్‌ వ్యవధి, ఫార్మాట్‌లపై పరిమితులు తొలగించనున్నారు.
ఇప్పటి వరకు ఫేస్‌బుక్‌లో రీల్స్‌ నిలువగా.. తక్కువ వ్యవధి మాత్రమే ఉండేది. ఇకపై లాంగ్‌ లెన్త్‌ వీడియోలు సైతం అప్‌లోడ్‌ చేసే వీలు కలుగనున్నది. దాంతో పాటు గోప్యతా సెట్టింగ్స్‌, పబ్లిషింగ్‌ కంట్రోల్స్‌ సైతం మార్పులుంటాయని తెలిపింది. ఫీడ్‌, రీల్స్‌ రెండింటికీ ఆడియన్స్‌ సెట్టింగ్స్‌ ఒకేలా ఉంటాయని.. యూజర్లు ఎంచుకున్న ప్రైవసీ సెట్టింగ్స్‌ అన్ని వీడియో కంటెంట్‌కు వర్తిస్తాయని మెటా కంపెనీ పేర్కొంటున్నది. ఈ కొత్త సిస్టమ్‌ అమలులోకి వచ్చిన తర్వాత.. యూజర్లు తమ ప్రైవసీ సెట్టింగ్స్‌ను సమీక్షించుకోవాలని.. అవసరమైన మార్పులు చేసుకోవాలనే నోటిఫికేషన్‌ వస్తుందని.. ఈ సమయంలోనే సమీక్షించుకొని.. అవసరమైన మార్పులు చేసుకోవాలని సూచించింది. దాంతో వీడియోలు చూపించాలనుకుంటున్న ఆడియన్స్‌కు మాత్రమే చేరుతాయని.. అది ఫ్రెండ్స్‌ అయినా.. ఏదైనా గ్రూప్‌ అయినా.. జనరల్‌ ఆడియన్స్‌ అయినా అని చెప్పింది.
