అదానీ కంపెనీల ఔట్‌లుక్‌ నెగెటివ్‌.. తగ్గిన నాలుగు సంస్థల రేటింగ్‌

అదానీ గ్రూప్‌ కంపెనీల రేటింగ్‌ ఔట్‌లుక్‌కు మూడీస్‌ తాజాగా కోత పెట్టింది. గ్రూప్‌లోని నాలుగు సంస్థల ఔట్‌లుక్‌ను ‘నెగెటివ్‌'గా మార్చింది.

• స్టేబుల్‌ హోదాను దూరం చేసిన మూడీస్‌
• స్టాక్‌ మార్కెట్లలో నష్టాలే కారణం.. కొనసాగుతున్న హిండెన్‌బర్గ్‌ సెగ

గౌతమ్‌ అదానీకి మరో ఎదురుదెబ్బ. ఇప్పటికే ఓవైపు స్టాక్‌ మార్కెట్లలో నష్టాలు, మరోవైపు బాండ్‌ మార్కెట్లలో కష్టాలను ఎదుర్కొంటున్న అదానీ సంస్థలకు.. గ్లోబల్‌ రేటింగ్‌ ఏజెన్సీ మూడీస్‌ రూపంలో ఇంకో షాక్‌ తగిలింది.

న్యూఢిల్లీ, ఫిబ్రవరి 10: అదానీ గ్రూప్‌ కంపెనీల రేటింగ్‌ ఔట్‌లుక్‌కు మూడీస్‌ తాజాగా కోత పెట్టింది. గ్రూప్‌లోని నాలుగు సంస్థల ఔట్‌లుక్‌ను ‘నెగెటివ్‌’గా మార్చింది. అమెరికా షార్ట్‌ సెల్లర్‌ హిండెన్‌బర్గ్‌ రిసెర్చ్‌ రిపోర్టు నేపథ్యంలో అదానీ గ్రూప్‌ సంస్థల మార్కెట్‌ విలువ లక్షల కోట్ల రూపాయల్లో హరించుకుపోతున్న విషయం తెలిసిందే. ఈ క్రమంలో గౌతమ్‌ అదానీకి చెందిన పలు సంస్థలను స్థిరత్వం నుంచి ప్రతికూలంలోకి మూడీస్‌ సవరించింది.

ఏయే సంస్థలకు దెబ్బ

అదానీ గ్రీన్‌ ఎనర్జీ లిమిటెడ్‌, అదానీ గ్రీన్‌ ఎనర్జీ రెస్ట్రిక్టెడ్‌ గ్రూప్‌, అదానీ ట్రాన్స్‌మిషన్‌ స్టెప్‌-వన్‌ లిమిటెడ్‌, అదానీ ఎలక్ట్రిసిటీ ముంబై లిమిటెడ్‌ల రేటింగ్‌ ఔట్‌లుక్‌ను స్టేబుల్‌ నుంచి నెగెటివ్‌లోకి మూడీస్‌ ఇన్వెస్టర్‌ సర్వీస్‌ శుక్రవారం మార్చింది. హిండెన్‌బర్గ్‌ నివేదిక నేపథ్యంలో స్టాక్‌ మార్కెట్లలో అదానీ కంపెనీలు తీవ్ర నష్టాలను చవిచూస్తుండటమే ఇందుకు కారణమని మూడీస్‌ ఈ సందర్భంగా ఓ ప్రకటనలో స్పష్టం చేసింది. ‘బీఏ3’ హోదానే ఉంచింది.

ఏం జరుగుతుంది?

• మార్కెట్‌లోని ఏ సంస్థ ఆర్థిక పరిపుష్ఠికైనా మూడీస్‌ వంటి ఏజెన్సీల రేటింగ్సే కొలమానం
• ఈ రేటింగ్స్‌ బాగుంటే సంస్థ పరపతి కూడా అన్నివిధాల బాగుంటుంది
• నిధుల సమీకరణ, బాండ్ల విక్రయాలు రేటింగ్స్‌ ఆధారంగానే సజావుగా సాగుతాయి.
• తక్కువ వడ్డీరేట్లతో బాండ్లు జారీ చేసేది కూడా రేటింగ్‌ బాగుంటేనే
• పెట్టుబడులు, ప్రాజెక్టుల రాక, వ్యాపార కార్యకలాపాలకూ రేటింగ్స్‌ దోహదం
• మూడీస్‌ విషయానికే వస్తే.. ఏఏఏ దగ్గర్నుంచి సీదాకా రేటింగ్స్‌ను ఇస్తున్నది.
• కంపెనీల రేటింగ్‌ ఔట్‌లుక్‌ మార్పులపై భారీ మూలధన వ్యయం, రుణాల ప్రభావం