తెలంగాణలో మారుతి డ్రైవింగ్‌ లైసెన్స్‌ టెస్ట్‌ ట్రాక్‌లు

కార్ల తయారీలో అగ్రగామి సంస్థయైన మారుతి సుజుకీ..తెలంగాణ వ్యాప్తంగా ఆరు ప్రాంతాల్లో 12 ఆటోమేటెడ్‌ డ్రైవింగ్‌ లైసెన్స్‌ టెస్ట్‌ ట్రాక్‌లను ఏర్పాటు చేయబోతున్నట్టు ప్రకటించింది.

న్యూఢిల్లీ, నవంబర్‌ 5: కార్ల తయారీలో అగ్రగామి సంస్థయైన మారుతి సుజుకీ..తెలంగాణ వ్యాప్తంగా ఆరు ప్రాంతాల్లో 12 ఆటోమేటెడ్‌ డ్రైవింగ్‌ లైసెన్స్‌ టెస్ట్‌ ట్రాక్‌లను ఏర్పాటు చేయబోతున్నట్టు ప్రకటించింది. ఇందుకు సంబంధించి తెలంగాణ రవాణా శాఖతో ఒప్పందాన్ని కుదుర్చుకున్నది.

రంగారెడ్డి జిల్లాలో ఇబ్రహీంపట్నం, కొండాపూర్‌ వద్ద ఈ టెస్టింగ్‌ ట్రాక్‌లను ఏర్పాటు చేయనుండగా..అలాగే మేడ్చల్‌ జిల్లాలో ఉప్పల్‌, మేడ్చల్‌, నాగోల్‌తోపాటు కరీంనగర్‌ జిల్లాల్లో నెలకొల్పబోతున్నది. కేంద్ర మోటర్‌ వాహన నిబంధనలకు అనుగుణంగా పూర్తిగా కంప్యూటరైజ్డ్‌, నియమ ఆధారిత పరీక్షలను నిర్వహించడానికి వీలుగా ఈ ట్రాక్‌లో హై-డెఫినిషన్‌ కెమెరాలు, ఆర్‌ఎఫ్‌ఐడీ సెన్సార్లు, రియల్‌-టైమ్‌ అనలిటిక్స్‌, ఒక సమీకృత ఐటీ వ్యవస్థ ఉంటుందని మారుతి సుజుకీ ఒక ప్రకటనలో వెల్లడించింది.