వృద్ధి అవకాశాలకు ఢోకా లేదు.. దేశీయ బీమా రంగంపై ఎల్‌ఐసీ సీఈవో దొరైస్వామి ధీమా

రాబోయే సంవత్సరాల్లో పొదుపు, రక్షణ, రిటైర్మెంట్‌ ప్రొడక్ట్స్‌కు దేశీయ మార్కెట్‌లో గొప్ప డిమాండ్‌ ఉంటుందని ప్రభుత్వ రంగ బీమా దిగ్గజ సంస్థ భారతీయ లైఫ్‌ ఇన్సూరెన్స్‌ కార్పొరేషన్‌ (ఎల్‌ఐసీ) సీఈవో, ఎండీ ఆర్‌ దొరైస్వామి విశ్వాసం వ్యక్తం చేశారు.

న్యూఢిల్లీ, సెప్టెంబర్‌ 1: రాబోయే సంవత్సరాల్లో పొదుపు, రక్షణ, రిటైర్మెంట్‌ ప్రొడక్ట్స్‌కు దేశీయ మార్కెట్‌లో గొప్ప డిమాండ్‌ ఉంటుందని ప్రభుత్వ రంగ బీమా దిగ్గజ సంస్థ భారతీయ లైఫ్‌ ఇన్సూరెన్స్‌ కార్పొరేషన్‌ (ఎల్‌ఐసీ) సీఈవో, ఎండీ ఆర్‌ దొరైస్వామి విశ్వాసం వ్యక్తం చేశారు. దేశంలో ఇప్పటికీ బీమా పాలసీదారులు తక్కువగానే ఉండటం, పెరుగుతున్న కుటుంబ ఆదాయాలు, ఆర్థిక అవగాహన, దీర్ఘకాల ఆయుర్దాయం, దేశ జీడీపీ ప్రగతి.. అన్ని కూడా ఇందుకు దోహదం చేస్తాయన్న ధీమాను కనబర్చారు. మంగళవారం ఎల్‌ఐసీ 70వ వ్యవస్థాపక దినోత్సవం సందర్భంగా ఆయన మాట్లాడుతూ.. డిమాండ్‌కు తగ్గట్టుగా పాలసీలను తీసుకొస్తున్నామని చెప్పారు.

ఈ క్రమంలోనే తమ పంపిణీ, ఉత్పత్తి కలగలిసిన విధానం మరింత పోటీయుతంగా ఉంటుందని, నేటి యువ కస్టమర్లకు వీలుగా డిజిటల్‌ మార్కెట్‌లోనూ దూకుడు పెంచామని.. ఇది ఎల్‌ఐసీ తదుపరి అధ్యాయాన్ని నిర్వచించగలదని వివరించారు. పార్లమెంట్‌ చట్టం ద్వారా 1956 సెప్టెంబర్‌ 1న ఎల్‌ఐసీ ప్రారంభమైన విషయం తెలిసిందే. ఇదిలావుంటే గత ఆర్థిక సంవత్సరం కంపెనీ మొత్తం ప్రీమియం ఆదాయం రూ.5,35,984 కోట్లకు పెరిగింది. లాభం రికార్డు స్థాయిలో రూ.57,419 కోట్లుగా ఉన్నది. 2.5 కోట్ల వ్యక్తిగత, మెచ్యూరిటీ క్లెయిమ్‌లను ప్రాసెస్‌ చేశారు. అలాగే 2025-26కుగాను రూ.10 ముఖ విలువ కలిగిన ప్రతి ఈక్విటీ షేర్‌కు రూ.10 తుది డివిడెండ్‌ను ఎల్‌ఐసీ బోర్డు సిఫార్సు చేసింది. 2022లో ఐపీవో ద్వారా సంస్థ 3.5 శాతం వాటాను అమ్మి దేశీయ స్టాక్‌ మార్కెట్లలో నమోదైన సంగతి విదితమే. ఇక గత నెలలో జరిగిన ఆఫర్‌ ఫర్‌ సేల్‌లో 6.5 శాతం సర్కారీ వాటాను అమ్మకానికి పెట్టగా.. రూ.31,552 కోట్లు ఖజానాకు వచ్చాయి.

కొత్త పాలసీలు..: 70వ వార్షికోత్సవం సందర్భంగా ఎల్‌ఐసీ మంగళవారం రెండు ఆకర్షణీయమైన, సరికొత్త పాలసీలను పరిచయం చేసింది. బీమా ప్లాటినమ్‌, జీవన్‌ రక్ష పేరిట వీటిని సంస్థ ఎండీ దొరైస్వామి ఆవిష్కరించారని ఓ ప్రకటనలో ఎల్‌ఐసీ తెలిపింది.

బీమా ప్లాటినమ్‌

• ఇదో నాన్‌-పార్టిసిపేటరీ, నాన్‌-లింక్డ్‌, ఇండివీడ్యువల్‌ ప్లాన్‌.
• ఈ పరిమిత ప్రీమియం ప్లాన్‌లో సేవింగ్స్‌, రక్షణ రెండూ పాలసీదారులకు లభిస్తాయి.
• పాలసీ వ్యవధిలో ప్రీమియం చెల్లించినంతకాలం వార్షిక ప్రీమియంలో ప్రతి రూ.1,000కి రూ.70 చొప్పున గ్యారెంటీడ్‌ ఆడిషన్స్‌.
• ప్రీమియం చెల్లిస్తున్నప్పుడు ముగిసిన ప్రతి ఏడాదికి బీమా మొత్తంలో 10 శాతానికి సమానమైన రెగ్యులర్‌ ఆదాయ ప్రయోజనం.
• ప్రస్తుత ఎల్‌ఐసీ పాలసీదారులతోపాటు మరణించిన పాలసీదారుల నామినీలు/లబ్ధిదారులకు రిబేట్‌ సౌకర్యం ఉంటుంది.
• పాలసీదారులు రకరకాల రైడర్‌ బెనిఫిట్స్‌తో కవరేజీని పెంచుకోవచ్చు.

జీవన్‌ రక్ష

• ఇదో నాన్‌-పార్టిసిపేటరీ, నాన్‌-లింక్డ్‌, పూర్తి ప్రమాద బీమా ప్లాన్‌.
• పాలసీ వ్యవధిలో పాలసీదారుడు దురదృష్టవశాత్తు చనిపోతే వారి కుటుంబ సభ్యులకు ఈ బీమాతో ఆర్థిక రక్షణ లభిస్తుంది.
• మరణానంతర బీమా ప్రయోజనాల చెల్లింపు వాస్తవిక అనుభవంతో సంబంధం లేకుండా గ్యారెంటీడ్‌, ఫిక్స్‌డ్‌గా ఉంటాయి.
• ఈ పాలసీకి బోనస్‌ వంటి ఎటువంటి విచక్షణాపూర్వక ప్రయోజనాలు లేదా మిగులుతో వాటా దక్కదు.
• కనీస బీమా రూ.5 లక్షలు. గరిష్ఠం రూ.24 లక్షలు (నిబంధనలకు లోబడి).
• సింగిల్‌, రెగ్యులర్‌, లిమిటెడ్‌ ప్రీమియంలలో ఏదైనా ఎంచుకోవచ్చు.
• మహిళలకు ప్రత్యేక రేట్లు అందుబాటులో ఉంటాయి.