భూములు వాపస్‌!

March 30, 2021 / 02:14 AM IST

నిరుపయోగంగా పరిశ్రమల భూములు
1184 ఎకరాలు స్వాధీనం చేసుకున్న టీఎస్‌ఐఐసీ
కొత్త సంస్థలకు కేటాయింపు ప్రక్రియ ప్రారంభం

హైదరాబాద్‌, మార్చి 29 (నమస్తే తెలంగాణ): ఉమ్మడి రాష్ట్రంలో పరిశ్రమల స్థాపన కోసం తీసుకొని నిరుపయోగంగా ఉంచిన వందల ఎకరాల భూములను ప్రభుత్వం తిరిగి వెనుకకు తీసుకుంది. నిరుపయోగంగా ఉన్న 1184 ఎకరాలను గుర్తించిన టీఎస్‌ఐఐసీ వాటిని స్వాధీనం చేసుకొని ఇతర సంస్థలకు కేటాయిస్తున్నది. ఉమ్మడి రాష్ట్రంలో వైఎస్‌ రాజశేఖర్‌రెడ్డి ముఖ్యమంత్రిగా ఉన్నప్పుడు అనేక సంస్థలకు నామమాత్రపు ధరలకే భూములు కేటాయించారు. ఆ భూముల్లో కొన్ని సంస్థలు పరిశ్రమలు స్థాపించగా మరికొన్ని నిరుపయోగంగా ఉంచాయి. మరికొన్ని సంస్థలు ఇతర అవసరాలకు వినియోగిస్తున్నాయి. ఇప్పటివరకు 18 సంస్థల నుంచి 1184 ఎకరాల భూములను టీఎస్‌ఐఐసీ వెనుకకు తీసుకుంది. బ్రాహ్మణి ఇన్‌ఫ్రాటెక్‌, ఇందూటెక్‌ జోన్‌, స్మార్ట్‌ ఆగ్రో ఫుడ్‌పార్క్‌, ఎన్వీ డిస్టిలరీస్‌, ఎంఎల్‌ఆర్‌ మోటర్స్‌ తదితర సంస్థలు తాము తీసుకున్న భూముల్లో పరిశ్రమలు స్థాపించాయి. నిబంధనల ప్రకారం భూములు కేటాయించిన రెండ్లేలోపు పరిశ్రమలు స్థాపించి, ఉత్పత్తి ప్రారంభించాలి. లేకుండా ఆ భూములను ప్రభుత్వం తిరిగి స్వాధీనం చేసుకుంటుంది. తెలంగాణ ఏర్పడ్డాక పరిశ్రమల స్థాపనకు ప్రాధాన్యం ఇస్తున్న రాష్ట్ర ప్రభుత్వం గతంలో జరిగిన భూకేటాయింపులను సమీక్షిస్తున్నది. కొన్ని భూములపై కోర్టు కేసులున్నాయని, సమర్థమైన వాదనలు వినిపించి వాటిని కూడా స్వాధీనం చేసుకొనేందుకు ప్రయత్నిస్తున్నామని అధికారులు తెలిపారు.

వివిధ సంస్థల నుంచి స్వాధీనం చేసుకున్న భూముల వివరాలు

సం. కంపెనీ పేరు ఇండస్ట్రియల్‌ పార్కు భూమి (ఎకరాల్లో)
1. ఎక్స్‌ఎల్‌ టెలికాం ఫ్యాబ్‌ సిటీ సెజ్‌ 10.00
2. కేఎస్‌కే సూర్య ఫొటోఓల్టెయెక్‌ఫ్యాబ్‌ సిటీ సెజ్‌ 25.00
3. ఓరియెంట్‌ క్రాఫ్ట్‌ లిమిటెడ్‌ ఏఈపీ గుండ్లపోచంపలి 19.00
4. బ్రాహ్మణి ఇన్‌ఫ్రాటెక్‌ ప్రై.లి. హార్డ్‌వేర్‌ పార్క్‌, మామిడిపల్లి 250.00
5. ఇందూటెక్‌ జోన్‌ హార్డ్‌వేర్‌ పార్క్‌, మామిడిపలి 250.00
6. టెక్‌ఫోర్స్‌ హార్డ్‌వేర్‌ పార్క్‌, మామిడిపల్లి 2.00
7. మెగాసాఫ్ట్‌(విజువల్‌ సాఫ్ట్‌) ఐటీ పార్క్‌, నానక్‌రామ్‌గూడ 8.00
8. అలెగ్జాండ్రియా బయోటెక్‌ పార్క్‌ 13.00
9. గోకల్‌దాస్‌ ఇమేజెస్‌ ఐడీఏ నాచారం 8.00
10. లోంజా ఇండియా ప్రై.లి. బయోటెక్‌ పార్క్‌ 10.00
11. ఎంఎల్‌ఆర్‌ మోటర్స్‌ ఆటోమోటివ్‌ పార్క్‌ 100.00
12. హిందూజా ఫౌండ్రీస్‌ ఆటోమోటివ్‌ పార్క్‌ 60.00
13. హిందూజా ఫౌండ్రీస్‌ ఉప్పల్‌ 6.00
14. లైట్‌ క్రియేట్‌ ఐపీ పాశమైలారం 80.00
15. స్మార్ట్‌ ఆగ్రోఫుడ్‌ పార్క్‌ లక్కంపల్లి 200.00
16. ఎన్వీ డిస్టిలరీస్‌ దామరకుంట 132.00
17. బయోవిన్‌ కర్కపట్ల 10.00
18. తాజ్‌ జీవీకే హోటల్స్‌ హార్డ్‌వేర్‌ పార్క్‌, మామిడిపల్లి 1.00
మొత్తం 1184.00