యూనీకార్న్‌ల జోరు

• తృతీయస్థానంలోకి భారత్‌

హైదరాబాద్‌, డిసెంబర్‌ 22: దేశంలో ‘యూనీకార్న్‌’ హోదాకు ఎదుగుతున్న స్టార్టప్‌ల సంఖ్య గణనీయంగా పెరుగుతోంది. ఈ ఒక్క ఏడాదిలోనే 33 యూనీకార్న్‌లు అయ్యాయి. దీంతో యూనీకార్న్‌ల మొత్తం సంఖ్యలో బ్రిటన్‌ స్థానాన్ని భారత్‌ ఆక్రమించి, ప్రపంచంలో తృతీయస్థానానికి చేరింది. 1 బిలియన్‌ డాలర్ల (దాదాపు రూ.7,500 కోట్లు) విలువను చేరిన స్టార్టప్‌ను యూనీకార్న్‌గా వ్యవహరిస్తారు. హురున్‌ రీసెర్చ్‌ ఇనిస్టిట్యూట్‌ బుధవారం విడుదల చేసిన రిపోర్ట్‌ ప్రకారం ప్రస్తుతం భారత్‌లో 54 యూనీకార్న్‌లు ఉండగా, బ్రిటన్‌లో వాటి సంఖ్య 39కు పరిమితమయ్యింది. బ్రిటన్‌లో ఈ ఏడాది 15 యూనీకార్న్‌లుగా ఎదిగాయి. ప్రధమస్థానంలో ఉన్న అమెరికాలో ఈ సంవత్సరం కొత్తగా 254 సంస్థలు ఈ హోదాను సంపాదించడంతో అక్కడ యూనీకార్న్‌ల సంఖ్య 487కు పెరిగింది. 301 యూనీకార్న్‌లతో చైనా ద్వితీయస్థానంలో ఉంది. ఈ దేశంలో 2021లో నూతనంగా 74 సంస్థలు యూనీకార్న్‌ హోదాలోకి వచ్చాయి. యూనీకార్న్‌ ప్రపంచంలో 74 శాతం అమెరికా, చైనాల్లోనే ఉన్నాయి.

విదేశాల్లోనూ భారతీయులదే హవా..

భారత్‌లో యూనీకార్న్‌ల సంఖ్య గణనీయంగా పెరగడంతో పాటు విదేశాల్లో ముఖ్యంగా సిలికాన్‌ వ్యాలీలో భారతీయులు నెలకొల్పిన స్టార్టప్‌ల్లో ఈ సంవత్సరం 65 సంస్థలు 1 బిలియన్‌ డాలర్ల మించిన విలువను సాధించాయని హురున్‌ ఇండియా మేనేజింగ్‌ డైరెక్టర్‌ అనాస్‌ రహ్మాన్‌ చెప్పారు. ఇక ఇండియాలోని యూనీకార్న్‌ల విషయానికొస్తే 21 బిలియన్‌ డాలర్ల విలువతో ఎడ్యుటెక్‌ స్టార్టప్‌ బైజూస్‌ అగ్రస్థానాన్ని ఆక్రమించింది. ఈ తర్వాతి స్థానాల్లో ఇన్‌మొబి (12 బిలియన్‌ డాలర్లు), ఓయో (9.5 బిలియన్‌ డాలర్లు), రేజర్‌పే (7.5 బిలియన్‌ డాలర్లు) ఉన్నాయి.