హెచ్‌సీఎల్‌ లాభం 3,283 కోట్లు

• క్యూ1లో రూ.23,464 కోట్ల ఆదాయం
• రూ.10 మధ్యంతర డివిడెండ్‌ ప్రకటించిన సంస్థ

న్యూఢిల్లీ, జూలై 12: దేశీయ ఐటీ దిగ్గజాల్లో ఒకటైన హెచ్‌సీఎల్‌ టెక్‌ నిరాశాజనక ఆర్థిక ఫలితాలు ప్రకటించింది. ప్రస్తుత ఆర్థిక సంవత్సరం తొలి త్రైమాసికానికిగాను రూ.3,283 కోట్ల నికర లాభాన్ని గడించింది. అంతక్రితం ఏడాది ఇదే త్రైమాసికంలో నమోదైన రూ.3,213 కోట్ల లాభంతో పోలిస్తే కేవలం 2.4 శాతం పెరిగింది. సమీక్షకాలంలో కంపెనీ ఆదాయం ఏడాది ప్రాతిపదికన 17 శాతం అధికమై రూ. 23,464 కోట్లుగా నమోదైనట్లు వెల్లడించింది. అంతక్రితం ఏడాది ఇది రూ.20,068 కోట్లుగా ఉన్నది. 2022-23లో ఆదాయం 12-14 శాతం మేర వృద్ధి సాధించనున్నదని గైడెన్స్‌లో పేర్కొంది. ప్రస్తుత ఆర్థిక సంవత్సరం తొలి త్రైమాసికంలో ఆశాజనక పలితాలతో ప్రారంభించినట్లు కంపెనీ సీఈవో, ఎండీ సీ విజయ కుమార్‌ తెలిపారు. సేవల రంగం అధిక వృద్ధిని నమోదు చేసుకున్నదని, డిజిటల్‌ ఇంజినీరింగ్‌, డిజిటల్‌ అప్లికేషన్‌ సేవలు కూడా ఆశాజనక పనితీరు కనబరిచాయన్నారు.

•  ప్రస్తుత ఆర్థిక సంవత్సరానికిగాను రూ.2 ముఖ విలువ కలిగిన ప్రతిషేరుకు రూ.10 మధ్యంతర డివిడెండ్‌ను కంపెనీ బోర్డు ప్రకటించింది.
• మార్చితో ముగిసిన త్రైమాసికంలో నమోదైన రూ.3,599 కోట్ల లాభంతో పోలిస్తే క్యూ1లో వచ్చిన లాభం 8.83 శాతం మేర తగ్గింది.
• డాలర్‌ రూపంలో కంపెనీ ఆదాయం 11.2 శాతం పెరిగి 3,024.9 మిలియన్‌ డాలర్లుగా నమోదైంది.
• గత త్రైమాసికంలో సంస్థ 2.05 బిలియన్‌ డాలర్ల విలువైన ఒప్పందాలు కుదుర్చుకున్నది. అంతక్రితం ఏడాదితో పోలిస్తే ఇది 23.4 శాతం అధికమని పేర్కొంది.
• వీటిలో 104 మిలియన్‌ డాలర్ల విలువైన ఒప్పందాలు తొమ్మిది ఉన్నాయి.
• సంస్థలో ఉద్యోగుల వలసలు 23.8 శాతానికి పెరిగాయి. గత త్రైమాసికంలో ఇది 21.9 శాతంగా ఉండగా, ఏడాది క్రితం 11.8 శాతంగా ఉన్నది.
• గత త్రైమాసికంలో కొత్తగా సంస్థ 6,023 మంది ఫ్రెషర్లను నియమించుకున్నది.
• కంపెనీకి సంబంధించి ఆయా రంగాల్లో వృద్ధి టెక్నాలజీ అండ్‌ సర్వీసెస్‌(34.2 శాతం), టెలికం, మీడియా, పబ్లిషింగ్‌ అండ్‌ ఎంటర్‌టైన్‌మెంట్‌(29.2 శాతం), తయారీ(19.1 శాతం), ఆర్థిక సేవలు(16.4 శాతం), లైఫ్‌సైన్సెస్‌ అండ్‌ హెల్త్‌కేర్‌(15.7 శాతం), పబ్లిక్‌ సర్వీసులు(15.2 శాతం) సాధించాయి.
• యూరప్‌లో 22.5 శాతం వృద్ధిని సాధించిన సంస్థ..అమెరికాలో 17.5 శాతం, మిగతా 18.2 శాతం పెరిగాయి.

వ్యాపారంలో టెక్నాలజీ పాత్ర చాలా కీలకంగా మారింది. క్లయింట్లు డిజిటల్‌కు పెద్దపీట వేస్తుండటంతో హెచ్‌సీఎల్‌ వీటిని అందిపుచ్చుకోవడానికి ప్రయత్నాలను ముమ్మరం చేసింది.’
– రోష్నీ నాడర్‌, హెచ్‌సీఎల్‌ చైర్‌పర్సన్‌